Etnicos de Europa

De Vicipedia
Vista jeneral de la distribui de la linguas xef de Europa.

Europa es comun regardada como un de la sete continentes, an si lo es fisical un parte de la continente Eurasia. Europa ave mares a tre de sua lados - la Mares Artica, Atlantica, e Mediteraneo. La Mediteraneo no ia es un ostaculo tro grande, ma ia conteni la etnicos de Europa e los de Africa norde pos la eda de la coloni de la elinicas e la fenisianes. La etnicos ia es ance separada par la divide entre imperos grande, como la Impero Roman e la imperos de Asia sude-este. La lado cuatro de Europa es tradisional asetada como la Montes Ural e la Caucasos. La estendes grande de la stepe e tundra ia esperia multe cambias de etnicos de edas antica, e multe de los esiste ancora en la nasion moderna de Rusia. Alga de los ia ance move en la dirije de Europa miles de anios en la pasada, incluinte la suomis, estis, e magiares cual ia construi nasiones cual esiste ancora en esta eda. Ultima, an si la bordas es permeable, la prosimia de la etnicos con lunlotra en esta bordas, e la comunica e comersia fasil, ia contribui a un "supra-etnico" partal compartida.

La continente no ave la area la plu grande en la mundo, e no ave la plu abitantes, ma lo es famosa per sua leteratur, arte, e musica, e sua nivel grande de developa de siensa e tecnolojia. La europeanes ia sperde se tra la mundo par coloni e concista de la teritorios de otras. Sua cualias bon e mal ia influe cuasi tota la mundo.

Etnico[edita | edita la fonte]

Un etnico es un categoria de persones ci identifia con lunlotra, fundida sur similias como asendentes comun, lingua, dialeto, istoria, relijio, mitos, rituos, nasion, cultur, cosina, arte, vestes, raza, aspeta fisical,etc. La parola es derivada de la parola elinica ἔθνος. Etnico es comun usada como sinonim con nasion o popla, ma lo ave alga sinifias unica.

  • Etnonasional - identia nasional o governa compartida. Esta modo de determina un etnico es multe resente, posible comensante no plu temprana ca la sentenio de 1600, con la comensa de nasiones como England. Ante alora, un "nasion" es determinada xef par la identia de la familia renante. A la otra lado, imperos ia es, par sua defini, composada de multe etnicos.
  • Etnorejional - un senti de parteni a un loca distinguida, resultante de isoli relativa jeografial, per esemplo la popla de un isola spesifada. En etnicos plu antica o primitiva, contata entre persones de la etnico es la funda de identia. La tribu comun composa un etnico multe reduida.
  • Etnolinguistica - lingua, dialeto, alfabeta compartida, per esemplo canadianes franses. Ante la eda moderna de nasiones, esta ia es posible la clasi la plu importante, ma lo continua es importante oji.
  • Etnorelijial - asosia compartida con un relijio, ramo, o seta, per esemplo iudis. Esta ia es un multe importante modo de identifia tra istoria en cultures, e continua es importante oji.
  • Etnoistorial - un identia fundida sur un istoria (vera o mitolojial) compartida. Esta modo de clasi etnicos es la plu importante en casos de popla ci ia deveni un minoria en sua nasion o teritorio.
  • Etnocultural - asosia compartida fundida sur arte, musica, leteratur, stilos de casas e otra construidas. Arceolojistes usa esta modo de clase per identifia la etnicos preistorial par sua fabricadas.
  • Etnorazal - aspeta fisical fundida sur orijinas jenetical, per esemplo americanes african. An si esta modo de clasi ia es usada per milenios, lo ia es reduida en importa par la descovres jenetical, cual indica ce separa clar de razas no es suportada par rexerca. Sola cuando un grupo con diferes de apare clar ia es introduida en un otra es la idea de raza asetable, ma sola como un identifia sosial o cultural.

