Island

De Vicipedia
Republica de Island
Lýðveldið Ísland
Informa jeneral
Capital: Reykjavík
Lingua ofisial: Islansce
Dirije
Governa: Republica parlamental
- Xef de stato: Guðni Thorlacius Jóhannesson
- Xef de governa: Bjarni Benediktsson
Otras
Area: 102 775 km²
Popla: 332 529
Densia: 3,2/km2
PIB: US$ 12 148 milion
Mone:
Zona de ora: GMT (UTC+0)
Numero de telefon: +354
Interede: .is

Island (islansce Ísland, /ˈistlant/) es un pais nordica en Europa norde, cual es un isola en la norde de la Mar Atlantica. Lo ave un area de sirca 103 000 cilometres cuadrida. La cuantia de abitores ia es plu ca 330 000 persones en 2016, tal ce lo es la pais la min densa poplada en Europa.

La governa es ”roja-verda”. La congresa es la Alþingi. La lingua major es islansce, un lingua norde germanica, o lingua nordica.

Island es locada en la norde de la Mar Atlantica, prosima a la Sirculo Artica. Jeografial, on regarda lo como un parte de Europa, ma jeolojial lo parteni a Europa e America.

Sua capital e site xef es Reykjavík, pronounsiada como Reiciavic. Sua nom sinifia aprosima ”baia de fuma”. Sirca 220 000 persones abita en Reykjavík e la area prosima. Otra sites importante es Akureyri, Reykjanesbær, Kópavogur e Hafnarfjörður.

En la tempo temprana de abita umana en Island, 25 % de la isola ia es covreda par forestas. Aora, sola 1 % de la area es foresta. Arbores nativa inclui betul, cual ia formi forestas en la pasada, e poplo tremante, sorbo, juniper, e otras como salses.

Cuasi tota de la eletrica de Island veni de recursos renovable.

Istoria[edita | edita la fonte]

La abitores prima de Island ia es la papar, eremitas cristian celta, ci ia abita la isola ante cuando lo ia es descovreda par umanas nordica en la sentenio nove. Aora, on ia trova restantes de casas: un casa abandonada a alga tempo entre 770 e 880, e un casa longa de sirca 800.

La om nordica Garðar Svavarsson ia es la umana prima conoseda ci ia sirconaviga la isola, en 870. El ia construi un casa en Húsavík (aprosima ”baia de casas”), e ia abita en Island tra la inverno. Un de sua omes, Náttfari, ia resta con du sclavos, e diseda par alga fontes,[1] los ia deveni la abitores permanente prima conoseda.

Ingólfr Arnarson, un xef norsce ci ance frecuente es atribuida como la coloniste islansce prima, ia construi sua abitada en la loca cual es aora Reykjavík en 874. Pos acel, multe migrores ia veni, xef norsces ma ance scandinavianes e otras, e sua sclavos ci ia es frecuente eres e scotes. Sirca la anio 1000, la abitores ia adota cristianisme como relijio. En 1262 lo ia deveni un parte de la rena de Noria.

A la fini de la sentenio 14 la isola ia deveni un teritorio dansce. A 1 desembre 1918 lo ia deveni un rena autonom e a 17 junio 1944 lo ia deveni un republica.

En 1949 lo ia deveni un membro de OTAN. Pos la Gera Mundal Du la economia ia crese multe, xef la industria de pexes.

Politica[edita | edita la fonte]

Island es un republica parlamental. La presidente es elejeda a cada cuatruple de anios. La parlamento – en islansce Alþingi – creada en 930, ave 63 membros, ance elejeda a cada cuatruple de anios. La presidente eleje un de la membros de parlamento como ministro xef.

Island es un membro de OTAN ma no de la UE.

Economia[edita | edita la fonte]

Esporta de Island
Paje de manoscrito vea con la saga de Njál

La mone de Island es la corona islansce. Un sonda a 5 marto 2010 sur la adota de euro ia rejeta sua adota.

En anios resente, la fabrica e la servis de la economia islansce ia diversi, xef la developa de programes per computador, biotecnolojia e servis finansial.

Demografia[edita | edita la fonte]

La abitores presente de Island desende de un misca entre la vicinges e la celtas. La popla es consentrada en Reykjavik e sua rejion urban, cual ave 200 000 abitores o 64% de la popla intera.

La majoria (75,06%) de la abitores es luteran. Otra cristianes es 11,72%. An tal, la presentia a misa es basa. Seguente un studia publicida en 2001, 23% de la abitores es ateiste o agnostica.

Cultur[edita | edita la fonte]

La leteratur clasica de Island es composada de naras, nomida sagas, sur la istoria antica de la pais, per esemplo la saga Eiríkis sur la descovre de Gronland e Newfoundland. La Biblia ia es traduida a islansce en la sentenio 16. En la sentenio 19 la poesiste xef ia es Jónas Hallgrímsson. En la sentenio 20 Halldór Laxness ia deveni la scrivor islansce la plu famosa, e ia reseta la Premio Nobel per Leteratur en 1955.

Björk es un de la cantores la plu conoseda de Island. La bande Sigur Rós es ance famosa.

Imajes[edita | edita la fonte]

Fontes[edita | edita la fonte]

  1. https://www.visindavefur.is/svar.php?id=48331