Tsernagora

De Vicipedia
Tsernagora
Црна Гора
Crna Gora
Informa jeneral
Capital: Podgorica
Lingua ofisial: Serbsce e tsernogorsce
Dirije
Governa: Republica parlamental
- Xef de stato: Presidente Milo Đukanović
- Xef de governa: Ministro xef Zdravko Krivokapić
Otras
Area: 13,812 km²
Popla: 620,029
Densia: 45
PIB:
Mone: Euro
Zona de ora: CET (UTC+1)
Numero de telefon: +382
Interede: .me

Tsernagora (ance nomida Montenegro: ambos sinifia "monte negra") es un stato en Europa sude. Lo ave un costa a la Mar Adriatica a la sude-ueste, e es bordada par Corvatsca a la ueste, Bosnia e Hersegovina a la norde-ueste, Serbia a la norde-este, Cosovo a la este e Xciperia a la sude-este. Sua capital e site la plu grande es Podgorica, e Cetinje es titulida la Capital Real Vea.

En la sentenio 9, tre prinsias serbsce ia es locada en la teritorio de Tsernagora: Duklja, corespondente a aprosima la dui sude; Travunia, la ueste; e Rascia, la norde. En 1042, arconte Stefan Vojislav ia gida un revolta cual ia causa la autonomi de Duklja de la Impero Bizantian e la institui de la dinastia Vojislavljević. Pos pasa tra la controla de alga potias rejional e la Impero Osmanian en la sentenios seguente, lo ia deveni un parte de la Rena de Iugoslavia en 1918, cual ia es segueda par la Republica Federal Sosialiste de Iugoslavia en 1945.

Pos la desintegra de Iugoslavia en 1992, la republicas Serbia e Tsernagora ia institui juntada un federa como la Republica Federal de Iugoslavia, an si sua state como la seguente legal de Iugoslavia ia es oposada par otra republicas pasada e negada par la Nasiones Unida. En 2003, lo ia renomi se Serbia e Tsernagora. Pos la resulta de un referendo a 21 maio 2006, Montenegro ia declara autonomia a 3 junio de acel anio.

Etimolojia[edita | edita la fonte]

En lingua franca nova, la pais ave du nomes "Tsernagora" e "Montenegro". Ambos sinifia "monte negra". La parola "Montenegro" veni de la latina mons "monte" e nigra "black". Alga linguas cual tradui leteral esta nom es xcip Mali i Zi, elinica Μαυροβούνιο (Mavrovoúnio), jonguo "黑山" (Hēishān), turces Karadağ (e multe linguas turcica usante un varia de esta nom) e arabi الجبل الاسود (al-Jabbal al-Aswad). La linguas slavica (la lingua ofisial de la pais, tsernogorsce, es un lingua slavica) usa varias de la nom en la lingua de la pais (Crna Gora) e ance la nom prima usada en lingua franca nova "Tsernagora" veni de la nom ofisial. Otra esemplos de la varia fundida en la nom slavica es la nom en txesce Černá Hora, en rusce Черного́рия (Černogórija), en balgarsce Черна гора (Černa gora), e en polsce Czarnogóra (de sua forma literalleteral Czarna Góra). En la lingua mongol, la pais es nomida o Черногори (Chernogori, emprestada de rusce) o Монтенегро (Montenegro).

La nom Crna Gora ia comensa indica la plu de la Montenegro presente sola en la sentenio 15. Orijinal, lo ia refere a sola un banda peti de tera governada par la Paštrovići, ma la nom ia es final usada per la montania plu vasta pos cuando la familia nobil Crnojević ia prende la potia en Zeta Alta.

La rejion orijinal ia deveni conoseda como "Montenegro Vea" (Stara Crna Gora) en la sentenio 19 per distingui la rejion autonom e Brda ("montania"), un teritorio montenegrin visina e ocupada par osmanianes. Montenegro ia grandi plu a alga veses ante la sentenio 20, como resulta de geras contra la Impero Osmanian, cual ia vide la propri de Hersegovina Vea e partes de Metohija e Rascia sude. Sua fronteras ia cambia poca a pos, perdente Metohija e ganiante la Baia Kotor.

La codigo ISO Alfa-2 per Montenegro es ME, e la codigo Alfa-3 es MNE.

Istoria[edita | edita la fonte]

Eda medieval e ariva de la slavicas[edita | edita la fonte]

Anio 1080: la apico de la potia Dukljan.
La site de Doclea, un site roman e seja de la provinse roman tarda de Praevalitana.