On ave ance varias plu sutil: la diferes e relatas entre omes e femes, entre adultes e enfantes, entre empleores e empleadas; varias asetable regardante seso; preferes relativa per ierarcia o autonomia; ideas sur la valua de labora; espetas regardante distantia sosial, toca permeteda e nonpermeteda, abitas de cortesia; la senti de tempo dial o estendeda; e multe cosas plu. Esta aspetas de etnicos es la ojeto de rexerca par etnografistes e rexercores de la campos cultural de sosiolojia, psicolojia, e antropolojia. La metodo usada per studia esta detalias de vive umana es comun nomida "ethnografia densa".

Nasiones de Europa[edita | edita la fonte]

Andora
Balgaria
Beljia
Bielarus
Bosnia e Hersegovina
Cipros
Corvatsca
Cosovo
Danmarc
Deutxland
Elas
Er
Espania
Esti
Frans
Island
Italia
Latvia
Lictenstain
Lietuva
Luxemburg
Macedonia Norde
Magiar

Malta
Moldova
Monaco
Nederland
Noria
Osteraic
Polsca
Portugal
Rena Unida
Romania
Rusia
San Marino
Site Vatican
Slovenia
Slovensco
Suiz
Suomi
Sveria
Tsernagora
Turcia
Txesco
Ucraina
Xciperia

Alga nasiones en la Caucasos es a veses videda como un parte de Europa, an si los pote es ance videda como en Asia sude-ueste:

Haiastan
Sacartvelo

Alga persones crede ce Turcia intera no es en Europa, estra la parte a la ueste de la Mar Marmara.

La Rena Unida (acc Britan) es a veses videda como composada de cuatro "nasiones": England, Cimri, Scotland, e Er Norde. La plu de abitores vide se como un popla: la brites. La mesma idea es aplicada a veses sur Espania (spesial en la casos de Euscara e Catalan). Rusia ave un identia nasional aora clar (pos la fini de la Uni Soviet), ma es composada de multe etnicos, como la impero de sua pasada.

Linguas[edita | edita la fonte]

Linguas indoeuropean[edita | edita la fonte]

La plu de europeanes parla un de la multe linguas indoeuropean. La familias la plu grande es:

Otra familias indoeuropean es ance nativa a Europa:

Linguas nonindoeuropean[edita | edita la fonte]

On ave otra familias nonindoeuropean; alga de los es nativa a Europa:

Nativa a la caucasos (no videda como un parte de Europa par multe):

Otras ia es introduida de locas en Asia:

Linguas estinguida:

Migra[edita | edita la fonte]

An si migra ia es un aveni comun tra istoria, on pote vide multe migras de popla de otra continentes resente, spesial en la sentenio 20. La cade de la imperos european es un fonte major: Popla de America latina, de Asia sude, de Asia sude-ueste, e de Africa norde es bon esemplos. Multe de esta popla es de razas noneuropean o de miscas de razas, cual pote causa integra difisil en Europa.

Un otra causa de migras es gera. En la fini de sentenio 20 e la comensa de sentenio 21, la geras en Asia sude-ueste ia resulta en fujis grande de paises como Irac, Suria, Lubnan, Filastin, e otra nasiones a la nasiones de Europa. Con esta popla, sua difisiles es comun la resulta de sua relijio muslim, cual a veses no es acordable con la relijios tradisional de Europa.

La crese de nasiones con governas autoritar ia ance causa migra. Migra de Turcia e de Iran es bon esemplos.

Alga migras es la resulta de la desira per partisipa en la economia o educa de Europa. En esta caso, on pote vide multe persones de Xina, India, e otra paises asian, e alga colonias pasada en africa. La reveni de persones de America Norde e Australia a Europa es ance vidable.

Migras de Asia ia introdui budisme, induisme, jainisme, sicisme, e bahai a europa, e la cuantia de sua aderentes crese, par plu migra e par adota de los par otra europeanes.

