Cosovo

De Vicipedia
Republica de Cosovo
Republika e Kosovës
Република Косово
Republika Kosovo
Informa jeneral
Capital: Pristina
Lingua ofisial: Xcip
Dirije
Governa: Republica parlamental
- Xef de stato: Presidente Vjosa Osmani
- Xef de governa: Ministro xef Albin Kurti
Otras
Area: 10 887 km²
Popla: 1 739 825
Densia: 159,81
PIB: 13 020 milion
Mone: Euro
Zona de ora: CET (UTC+1)
Numero de telefon: +383
Interede:

Cosovo es un teritorio disputada e stato partal reconoseda en Europa sude-este. Lo ia declara sua autonomia de Serbia en febrero 2008 como la Republica de Cosovo.

Lo es en la Penisola Balcan sentral, ma sin costa. Par causa de sua loca stratejial, lo es un lia major entre Europa sentral e sude, la Mar Adriatica e la Mar Negra. Sua capital e site la plu grande es Pristina, e otra urbes major inclui Prizren, Peć e Ferizaj. Lo es bordada par Xciperia a la sude-ueste, la Republica de Macedonia a la sude-este, Tsernagora a la ueste, e la parte nondisputada de Serbia a la norde e este. An si Serbia reconose la maneja de la teritorio par la governa elejeda de Cosovo, lo continua reclama lo como sua propre Provinse Autonom de Cosovo e Metohia.

La istoria de Cosovo comensa en la eda paleolitica, representada par la cultures Vinča e Starčevo. En la periodo clasica, lo ia es abitada par poplas ilirian-dardanian e celta. En 168 aec, la rejion ia es proprida par la romanes. En la eda medieval, la pais ia es concistada par la Imperos Bizantian, Balgarsce e Serbsce. On regarda la Batalia de Cosovo en 1389 como un de la momentos defininte de la istoria medieval serbsce. La pais ia es la nucleo de la stato medieval de Serbia, e ia es ance la seja de la Eglesa Ortodox Serbsce de la sentenio 14, cuando sua grado ia alti a un patriarcia.

Cosovo ia es un parte de la Impero Osmanian de la sentenio 15 asta la temprana de la sentenio 20. En la tarda de la sentenio 19, lo ia deveni la sentro de la velia nasional xcip. Pos sua defeta en la Geras Balcan, la osmanianes ia sede Cosovo a Serbia e Tsernagora. Ambos paises ia junta se a Iugoslavia pos la Gera Mundal Prima, e pos un periodo de unisme iugoslavian en la rena, la constitui de Iugoslavia pos la Gera Mundal Du ia institui la Provinse Autonom de Cosovo e Metohia en la Republica de Serbi, alora un composante de Iugoslavia.

Tensa entre la comunias xcip e serbsce de Cosovo ia esiste en modo supresada tra la sentenio 20, e ia eruta como violentia major a veses, culminante con la Gera de Cosovo de 1998 e 1999, cual ia resulta la retira de soldatos serbsce e la institui de la Mision de Maneja Tempora de la Nasiones Unida en Cosovo. A 17 febrero 2008, Cosovo ia declara uniladal sua autonomia de Serbia. A pos, lo ia es diplomata reconoseda como un stato autonom par 110 statos membros de la NU. Serbia refusa reconose Cosovo como stato, an si lo ia aseta la legalia de sua instituidas pos la Acorda de Bruxelles de 2013.

Cosovo ave un economia de revenu media basa, e ia esperia crese economial en cada anio pos la comensa de la crise finansial global en 2008.

La area es sirca 10 908 cilometres cuadrida.

La cuantia de abitores, en la anio 2007, ia es sirca 1 804  838 persones.