Frans

De Vicipedia
Republica franses
République française
Informa jeneral
Capital: Paris
Lingua ofisial: Franses
Dirije
Governa:
- Xef de stato: Emmanuel Macron
- Xef de governa: Élisabeth Borne
Otras
Area: 675 417 km²
Popla: 66 952 000
Densia: 98,8
PIB: US$ 2 608 699 milion
Mone: Euro
Zona de ora: +1
Numero de telefon: +33
Interede: .fr

Frans es un pais locada xef en Europa ma cual ave ance multe teritorios locada en la mares e en otra continentes. Lo es un republica constitual. Sua capital es Paris, la lingua ofisial es franses, e la mone ofisial es la euro (e la franc pasifica en la teritorios en la Mar Pasifica). La slogan de Frans es Liberté, Égalité, Fraternité (Libria, Egalia, Fratia).

Frans ia es formida en la eda medieval, prendente sua nom de la francos. De la comensa de la sentenio 17 asta la dui prima de la sentenio 20, lo ia ave un impero colonial grande. De la desenio de 1950, lo es un de la atores xef de la construi de la Uni European. Lo ave un influe political, economial, militar e cultural notable en tota la mundo.

Istoria[edita | edita la fonte]

Article xef: Istoria de Frans

Frans ocupa oji la plu de Galia celta antica, concistada par Julio Cesar en la sentenio 1 aec, ma ia prende la nom de la francos, un popla germanica ci ia instala se de la sentenio 5. Frans es un stato unida a multe tempo ante aora, e ia es un de la paises prima cual ia atenta un esperia democrata.

Preistoria[edita | edita la fonte]

Anticia[edita | edita la fonte]

Nase, crises e cambias de la rena de Frans en la eda medieval[edita | edita la fonte]

La converti a cristianisme de la xef franco Clovis ia fa ce el deveni la aliada de la Eglesa e ia permete ce el concista la plu de Galia en la cambia de la sentenio 5 a la 6. La fusa de la eritas galo-roman, la contribuis germanica e la cristianisme ia es longa e difisil, car la francos orijinal ia es un sosia militar multe diferente de la lege roman e la prinsipes cristian. An cuando la debilia demografial esperiada par la Rena de la Francos ia gida a la declina de la vilas, la cristianisme ia instala se como la funda de eglesas campanial e de multe moncerias.

Pipin la Peti e sua fio Carlo la Grande ia crese la estende de la rejion de la francos. La impero grande de Carlo la Grande ia es governada de Aachen. La contes ia representa la imperor en tota la impero. Carlo la Grande ia es coronida en 800 como imperor de la ueste e ia renase la instrui de artes (la palasio de Aachen ia vide un presentia grande de artistes de nivel alta). Ance, pos la mori de la imperor, sua contes e vasales ia comensa transmete sua titulos par erita.

Renase e monarcia (sentenios 16 a 18)[edita | edita la fonte]

De 1494, la monarcas franses ia gida multa geras en Italia contra la imperor Carlo 5 de Habsburg. Ma la renas de François 1 (1515–1547) e de sua fio Henri 2 (1547–1559) ia sesa ataca per forti la potia real, cual ia tende es asoluta, e per la renase leteratural e artal con un influe forte italian.

La sentenio de la revoluis (1789-comensa de la sentenio 20)[edita | edita la fonte]

La Ataca de la Bastilia es un de la avenis cual marca la comensa de la Revolui Franses.

La delegadas enviada a la Statos Jeneral cual ia comensa a 5 maio 1789 ia suprapasa rapida la potias cual ia es donada a los, e ia institui se en un Asembla Nasional Composante. La re no ia pote impedi la asembla composante de deside aboli la vantajes en la note de 4 agosto, e adota a 26 agosto la Declara de Diretos de la Om e la Sitadan. La slogan Liberté, Égalité, Fraternité ia apare en la debate publica, spesial en 1790 en un parla de Maximilien Robespierre su la organiza de la Garda Nasional.