Relijio[edita | edita la fonte]

Cristiania[edita | edita la fonte]

De la eda medieval alta, la plu parte de Europa ia es dominada par Cristianisme. Sirca 76.2% de europeanes vide se como cristianes. On ave tre setas xef:

  • Catolicisme - 48% de europeanes, xef en Europa sude, pd Espania, Portugal, Italia, Frans, Beljia; ance en Deutxland sude, Osteraic, Polsca, Txesco, Slovensco,Magiar, e Er
  • Ortodoxisme - 32% de europeanes, xef en Europa este e sude-este, pd Rusia, Slovenia, Corvatsca, Tsernagora, Macedonia Norde, Romania, Moldova, Elas, Sacartvelo
  • Protestantisme - 19% de europeanes, xef en Europa norde, divideda entre multe su-setas, pd Britan, Nederland, Deutxland norde, Danmarc, Noria, Sveria, Suomi, e Island. La formas major es Anglican, Luteran, e Reformida.

On ave ance la Eglesa Apostolal de Armenia, la eglesa nasional la plu vea.

Islam[edita | edita la fonte]

Islam es la relijio dominante en Turcia, Azerbaidjan, Cosovo, Xciperia (56%), Bosnia e Hersegovina (51%). En Rusia, la tatares, txetxenes, avares, inguxes, e otras ave ance majorias muslim. De la migras de la sentenio 20, muslimes ia deveni minorias notable en Europa ueste. Sirca 44 milion persones (6%) es muslim en Europa. Islam ia ave un efeto grande en Europa, tra sua rena en Espania e Portugal de 711 a 1492. La paises muslim ia reteni multe de la matematica, siensa, e leteratur de la elinicas e romanes antica, e ia importa la mesma de India. Plu resente, la Impero Osmanan ia domina la Balcanes.

Iudisme[edita | edita la fonte]

An si iudisme ave un istoria longa en Europa, lo resta un minoria peti. Sua istoria ia es multe afetada par la olocausto e simil atentas a la sutrae o elimina de la iudis, e migra (a Israel e America, spesial la SUA). La cuantia de iudis en Europa en 2010 ia es estimada a sirca 1.4 milion (0.2%), o 10% de la iudis en la mundo. Ma la efeto de iudisme sur la cultur european es enorme, spesial tra leteratur, musica, e siensa, e tra sua rol en cristiania.

Relijios vea[edita | edita la fonte]

La relijios de Europa antica ante la domina de cristiania ia ave efetos variosa sur la cultur de europeanes, e continua ave sua efetos tra la mitos, fables, e otra leteratur, e tra modos de espresa en arte e musica. En alga partes de Europa, partes de esta relijios survive en la forma de rituos, superstisio, e la crede en spiritos, monstros, e fes. An la rituos xef de cristiania conteni ancora pesos de la relijios vea, como Padre Noel, Santa Claus, la decoras de natal, e la tradisiones de pascua como coneos, galetas, ovos decorada, etc. Final, alga de la relijios antica ia es reviveda en la forma de paganisme moderna, comun en la paises de Scandinavia, en Er e Britan, e en la paises slavica e baltica.

Secularisme[edita | edita la fonte]

Un plu contribui a la relijios de Europa es la cuantia grande en multe paises de la nonrelijiosa, incluinte ateistes e agnosticas, ma ance la cuantia an plu grande de persones ci crede en alga bon spirito, sin vide lo como un dio tradisional. Ateistes e agnosticas composa sirca 18.2% de europeanes. En alga nasiones, la nonrelijiosa es la majoria de la popla: Txesco (76%), Nederland (68%), e Esti (60%). Frans ave un tradision de laicisme e secularisme de la Revolui Franses. Jeneral, europeanes ave un disposa deseverida regardante relijios e suporta un idea de separa de stato e relijio multe diferente de cual on pote trova en multe nasiones muslim o an en la SUA.

