Sintatica

De Vicipedia

Sintatica es la regulas per ordina parolas per crea frases coerente en un lingua. Esta regulas inclui la clases de parolas, la indica de roles cual parolas entra, e la modeles per usa esta clases e roles. Sintatica interlia la consetas en la mente (vide semantica) e la capasias per parla, comprende, scrive, e leje un lingua. Comun, sintatica inclui morfolojia, cual ave un article propre. Vide ance fonetica per un discute de la produi (e reconose) de la sonas de linguas.

Clases de parolas[edita | edita la fonte]

En cada lingua, parolas pote es clasida par la relatas permeteda entre los e otra parolas. La clases de parolas inclui la seguentes. Nota ce no cada lingua usa tota de estas, e alga linguas usa varias plu detaliosa. La clases stelida (paroletas) es cluida, cual es per dise ce los no permete la ajunta de parolas nova e donce es comun clases peti. La otra clases es abrida e permete la ajunta de parolas nova e donce es comun multe grande.

  • nomes – persones, animales, cosas
    • nomes comun
    • nomes propre (tipal indicante un person o cosa unica, un "nom" en la usa nonlinguistica)
    • pronomes* (me, tu, el, lo, on, se, nos, vos, los; ci, ce, cual; esta, acel, tota, algun, cadun, etc)
  • verbos – atas, states, cambias, relatas, efetos
    • verbos comun
    • copulas* (es, deveni, pare, etc)
  • ajetivos – cualias
    • ajetivos comun
    • determinantes* (la, un, tota, esta acel, alga, cada, etc)
    • paroletas de cuantia* (un, du, tre...; multe, poca, etc)
    • comparantes* (plu, min, la plu, la min, tan, etc)
  • preposadas* – alga relatas en spasio, tempo, etc (a, de, ante, pos, supra, su, con, sin, etc)
  • averbos* (vide a su) (ala, asi, sempre, nunca, tro, an, etc)
    • paroletas de tempo, modo, aspeta, e vose* (ia, va, ta)
    • paroletas de nega e afirma* (si, no)
    • paroletas de grado* (vera, tan, poca, multe, estrema, apena, serta, probable, posible, etc)
  • conjuntas e sujuntas* (e, o, ma; ci, cual, cuando, do, como, etc)
  • etc – la lista varia per cada lingua

Roles[edita | edita la fonte]

On ave un colie de roles, paralel a la clases, en cual parolas pote entra. La du roles la plu importante es partisipantes (engles: "arguments") e predicas. Partisipantes (en la plu de casos, nomes con sua alterantes) pote es sujetos o ojetos de predicas. Predicas (verbos, ajetivos, preposadas, e otras, con sua alterantes) alora descrive sua sujetos e junta los a se ojetos. Plu, alga predicas pote governa un otra ojeto (comun nomida la ojeto nondireta); e, en alga linguas, on pote ave un otra sujeto (nomida la tema o foca) cual, an si no direta interatante con la predica, es an tal un "sujeto" de la proposa.

On ave spesies variosa de predicas: Alga – predicas xef (plu comun, verbos con sua ojetos e alterantes) – pote crea un proposa; otras – predicas alterante (pe, ajetivos e preposadas) – no pote crea proposas par se mesma.

Ajetivos e preposadas pote opera como predicas xef en multe linguas par la usa de verbos spesial nomida copulas. Per esemplo, on pote dise "lo es verde" e "el es en la jardin", etc. En multe otra linguas, la usa normal de ajetivos es como predicas xef, pe "el grande" en loca de "el es grande".

Alga predicas descrive sola un sujeto (pe, verbos nontransitiva, ajetivos); alga predicas governa ance un ojeto (pe, verbos transitiva, preposadas). On ave an alga predicas cual no ave un sujeto o ojeto (per esemplo, verbos de clima), e alga predicas cual governa du ojetos (pd, verbos ditransitiva). Esta varias es nomida la valentias de un verbo, con valuas de 0, 1, 2, o 3 (la cuantia de sujetos e ojetos). Ma valuas de 1 e 2 es la plu comun, e otras pote es espresada par la usa de "trucos" como pronomes pupetin ("lo pluve") e preposadas ("el dona lo a me").