Pos un atenta de monarcia constitual, la Republica ia nase a 22 setembre 1792 e Louis 16, condenada per tradi, ia es gilotinida par judi de la Confere Nasional a 21 janero 1793. Frans revoluiste ia esperia alga anios de geras e esecutas, asta la institui de la Directoire en 1795. A la 27 pluviôse An II (15 febrero 1794), la bandera de tre colores ia es instituida par la Confere Nasional, par comanda indicante ce "la scermo e la bandera nasional va es formida de tre colores nasional ordinada en tre bandas egal de forma en cual la blu es a la masto, la blanca en la media e la roja flotante".

La 9 novembre 1799, la jeneral Napoléon Bonaparte ia suverti la Directoire par un colpa de stato e ia sustitui la Consulia per lo; a sinco anios plu tarda el ia es coronida como Imperor de la Franses. Napoléon 1 ia crea o ia reformi multe instituidas e sua multa vinses militar ia lasa un dui de la popla european su sua controla en la comensa de la anios 1810. Contra esta, la declina ia es rapida: pos un renunsia tempora e un reveni corta a la potia, la imperor ia es vinseda en Waterloo a 18 junio 1815. Alora Frans ia comensa un esperia du de monarcia constitual, en cual la res Louis 18 (1814–1824) e Charles 10 ia defia un parte de la concistas de la Revolui. A alga semanas pos la concista de Alguer, Charles 10 ia es suvertida par la Tre Gloriosas, un move revoluiste ci ia eleva Louis-Philippe a la trono. An si el ia es videda como un reformiste, la protesta ia apare temprana, an con la aumenta economial cual Frans ia ave en esta epoca. En febrero 1848, un revolui nova ia esplode, de cual sua estende ia es no sola political ma ance sosial. La Republica Du tempora cual ia es enforsada ia institui la direto de vota universal mas, ia aboli la sclavia en la colonias e la puni de mori per causa political, ma lo ia es suvertida par sua presidente, Louis-Napoléon Bonaparte, ci ia es coronida como imperor en 1852.

Teritorio de la Impero Colonial Franses Du (de 1815 a 1958 ia comensa la nondependentes).

Si la anios prima de la Impero Du ia es de un governa autoritar, Napoléon 3 ia comensa un libristi en 1860, cual no ia impedi un asende de la oposa political, en cuando la developa industrial e ferovial ia rapidi. La defeta par un Deutxland cual ia es en un momento de uni, en 1870-1871, ia es un momento desidente en la istoria de la pais: la imperor ia sede a 2 setembre 1870 e la Republica ia es proclamada a 4 setembre, en cuando Prusen ia ajunta Alsace-Lorraine. La defeta franses evoca ance la episodio dramosa de la Comunia legal de Paris, craseda en maio 1871 par la soldatos de la governa. An con sua nase caososa, la Republica Tre es la plu longa de la governas political de Frans de 1789. La republicistes ia fa sua projeta political: la scola ia deveni sin custa, nonrelijial e obligante en 1881–1882, la librias de jornalisme e de reuni ia es acordada en 1881, la divorsa e la sindicatos ia es legalida en 1884 e la Eglesas ia es separada de la Stato en 1905. En la mesma epoca, Frans ia gania un impero colonial enorme, ci ia es la plu grande de mundo pos lo de la Rena Unida en 1914: ajuntada a la posesedas en Barat e Jazair ia es Indoxina, la protejedas Tunisia e Maroco, Africa ecuatoral e ueste, Madagasicara...

Pos la Libri[edita | edita la fonte]

Pos la ataca de la Bastilia a 14 julio 1789, la monarcia asoluta ia es abolida e Frans ia deveni un monarcia constitual. Par la Declara de la Diretos de la Om e la Sitadan, la Republica Franses ia institui diretos fundal per la sitadanes franses e tota persones.