Raza[edita | edita la fonte]

La plu parte de europeanes es videda como "caucasian" o "blanca" (an si la otra razas e miscas de razas no es tro rara). Jeneticistes e Antropolojistes ci ia studia la idea de razas ia conclui ce razas es plu un idea aprendeda sosial, e no un colie de cualias jenetical plu o min valuada.[1] Ma, la istoria de razisme es longa, e ia deveni plu importante en la eda de colonialisme, cuando europeanes blanca ia comensa vide se como superior ca la popla "negra" o "jala", pd de Africa e Asia, e la popla orijinal de la Americas e de Australia.

An entre la popla de Europa, la idea de razas ia es aplicada a la abitantes de partes variosa de la continente: Europeanes de la norde e la ueste ia es videda en la sentenios resente como superior. Los de la sude (la mediteraneanes) e de la este (la slavicas) ia es videda como en alga modos inferior, an si no tan inferior como los de Africa o Asia. An la popla de un nasion ia es crededa como plu bon ca lo de un otra nasion. La engles, per esemplo, no ia vide la eres como sua egales, ma jeneticistes oji reconose ce la engles e la eres ave jeneticas no diferente. Jeneral, la ideas de superioria e inferioria ia es plu un caso de compete entre grupos o nasiones. An cuando la evidente de similia entre du grupos es forte, modos ia es inventada per esplica los.

Un cosa relatada a raza es sclavia. On debe recorda ce sclavia es cuasi universal, a min de la sosias tribal, e lo ia deveni multe plu importa cuando umanas ia comensa crea imperos. En Europa, sclavia ia es esensal per la vive de la Impero Roman. Lo ia diminui multe en la edas medieval, con la sustitui de cultivores liada a la tera en feudalisme. Ma sclavia ia es reintroduida forte cuando alga nasiones european ia deveni ancora imperos colonial. Natural, sclavos ia es videda como inferior, e la esiste de diferes en cualias como la color de pel ia resulta en fasil identifia.

Sclavia ia continua es un parte de cultur european en alga areas. Per esemplo, la sclavi de la romani en alga partes de Europa este, e la sclavia en la areas european de la Impero Osmanan. E cristiania e islam ia tradisional asetada sclavia como un realia, an si ambos suporta la idea de trata sclavos en un modo umana.

Un otra esemplo es la caso de la iudis, cual ia es reduida a non-sitadanes en la anios final de la Impero Roman. An si la iudis es blanca en sua color, e no difere multe jenetical, la resulta de un istoria de intersposi con persones noniudi, spesial en Frans, Polsca, e Lietuva, alga marcas peti de sua orijina semitica continua. Estas ia es usada e esajerada per suporta un idea de los es en realia un raza unica, cual pote es dominada. Sua esiste susedosa en la sites de Europa, spesial en la areas de comersia e finansia, ia es usada como un sinia de sua avaria e inferioria moral, e un escusa per discrimina e odia.

Como notada, razisme, sclavia, e sistemes de caste fundida sur erita o ricia, es comun en sosias umana. La susede de europeanes en tecnolojia, gera, e coloni ia asentua estas en la cultures european. On debe nota, la ideas rejetante estas es ance un parte de la cultur european, como un parte de sua progresa en filosofia, leteratur, e interpretes nova de relijio.

Conclui[edita | edita la fonte]

En realia, un etnico european es vera un colie de multe etnicos, de grandia e sinifia diversa. Ma la sentenios de contata entre los ia resulta en un acorda partal en alga areas, sufisinte per vide la esiste de un supra-etnico european, spesial en contrasta con alga etnicos e otra supra-etnicos estra Europa. La susedes de europeanes en la mundo (bon o mal) es causante la redui de separa de Europa de otra rejiones de mundo. Otras aseta partal alga cualias european, e europeanes aseta alga cualias de acel otra rejiones. Lo es posible ce umania va developa un etnico mundal en la futur con un tolera e an respeta per nosa diferes, posible car nos nesesa lo per garantia la survive la spesie intera.

Referes[edita | edita la fonte]

  1. Wade, Peter (2020). Race-umana. Encyclopedia Britannica.

Vide ance[edita | edita la fonte]

Lias esterna[edita | edita la fonte]