Uni de Republicas Sosialiste Soviet
La Uni de Republicas Sosialiste Soviet (rusce: Союз Советских Социалистических Республик o СССР) ia es un nasion multe grande con un governe comuniste en Europa e Asia entre 1922 e 1991. Un soviet es un comite, la funda teorial de la sosia comuniste e la URSS. Pos la Revolui Rusce de 1917, alga republicas soviet ia formi un uni de estende simil a la Impero Rusce (sin Polsca e Suomi).
Lo ia deveni un uni de 15 republicas de pos 1956: Armenia, Azerbaidjan, Bielarus, Cazacstan, Cirgistan, Esti, Jorjia, Latvia, Lietuva, Moldova, Rusia, Tadjicistan, Turcmenistan, Ucraina, e Uzbecistan. Entre 1945 e 1991, la URSS ia es, con la SUA, un de la du suprapotias. La uni ia disolve en 1991.
La URSS ia ave sua radises en la Revolui de Otobre en 1917, cuando la bolxevices – gidada par Vladimir Lenin – ia suverti la Governa tempora rusce cual ia recambia Tsar Nicolai 2. En 1922, la URSS ia es formida par la combina de la republicas rusce, transcaucasian, ucrainsce e bielarusce. Pos la mori de Lenin en 1924 e un luta corta de potia, Josef Stalin ia ateni potia en la media de la desenio de 1920. Stalin ia promete continua la ideolojia de la stato a marxisme-leninisme (cual el ia crea), e ia comensa un economia sentral desiniada. Como un resulta, la pais ia esperia un periodo de industri e colie rapida. Paranoia political ia es provocada sur Stalin, e la Purga Grande ia es esecutada per sutrae sua oposores de la Partito Comuniste par arestas acaso e persegues de multe persones.
Corta ante la Gera Mundal 2, Stalin ia suscrive la Trata Molotov-Ribbentrop e ia acorda per nonataca con Deutxland nazi, pos cual la du nasiones ia invade Polsca en setembre 1939. En junio 1941, Deutxland ia invade la URSS, cual ia comensa la teatro de gera la plu grande e sanguosa en istoria.