En la sentenio 9, tre prinsias serbsce ia es locada en la teritorio de Tsernagora: Duklja, corespondente a aprosima la dui sude; Travunia, la ueste; e Rascia, la norde. En 1042, arconte Stefan Vojislav ia gida un revolta cual ia causa la autonomi de Duklja de la Impero Bizantian e la institui de la dinastia Vojislavljević. En la desenios seguente, lo ia estende sua teritorio a Rascia e Bosnia visina, e ia deveni ance reconoseda como un rena. Sua potia ia comensa declina en la comensa de sentenio 12. Pos la mori de la Re Bodin (en 1101 o 1108), alga geras interna ia segue. Duklja ia ariva a sua apico su la fio de Vojislav, Mihailo (1046–81), e sua neto Constantino Bodin (1081–1101). En la sentenio 13, Zeta ia sustitui Deuklja cuando on ia refere a la rena. En la tarda de la sentenio 14, Tsernagora sude (Zeta) ia deveni governada par la familia nobil Balšić, pos la familia nobil Crnojević e, en la sentenio 15, Zeta ia es plu frecuente conoseda como Crna Gora (venezian: monte negro).

Car la nobiles ia luta per la trono, la rena ia debili, e en 1186, lo ia es concistada par Stefan Nemanja e ajuntada a la rena serbsce como un provinse nomida Zeta. Pos la colasa de la Impero Serbsce en la dui du de la sentenio 14, la familia la plu potiosa de Zeta, la familia Balšić, ia deveni monarcas de Zeta.

En 1421, Zeta ia es ajuntada a la Despotia Serbsce, ma pos 1455, un otra familia nobil de Zeta, la familia Crnojević, ia deveni renores de la pais, cambiante lo a la monarcia libre ultima de la Balcanes ante la concista osmanian en 1496, e ia es ajuntada a sanjak de Shkodër. En la rena de la familia Crnojević, Zeta ia deveni conoseda su sua nom de oji – Montenegro. Tra un tempo corta, Tsernagora ia esiste como un sanjak autonom (1514–28); un otra varia de lo ia esiste denova entre 1597 e 1614. Ance la rejion de Hersegovina vea ia es un parte de la Sanjak de Hersegovina.

Luta contra la governa osmanian e bispia de metropoli[edita | edita la fonte]

Revolta de tsernagorsces contra osmanianes.
Refujadas tsernagorsce en la gera osmanian-tsernagorsce.
Batalia de Vučji Do entre la armadas tsernagorsce e osmanian.

Partes grande ia cade su controla de la Impero Osmanian de 1496 a 1878. En la sentenio 16, Tsernagora ia developa un forma unica de autonomia en la Impero Osmanian, permetente a la clanes tsernagorsce libria de alga restrinjes. An tal, la montenegrines no ia gusta la gida osmanian e ia rebela a multe veses en la sentenio 17, culminante en la defeta de la osmanianes en la Grande Gera Turces a fini de la sentenio.

La stratejia militar tsernagorsce ia es simple ma produosa: si la osmanianes ta veni con 5000 soldatos, la tsernagorsces ta pote oposa los; si la osmanianes ta veni con plu soldatos ca la tsernagorsces pote oposa, la montenegrines ta arde tota, ta retira plu en la montanias e ta lasa ce la enemi mori de famia.

Tsernagora ia es composada par teritorios controlada par clanes gerosa. Plu clanes ia ave un xef (knez), ci no ia pote ave la titulo sin demostra ce el es tan meritante como gidor como sua presedor. La asembla grande de clanes tsernagorsce (Zbor) ia reuni a cada anio en 12 julio en Cetinje, e cualce adulte de cualce clan ia pote partisipa.

Partes de la teritorio ia es controlada par la Republica de Venezia e la Impero Franses Prima e Osteraic-Magiar, sua seguores. En 1515, Tsernagora ia deveni un teocratia gidada par la bispia de metropoli de Tsernagora e la Costa, cual ia flori pos cuando la Petrović-Njegoš de Cetinje ia deveni la prinses-bispos tradisional (de ci sua titulo ia es "Vladika de Tsernagora"). An tal, la Republica Venezian ia introdui governores ci ia interfere en la politica montenegrin. La republica ia es segueda par la Impero Osteraices en 1797, e la governores ia es abolida par la Prinse-Bispo Petar 2 en 1832. Sua presedor Petar 1 ia contribui a la uni de Tsernagora con la Terenos Alta.

Prinsia de Tsernagora[edita | edita la fonte]

Petar 2 Petrović-Njegoš, ia es un Prinse-Bispo (vladika) de Tsernagora, poesiste nasional e filosofiste.