1815: Batalia de Waterloo. Wellington e Bluecher vinse Napoleon pos sua "100 dias".

1848: La tirania de Napoléon III. Victor Hugo refuja se en Guernsey.

1914-18: La "Gera grande".

1940-44: Ocupa par Deutxland.

Un periodo de renovi ia comensa per Frans. An si la jeneral de Gaulle, xef de la Frans libre, no ia pote impedi la adota de un constitui prosima a lo de la Republica Tre, pos la gera on ia vide la crea de securia sosial e la direto de vota donada a femes. La "Republica Cuatro" ia deside suporta la Ueste en la gera fria cual ia comensa en esta epoca.

1958: Republica Sinco de Charles de Gaulle.

1968: "Les Evenements" (La Avenis). Tumultas e greves jeneral en tota la Frans.

Jeografia[edita | edita la fonte]

La teritorio franses ave un estende de 675 417 km², cual representa 0,50% de la teras emerjida de la planeta. La "Frans european" ave 551 695 km² e la Frans ultramar ave 123 722 km².

La isola la plu grande de Frans es Corse.

Politica[edita | edita la fonte]

Frans es un republica parlamental. La xef de stato es la presidente, ci es elejeda par la popla a cada anio sinco. La presidente eleje a la ministro xef, ci es la xef de la governa.

Organiza de potia[edita | edita la fonte]

La organiza de potia en Frans es instituida en la constitui de 1958, cual ia reseta multe cambias. Frans ave un sistem political cual reserva multe potia a la parlamento e a la presidente de la republica.

La parlamento ave la potia de legi. Lo es divideda en du cameras: la Asembla Nasional e la Senato.

La potia de esecuta es de la presidente de la republica, ci es la xef de stato e de la armada. El validi ance la leges e pote disolve la Asembla Nasional e inisia elejes. El proposa la ministro xef e, seguente sua proposas, la membros de la governa.

La potia de judi es separada de otras, an si la presidente de la republica ave la potia de pardona.

Cultur[edita | edita la fonte]

Lingua[edita | edita la fonte]

La lingua ofisial es la franses. Lo es la lingua ofisial de la republica seguente la constitui de 1992. Frans ave un politica tre ativa per sua lingua, e esta pote es videda entre otras en la Organiza Internasional de Francofonia. Otra linguas es parlada, como ositan, catalan, corsu, euscara e bresonica.

Leteratur[edita | edita la fonte]

Article xef: Leteratur franses

Dramistes clasica: Moliere, Pierre Corneille e Jean Racine.

Pos-clasica: Victor Hugo, J-P Sartre, Albert Camus

Poesistes: Victor Hugo.

Simbolistes: Baudelaire, Verlaine, Rimbaud, Apollinaire.

Cosini[edita | edita la fonte]

La cosini franses es multe conoseda en la mundo par causa de sua produidas cultival de cualia: multe vinos e cesos.

Jornales[edita | edita la fonte]

La plu grande es Ouest-France (con 800 000 suscrivores). Le Monde (politica sinistra); Le Figaro (politica destra); L'Humanite (comuniste). On ave ance la jornal semanal Charlie-Hebdo, cual gusta provoca la islamistes "pur e dura".

Sportes[edita | edita la fonte]

La sporte en Frans es distinguida par un tradision antica de sporte e un varia grande de disiplinas praticada a un nivel alta. Frans ave un rol xef en la organiza de la sporte moderna, e sua premiores, a la fini de la sentenio 20, ia fa ce lo deveni un de la nasiones la plu bon en la mundo de sporte.

Relijio[edita | edita la fonte]

Pos la leje de 9 desembre 1905, la eglesas es separada de la stato en Frans. La republica no reconose, no paia, e no suporta finansial la relijios, estra en Alsasia-Mozel do on reconose la catolicisme, du eglesas protestante e la iudis. La catolicisme es ance reconoseda en alga departes e en teritorios ultramar.