Gera Mundal Du

De Vicipedia
Gera Mundal Du
'
De sinistra a destra e de alta a basa: soldatos de la Commonwealth en la deserto; siviles xines vivente es tombida par soldatos nion; un sumarina deutx es atacada; fortes soviet en la sentro de Stalingrado pos la sede deutx de la site; soldatos soviet en Berlin; aviones nion a punto de enaira.
Data 1 setembre 1939 asta 2 setembre 1945
Loca Mundo
Resulta Vinse de la alias
Militaria
Alias Ase
Comandores
Joseph Stalin
Franklin Roosevelt
Winston Churchill
Chiang Kai-shek
Adolf Hitler
Hirohito
Benito Mussolini
Forsas total
Perdes
Plu ca 49 000 000
33 000 000 nonmilitares
16 000 000 militares
Plu ca 12 000 000
8 000 000 nonmilitares
4 000 000 militares

La Gera Mundal Du ia es un disputa mundal cual ia aveni entre 1939 e 1945. La plu de la nasiones de la mundo ia combate en lo, incluinte tota la potiosas grande, grupida en du alias militar oposada: la Alias e la Ase. Lo ia es la gera la plu grande de istoria, con plu ca sento miliones de soldatos e un state de "gera intera" en cual la combatentes major ia destina tota sua capasia economial, militar e siensal a servi la gera, eliminante la diferes entre recursos sivil e militar. Lo ia es la gera con la cuantia la plu grande de persones mor, con entre 50 e 70 miliones de vitimes.

Gera Mundal Du ia comensa a 1 setembre 1939 con la invade de Polsca par Deutxland e la declaras de gera cual segue par Frans e Britan sur Deutxland. De 1939 tarda a 1941 temprana, en un serie de campanias e tratas, Deutxland ia concista o controla un parte grande de Europa continental, e ia formi la Ase con Italia e Japan. Su la Acorda de Molotov-Ribbentrop de agosto 1939, Deutxland e la Uni Soviet ia divide e propri teritorios de sua visinas Polsca, Suomi, Romania e la statos de la Baltica. Seguente la comensa de la campanias en Africa norde e este, e la Cade de Frans en 1940, la gera ia continua xef entre la potias de la Ase e la Impero Brites. Gera en la Balcanes, la Batalia de Britan, la Blitz, e la Batalia de la Atlantica ia segue. A 22 junio 1941, la Ase ia comensa un invade de la Uni Soviet, per crea la teatro de gera la plu grande en istoria. Esta fronte este ia trapa la Ase, spesial la Wehrmacht deutx, en un gera de erode.

Japan, cual ia intende domina Asia e la Pasifica, ia es a gera con Xina de 1937, an si no lado ia declara gera contra la otra. En desembre 1941, Japan ia lansa un ataca surprendente a la SUA e la colonias european en la Pasifica. Seguente la declara direta de gera par la SUA contra Japan, suportada par un declara par Britan, la potias de la Ase ia declara rapida gera contra la SUA per suporta sua alia japanes. Concistas rapida par Japan tra multe de la Pasifica ueste ia segue, videda par multe en Asia como libri de domina par la ueste, e resultante en la suporta par armadas de alga teritorios vinseda par Japan.

La avansa de la Ase en la Pasifica ia para en 1942 cuando Japan ia perde la Batalia de Midway, e plu tarda, Deutxland e Italia ia es vinseda en Africa norde e alora, un defeta seria a Stalingrad en la Uni Soviet. Reversas clavin en 1943, cual ia inclui un serie de defetas deutx a la fronte este, la invades par la Alias de Sisilia e Italia, e vinses en la Pasifica, ia custa la Ase sua avansas e ia forsa lo a un retrae stratejial a tota frontes. En 1944, la Alias ueste ia invade Frans, en cuando la Uni Soviet ia regania sua perdes teritorial e continua a Deutxland e sua alias. En 1944 e 1945, la japanes ia sufri reversas major en Asia continental, en Xina sentral e sude, e Burma, en cuando la Alias ia descapasi la marina japanes e ia catura isolas importante en la Pasifica ueste.

La gera en Europa ia conclui con un invade de Deutxland par la Alias ueste e la Uni Soviet, cual culmina en la catura de Berlin par soldatos soviet, la suiside de Adolf Hitler, e la sede sin constrinjes par Deutxland a 8 maio 1945. Seguente la Declara de Potsdam par la Alias a 26 julio 1945 e la refusa par Japan per sede su la constrinjes de lo, la SUA ia cade du bombas atomal sur la sites japanes de Hiroshima e Nagasaki a 6 e 9 agosto 1945. Con un invade de la arcipelago japanes prosiminte, la posible de plu bombas atomal, la entra par la sovietes en la gera contra Japan e sua invade de Mandju, Japan ia anunsia sua intende per sede a 15 agosto 1945, cual conclui la gera con un vinse completa en Asia per la Alias. Cortes ia es creada par la Alias e prosedes per crimines de gera ia es conduida contra la deutx e la japanes.

La Gera Mundal Du ia cambia la alinia political e strutur sosial de la globo intera. La Nasiones Unida ia es instituida per aida la developa de coopera internasional e preveni desacordas futur. La potias grande vinsente - Xina, Frans, la Uni Soviet, la Rena Unida, e la SUA - ia deveni la membros permante de la Consilio de Securia. La Uni Soviet e la SUA ia emerji como suprapotias oposante, cual comensa la Gera Fria per la seguente dui sentenio. Seguente la ruina european, la influe de sua potias grande ia descrese, cual resulta en la descoloni de Africa e Asia. La plu de nasiones de ci sua industrias ia es danada ia move a recovre e estende economial. Integra political, spesial en Europa, ia emerji como un atenta a fini la desacordas de ante la gera, e crea un identia comun.