Su Nicolas 1, la prinsia ia es grandida a veses diversa en la geras tsernagorsce-turces e ia es reconoseda como nondependente en 1878. Su la gida de Nicolas 1, relatas diplomata ia es instituida con la Impero Osmanian. Estra scaramuxas en la frontera, la diplomatia ia gida 30 anios de pas entre la du statos asta la despone de Abdul Hamid 2.

La capasia political de Abdul Hamid e Nicolas 1 ia ave un rol major en la relatas mutua amin. Lo ia segue la moderni de la stato, culminante con la clama de un constitui en 1905. An tal, lutas political ia emerji entre la Partito Poplal renante, ci ia suporta la democrati e uni con Serbia, e la Partio Poplal Vera, ci ia es monarciste.

En esta periodo, un de la vinses tsernagorsce major su la osmanianes ia aveni en la batalia de Grahovac. La dux grande Mirko Petrović, frate major de Knjaz Danilo, ia gida un armada de 7500 persones e ia vinse 15 000 osmanianes en Grahovac a 1 maio 1858. La gloria de la vinse tsernagorsce ia es nonmortalida en cantas e leteratur de tota la slavicas sude, xef par la tsernagorsces en Vojvodina, alora un parte de Osteraic-Magiar. Esta ia forsa la Grande Potias a desinia ofisial la fronteras entre Tsernagora e la Impero Osmanian, reconosente par fato la nondepende tsernagorsce, cual ia es ance reconoseda par la Impero Osmanian en la Trata de Berlin en 1878.

La constitui prima de Tsernagora ia es proclamada en 1855, conoseda como "Codigo Danilo".

Rena de Tsernagora (1910-1918)[edita | edita la fonte]

Bandera osmanian sededa a la re Nicola 1.
Paje xef de la jornal italian La Tribuna Illustrata de 1919, con la titulo "Lutas sirca Podgorica entre la armada tsernagorsce e rebelas serbsce.

En 1910, Tsernagora ia deveni un rena, e como resulta de la geras de la Balcanes en 1912 e 1913 (en cual la osmanianes ia perde tota la Balcanes), un frontera comun con Serbia ia es instituida, con ce Shköder ia es donada a la Xciperia nova emerjinte, an si la capital de Tsernagora, Podgorica, ia es la frontera vea de Xciperia e Iugoslavia.

Tsernagora ia es entre la Aliadas en la Gera Mundal Prima (1914–18). De 1916 a otobre 1918, Tsernagora ia es ocupada par Osteraic-Magiar. En la ocupa, la Re Nicolas ia fuji de la pais, e la governa en esclui ia es organizada en Bordeaux.

Rena de Iugoslavia[edita | edita la fonte]

En 1922, Tsernagora ia deveni la oblast de Cetinje en la Rena de Serbsces, Corvatsces e Slovenianes, con la ajunta de la areas costal ensircante Budva e la Baia de Kotor. En un restruturi en 1929, lo ia deveni un parte de la banato de Zeta en la Rena de Iugoslavia cual ia ariva a la rio Neretva.

La neto de Nicolas, la re serbsce Alexander 1, ia domina la governa iugoslavian. La banato de Zeta ia es un de la nove banatos cual ia forma la rena; lo ia es formida par lo cual es oji Tsernagora e alga partes de Serbia, Corvatsca e Bosnia.

Gera Mundal Du[edita | edita la fonte]

Tsernagora en la Iugoslavia sosialiste[edita | edita la fonte]

Tsernagora en la Republica Federal de Iugoslavia[edita | edita la fonte]

Nondepende[edita | edita la fonte]

Jeografia[edita | edita la fonte]

Internasional, Tsernagora ave fronteras con Corvatsca, Bosnia e Hersegovina, Serbia, Cosovo e Xciperia. Lo es locada entre la latitudes 41° e 44°N, e lonjitudes 18° e 21°E.

Tsernagora varia de la apicos alta longo sua bordas con Serbia, Cosovo e Xciperia, un parte de la Carst de la Penisola Balcan ueste, a un plano costal streta cual es larga de sola 1,5 a 6 cilometres larga. La plano para en la norde, do la Monte Lovćen e la Monte Orjen tufa en la baieta de la Baia de Kotor.

La rejion de Carst la plu grande de Tsernagora es locada en altias de 1000 m supra la mar, ma alga partes ateni 2000 m, como la Monte Orjen (1894 m), la masif la plu alta entre la cadenas de calcario costal. La vale de la Rio Zeta, con altia de 500 m, es la parte la plu basa.

