Ucraina

De Vicipedia
Ucraina
Україна
Ukraína
Informa jeneral
Capital: Ciiv
Lingua ofisial: Ucrainsce
Dirije
Governa:
- Xef de stato: Presidente Volodimir Zelensci
- Xef de governa: Denis Xmihal
Otras
Area: 603 500 km²
Popla: 42 539 010
Densia: 73.8
PIB:
Mone:
Zona de ora: EET (UTC+2)
Numero de telefon: +380
Interede: .ua, .укр

Ucraina es un pais en Europa este. Lo es bordada par Rusia a la este, norde-este e sude, par Bielarus a la norde-ueste, par Polsca e Slovensco a la ueste, par Magiar, Romania e Moldova a la sude-ueste, e par la Mar Negra a la sude e la Mar Azov a la sude-este.

Ucraina es presente en disputa teritorial con Rusia sur la penisola Crim, cual Rusia ia propri en 2014, ma cual Ucraina e la plu de la comunia internasional reconose como ucrainsce. Incluinte Crim, la area de Ucraina es 603 628 km², tal ce lo es la plu grande de la paises cual es intera situada en Europa e la pais 46 de la plu grandes de mundo. Lo ave sirca 42,5 milion abitores, tal ce lo es la pais 32 de la plu popladas de mundo.

La teritorio moderna de Ucraina ia es abitada de 32 000 aec. En la eda media, la rejion ia es un sentro major de cultur slavica este, con ce la stato potiosa Rena de Ciiv ia formi la funda de la identia ucrainsce. Pos sua frati en la sentenio 13, la teritorio ia es disputada, renada e divideda par potiosas diversa, incluinte Lietuva, Polsca, la Impero Osmanian, Osteraic-Magiar e Rusia. Un republica cozac ia emerji e flori en la sentenios 17 e 18, ma sua teritorio ia es ultima divideda entre Polsca e la Impero Rusce, e plu tarda lo ia fusa completa con Rusia.

En la sentenio 20, tre periodos de autonomia ia aveni. La prima ia es corta, en e direta pos la ocupa deutx, prosima a la fini de la Gera Mundal Prima. La numero du ia es ance corta, e ance pos ocupa deutx, en la Gera Mundal Du. An tal, pos ambos de estas, la teritorios de Ucraina ia es final recombinada a un republica soviet en la URSS. La periodo tre de autonomia ia comensa en 1991, cuando Ucraina ia gania sua autonomia de la Uni Soviet en la tempo pos sua disolve a la fini de la Gera Fria. A pos, Ucraina ia manteni sua autonomia.

Ucraina es ja longa un graneria global, par causa de la vastia e fertilia de sua tera cultivada, e lo es un de la esportores major de gran en la mundo. Sua economia diversida inclui un campo grande de industria pesosa, spesial de airospasio e aparatos industrial.

La pais es un republica su un sistem semipresidental con potias divideda a ramos leginte, esecutante e judinte. Sua capital e site la plu grande es Ciiv. Escluinte Crim, lo ave 42,5 milion abitores, de ci 77,8% es etnical ucrainsce e 17,3% es rusce. La lingua ofisial es ucrainsce, e sua alfabeta es cirilica. La relijio major en la pais es la Eglesa Ortodox Este, cual ia fa un influe forte a la arciteta, leteratur e musica ucrainsce.