Alga predicas descrive otra predicas – los altera la sinifia de un verbo o ajetivo, per esemplo. En esta casos, on refere a los como predicas averbal, o plu simple, averbales. La grupo cluida de parolas cual spesiali en esta rol es nomida averbos. Seguente la usa de esta termas en deutx, ajetivos usada per altera otra predicas (pe, los cual fini con -ly en engles o -mente en italian) es nomida ajetivos averbal.

Alga parolas pote es usada (o, plu esata, reusada) per otra roles ca sua roles normal. Comun, los ave afisas per indica la rol nova, ma ance comun, los no cambia en forma.

  • Verbos pote opera como partisipantes (pe infinitivas, jerundios - "me dansa" > "dansa es bon")
  • Verbos pote opera como alterantes (pe partisipios - "dansa" > "dansante")
  • Ajetivos pote opera como partisipantes (pe nomes de cualias, colores, etc - "saja" > "sajia")
  • Nomes pote opera como alterantes (pe nomes aposada, nomes jenitiva, etc - "Joan" > "re Joan"
  • Nomes pote opera como averbales (pe alga casos de nomes en latina, o parolas como "oji", "ier", etc)
  • Preposadas pote opera como averbales (pe, "a pos", contra "pos lo")
  • An averbos pote opera en otra roles (pe, "asta aora", contra "me vade aora")

Nota ce parolas es videda como reusada cuando los reteni se sinifia fundal orijinal e donce reteni ance alga de la se potias orijinal (pe, infinitivas, jerundios, e partisipios continua comun governa ojetos; en multe linguas, los reteni an sua indicas de tempo, etc). Ma si, per esemplo, un verbo es usada per refere a un person o cosa, an sin un afisa, lo no es plu un verbo, ma un nom. Pe, "laboror" refere a un person ci labora, no a la labora mesma. E cuando un nom es usada per indica un ata, lo no es plu un nom, ma un verbo. Pe, "marteli" en "el marteli la clo" refere a la ata, no la util.

Per resoma, la spesies e suspesias comun de roles sintatical inclui...

  • partisipantes (engles: arguments)
    • sujetos
    • ojetos
  • predicas (transitiva e nontransitiva)
    • predicas xef
    • predicas alterante (alterantes)
    • predicas averbal (averbales)

Formulas[edita | edita la fonte]

On pote usa grupos de parolas (formulas) como partisipantes e predicas. Esta formulas es composada de un parola sentral con sua alterantes e sua ojetos. Per esemplo, en la frase "La om vea con la parapluve vade rapida a la opera", "La om vea con la parapluve" pote es videda como la formula sujetal de la formula predical "vade rapida a la opera".

Formulas pote es ance "reusada" (pd, usada en modos min comun). Per esemplo, un verbo con sua nom ojetal (normal usada como un formula predical) pote ata como un formula partisipante en un frase plu complicada. En la frases "come tartes es bon" e "me gusta come tartes", la formula "come tartes" es usada como un formula partisipante, an si lo es composada de un verbo e sua nom ojetal. Nota ce, en multe linguas, la verbo "come" usada como un partisipante es en la forma de un infinitiva o jerundio (pe "to eat", "eating", "comer", etc).

Proposas[edita | edita la fonte]

Un proposa es un segue de parolas cual pote comunica un sinifia completa. La plu comun, un proposa es composada de un sujeto e un predica xef, incluinte sua ojetos e alterantes variosa. Un proposa cual sta par se mesma es un frase.

A alga veses, proposas es juntada a (o an caxida en) otra proposas. Proposas caxida en otra proposas es nomida proposas suordinada:

  • Un proposa cual altera un partisipante es nomida asi un proposa alterante (o proposa ajetivin);
  • Un proposa cual altera un predica es nomida un proposa averbin;
  • Un proposa cual opera como un partisipante es nomida un proposa partisipante (o proposa nomin).

Proposas suordinada es comun juntada a se sujeto o predica par paroletas spesial nomida sujuntas, cual es comun pronomes ("supronomes") o averbos ("suaverbos") "reusada", e ata en un modo simil a preposadas (pd, como predicas alterante e transitiva). Alga sujuntas (como la "ci" en "me sabe ci fa lo") combina la rol de sujunta e un partisipante de la proposa suordinada.

