Fonetica

De Vicipedia
Jump to navigation Jump to search

La fonetica es un ramo de la siensa linguistica. Lo studia la sonas de la linguas umana. Par metodo fundal, on compara la sonas per conose la distinguis. Per esemplo, p e b es multe simil, ma on vibra la cordas vosal per b, e no per p. Cada lingua reconose alga distinguis e no otras, e, a alga veses, oia la diferes no es fasil.

Consonantes[edita | edita la fonte]

Un consonante es un sona cual ave alga resiste contra la flue de aira.

Entre la consonantes, un de la diferes la plu fundal es esce on vibra la cordas vosal (sona con vose) o no (sona sin vose): b, d, g, v, z, j, m, n, l e r es consonantes con vose; p, t, c, f, s e x es consonantes sin vose.

Moda de consonantes[edita | edita la fonte]

  • Esplodentes ave un bloci e relasa subita de la flue de aira. En elefen: p, b, t, d, c, g.
  • Fricantes ave un bloci partal de la aira, cual crea un sona ru o sibilante. En elefen: f, v, s, z, x, j.
  • Africantes comensa par un bloci (como de un esplodente), ma on relasa lo a modo sola partal (como un fricante): ts, dz, tx, dj.
  • Nasales ave un bloci (como de un esplodente), ma on lasa ce la aira flue tra la nas. En elefen: m, n.
  • Licuidas no ave un bloci, e frica min ca la fricantes.
    • Vibrantes es creada par un vibra peti de la lingua. En elefen: r.
    • Ladales es creada par pone la lingua a la sentro de la palato e lasa ce la aira sorti a la lados de la lingua. En elefen: l.
    • Ladales fricante es entre la ladales e la fricantes: un forma de l en multe linguas, como cimri e polsce.
    • Prosimintes es licuidas cual lasa ce la aira sorti supra la lingua: la r en engles american o engles eres.
  • Semivocales es sonas prosima a vocales, ma con alga restrinje de la aira: i o u ante un otra vocal (i consonantal e u consonantal), o y e w en engles.

Ance:

  • Palatalidas es consonantes cual es rapida segueda par un i consonantal: comun en la linguas slavica, como rusce.
  • Aspiradas es esplodentes segueda par alga espira: comun en la linguas xines e indian.

Loca de consonantes[edita | edita la fonte]

  • Bilabiales usa la du labios: p, b, m; u ante un otra vocal.
  • Labiodentales usa la dentes alta e la labio basa: f, v.
  • Dentales ave la punto de lingua a la dentes alta: th en engles o z en castelian.
  • Alveolales ave la punto de lingua prosima a (ma pos) la dentes alta: t, d, s, z, n, l, r.
  • Posalveolales ave la lingua plu pos la dentes alta: x, j
  • Retroflexes curvi la punto de la lingua a retro, a la sentro de la palato: multe sonas en hindi, o la r en alga dialetos engles american.
  • Palatales ave la sentro de la lingua a la sentro de la palato: tx, dj; i ante un otra vocal, la sonas ni- e li- en multe linguas romanica.
  • Velales ave la sentro de la lingua a la retro de la palato (= a la velo): k, g, ch en deutx.
  • Uvulales usa la uvula, a la entra a la garga: la r de franses de Paris, la h de engles o deutx.
  • Farinjales usa la garga pos la uvula: alga sonas de arabi es farinjal.
  • Glotales usa la glote (la larinje) per bloci la flue de aira: la sona entre un parola cual fini par a e un otra cual comensa par a.

Vocales[edita | edita la fonte]

Vocales es sonas con vose (vibra de la cordas vosal) cual no ave un bloci o resiste de la flue de aira. On fa la diferes par la forma de la caveta de boca, usante la lingua e labios en locas diversa.

  • Vocales fronte — la lingua es prosima a la fronte de la boca. En elefen: i, e.
  • Vocales retro — la lingua es prosima a la retro de la boca. u, o.
  • Vocales sentral — la lingua es sentral en la boca: a.
  • Vocales cluida — la lingua es prosima a la palato: i, u.
  • Vocales medial — la lingua es a la media entre la palato e la basa de la boca: e, o.
  • Vocales abrida — la lingua es a la basa de la boca: a.
  • Vocales ronda — la labios formi un sirculo: o, u, e la vocales fronte simil de deutx e otra linguas (ö, ü).
  • Vocales plata — la labios reposa: i, e, a, e la vocales retro simil de japanes (la u de suru) e otra linguas.

Vide ance[edita | edita la fonte]