Linguas semitica

De Vicipedia
Jump to navigation Jump to search
La locas de linguas semitica sirca la sentenio prima

La linguas semitica es un ramo de la familia de linguas afroasiatica cual orijina en Asia sude-ueste. Los es parlada par plu ca 330 milion persones tra multe partes de Asia sude-ueste, Africa norde, e comunias en Europa e America Norde. La nom es derivada de "Xem", un de la tre fios de Noa en la libro Jenese en la Biblia. (Nomes de la otra fios, Ham e Japet, ia es usada en nomes vea per la linguas de Africa norde e Europa, en esta ordina.)

La linguas semitica la plu parlada oji es arabi (sirca 300 milion), amaran (sirca 22 milion), tigrinia (sirca sete milion), ivri (sirca sinco milion), arami (sirca un milion), e malti (sirca .5 milion).

La linguas semitica ia aveni como scriveda multe temprana istorial, con testos de Acad e Ebla (en un scrive ajustada de la cuneforma de Sumer) aparente de la sentenio 30 aec e 25 aec en Mesopotamia e la Levante norde, en esta ordina. La sola linguas plu temprana atestada ia es sumer, elam, egiptian, e lullubi. La plu de sistemes de scrive usada per linguas semitica es abjades, pd formas de alfabetas cual no inclui alga o an tota vocales. Lo es posible per la linguas semitica car la consonantes en esta linguas es porta la plu de la sinifia de parolas.

La linguas semitica es marcada par sua morfolojia noncontinuante. Pd, la radises de parolas no es, par se mesma, silabas o parolas, ma en loca es grupos isolada de consonantes (tipal tre, creante la "radis treleteral"). Parolas es composada de la radises no prima par ajunta prefisas o sufisas, ma par pleni la radis con vocales entre la consonantes (an si prefisas e sufisas es comun ajuntada ance). Per esemplo, en arabi, la radis con la sinifia jeneral de "scrive" ave la forma k-t-b. De esta radis, parolas es formida par ajunta vocales e a veses plu consonantes, pe:

  • كتاب kitāb - "libro"
  • كتب kutub - "libros"
  • كاتب kātib - "scrivor"
  • كتّاب kuttāb - "scrivores"
  • كتب kataba - "el ia scrive"
  • يكتب yaktubu - "el scrive"

La ordina de parolas en proto-semitica ia es verbo-sujeto-ojeto, poseseda-posesor, e nom-ajetivo. Esta ia es ancora la modo en arabi clasical e ivri biblial. En dialetos arabi e ivri moderne, la ordina ia deveni plu comun SVO. La linguas semitica moderne de Itiopia usa SOV, posesor-poseseda, e ajetivo-nom.

Proto-semitica ia ave un sistem de tre casos de nomes (e sua ajetivos) - nominativa, acusativa, e jenetiva - con finis vocal -u, -a, -i, como ancora en la arabi de la curan. Ma la formas demotica de la plu de linguas semitica ia perde la distinguis de casos. Cuantia de nomes ia ave orijinal tre formas: singular, dual, e plural. Arabi clasical ave ancora la dual (usada per duples) e la dual aveni a veses en Ivri. Ma la plu de la linguas demotica ave sola singular e plural.

Tota linguas semitica ave du modos de morfolojia usada per conjuga verbos. Conjugas de sufisa ave sufisas cual indica la person, cuantia, e seso de la sujeto, cual sembla la sufisas de pronomes usada pea indica ojetos direta a verbos e posese a nomes. Conjungas de prefisa ave ambos prefisas e sufisas, con la prefisas tipal indicante person (e a veses cuantia e/o seso) e la sufisa (completa diferente de los de la conjuga de sufisa) indica la cuantia e seso cuando la prefisa no marca los. Otra cambias indica parla direta e sujuntiva, e pasada-presente e/o perfeta/nonperfeta.