Alga juntas – notable "e" – es interesante car los crea un unia plu grande. Per esemplo, en "Joan e Maria ia vade a casa", "Joan e Maria" deveni un formula partisipante cual es descriveda par "ia vade a casa". Simil, en "Joan ia vade a casa e come", "ia vade a casa e come" deveni un formula predical cual descrive "Joan". E, en "Joan ia vade a casa e Maria ia resta asi", du proposas es liada, sin alga interata clar. A la otra lado, la juntas "ma" e "o" es plu complicada, con roles cual inclui serta la roles de predicas.

Modeles[edita | edita la fonte]

Asi es sujestes per modeles per lfn:

Brasetas reta indica ce on pote usa zero o un parola en esta rol;
Brasetas risa indica ce on pote usa zero, un, o plu parolas en esta rol.

Roles[edita | edita la fonte]

X = partisipante (nomes, plu comun)
P = predica xef (verbos, plu comun)
Pn = predica nontransitiva (verbos nontransitiva, plu comun)
Pt = predica transitiva (verbos transitiva e sua ojetos, plu comun)
Pc = copula
A = alterante
An = alterante nontransitiva (ajetivos, plu comun)
At = alterante transitiva (preposadas e sua ojetos, plu comun)
Av = alterante averbal

Frases[edita | edita la fonte]

F = X P
pd: un sujeto e un predica
pe: "oji, la gato come la mus en la casa"

Formulas[edita | edita la fonte]

X = pronom / {prenom} X {A} / Pp
pd: un pronom, un nom, posible con prenomes e ajetivos, o un proposa partisipante (nomin)
pe: "me" / "esta gato grande"
pronom = me, tu, el... cada, cadun, multe...
prenom = la, un, cada, alga, tota, multe...
P = Pn / Pt X / Pc A / [neg] [preverbo] P {Av}
pd: un predica nontransitiva, un predica transitiva con un ojeto, o cualce predica con negativas, preverbos, e averbos
pe: "senta" / "come pan" / "es grande" / "no ia pasea rapida"
neg = no
preverbo = ia, va, ta
A = {grad} An / {grad} At X / Pa
pd: un alterante (con o sin un ojeto e posible un grado), o un proposa alterante (ajetivin)
pe: "multe grande" / "tota en la casa"
Av = {grad} / {grad} An / {grad} At Xo / Pav
pd: un grado, un alterante (con o sin un ojeto e posible un grado), e un proposa averbin
pe: "tan" / "multe rapida" / "tota en ritmo"
grad (paroletas de grado) = vera, multe, poca, alga, plu, min, tan...
(la paroletas de grado es clar relatada a la pronomes e prenomes)

Proposas[edita | edita la fonte]

Proposa partisipante (nomin) (Pp) = sujunta F
pd: un frase introduida par ce o esce
pe: "ce tu va veni"
sujunta = ce / esce
Proposa alterante (ajetivin) (Pa) = [At] supronom F
pd: un frase introduida par cual o ci, posible pos un preposada
pe: "...ci come la mus" / "...ci la gato come" / "...a ci me parla"
supronom = cual / ci
Proposa averbin (Pav) = [At] suaverbo F
pd: un frase, introduida par un suaverbo, posible pos un preposada
pe: "...en do la gato come la mus"
suaverbo = do / cuando / cuanto / como / si / car / afin

Demandas[edita | edita la fonte]

...D = [At] dem F ?
pd: un frase, introduida par un paroleta de demanda, posible pos un preposada
pe: "a ci me parla?"
= esce F ?
pe: "esce la gato come la mus?"
= F, si ?
= F, no ?
= F ?
dem (paroleta de demanda) = ci / cual / perce / do / cuando / como
(la paroletas de demanda e la suaverbos e supronomes es clar relatada)

Juntas[edita | edita la fonte]

F = F conj F – "me veni asi e me vade ala"
X = X conj X – "la buo e la gateta"
P = P conj P – "ia come e ia bevi"
A = A conj A – "grande ma fea", "en la caxa e sur la table"
conj = e / o / ma