La montes de Tsernagora inclui alga de la tereno la plu ru en Europa, con un eleva promedia plu ca 2000 m. Un de la apicos la plu notable de la pais es Bobotov Kuk en la Montes Durmitor, cual ave un altia de 2522 m. Par causa de la clima iperumida en la parte ueste, la cadena montanial tsernagorsce ia es la parte la plu erodeda par jelo de la Penisola Balcan en la periodo glasial ultima.

Politica[edita | edita la fonte]

La Palasio Azul, abiteria de la Presidente de Tsernagora en Cetinje.

La constitui de Tsernagora descrive la stato como un "stato ecolojial, democrata, munisipal de justia sosial, fundida en la rena de la Lege". Tsernagora es un republica autonom cual ia proclama sua constitui nova en 22 otobre 2007.

La Presidente de Tsernagora es la xef de stato, direta elejeda a cada sincuple de anios. La Presidente representa la pais estra la pais, promove leges par proclama, clama a vota per la Parlamento, e proposa aspirores per ministro xef, presidente e judores de la Corte Constitual de la Parlamento. La Presidente proposa ance la clama a referendo a la Parlamento, amnestia la ofendes criminal prescriveda par la leje nasional, dona premios e fa otra debes, e es un membro de la Consilio de Defende Suprema. La abiteria ofisial de la Presidente es en Cetinje.

La Governa de Tsernagora ave la potia de esecuta. La governa es gidada par la ministro xef, e es formida par la visministros prima como ance la ministros.

La Parlamento de Tsernagora es un legeria de un salon. Lo aseta lejes, validi tratas, nomi la ministro xef, ministros e judores de tota la cortes, adota la bujeta, e fa otra debes como institui la constitui. Lo pote ance fa un vota de nonfida a la governa par majoria simple. Un representor es elejeda par 6000 votores. La parlamento ave 81 sejas, con 39 tenida par la Alia per un Tsernagora European pos la elejes parlamental de 2012.

Divides manejal[edita | edita la fonte]

Munisipas de Tsernagora.

Tsernagora es divideda en 23 munisipas (opština) e du munisipas urban, con du sudivides de la munisipa de Podgorica. Cada munisipa pote ave multe sites. Istorial, la teritorio de la pais ia es divideda en "nahije".

Economia[edita | edita la fonte]

Clasida par la Banco Mundal como un pais de revenu media alta, Tsernagora es un membro de la NU, OTAN, la Organiza Mundal de Comersia, la Organiza per Securia e Coopera en Europa, la Consilio de Europa, la Acorda de Comersia Libre de Europa Sentral, e un membro fundinte de la Uni per la Mediteraneo.

Turisme[edita | edita la fonte]

Tsernagora ave un costa depintin e un rejion montanial a norde. La pais ia es un loca conoseda par turistes en la desenio de 1980. An tal, la geras de Iugoslavia lutada en la paises visina en la desenio de 1990 ia descapasi la industria de turisme e ia dana la imaje de Tsernagora per anios.


Demografia[edita | edita la fonte]

Strutur etnical[edita | edita la fonte]

Etnicos dominante en cada munisipa de Tsernagora, 2011.

Longo la conta de abitores de 2003, Tsernagora ave 620 145 sitadanes. Si la metodolojia usada asta 1991 ta es adotada en la conta de abitores de 2003, Tsernagora ta ave 673 094 abitores rejistrada. La resultas de la conta de abitores de 2011 ia mostra ce Montenegro ave 620 029 sitadanes.

Tsernagora es un stato multietnical en cual no grupo etnical ave un majoria. La grupos etnical xef inclui montenegrines e serbsces; otras es bosnianes, xcipes e corvatsces. La cuantia de montenegrines e serbsces flutua vasta entre la contas par causa de cambias de la modo en cual la popla persepi, esperia o eleje espresa sua identia e parteni etnical.

Area[edita | edita la fonte]

La pais ave un area de sirca 14 026 cilometres cuadrida e, en la anio 2006, sirca 630 548 abitores. La linguas major es serbsce e tsernagorsce.

Vide ance[edita | edita la fonte]

Referes[edita | edita la fonte]

  1. "Zakon o izmjenama i dopunama Zakona o teritorijalnoj organizaciji Crne Gore." Službeni List Crne Gore. 7 March 2014. Retraeda en 21 June 2014.
  2. "Zakon o izmjeni i dopuni Zakona o teritorijalnoj organizaciji Crne Gore." Službeni List Crne Gore. 11 June 2013. Retraeda en 30 June 2014.