Sumer

De Vicipedia
Un mapa de Mesopotamia temprana. Nota la cursos diferente de la rios e la estende de la Golfo Persian
Un sculta de un adoror mas, sirca 2750 a 2600 aec

Sumer es la sivilia la plu temprana conoseda en la rejion de Mesopotamia sude (Irac sude de oji), entre la edas calcolitica e bronze temprana, e posible un de la sivilias prima en la mundo, con Egipte antica e a la Vale Indo. Abitante longa la vales de la rios Tigris e Eufrates, cultivores sumer ia pote cultiva gran e otra cultivas, de cual la suprapasa ia permete ce los ta abita en un loca. Protoscrive ia comensa sirca 3000 aec. La testos la plu temprana ia es de la sites de Uruc e Jemdet Nasr de 3300 aec. Scrive cuneforma ia comensa en 3000 aec.

Siensistes ia sujeste ce Sumer ia es prima permane abitada entre sirca 5500 e 4000 aec, par un pople ueste asian ci ia parla un lingua isolada, sumer, atestada par a nomes de sites, rios, abitas, etc. Esta popla preistorial es aora nomida la ubaides, e siensistes crede ce lo ia evoluida de la cultur Samara de Mesopotamia norde. Siensistes suposa ce ubaides (an si no notada par la sumeres se mesma) ia es la forte sivilinte prima en Sumer, drenante la pantanes per cultiva, developante comersia, e institui industrias, incluinte la artes de texe, cuoro, metal, petra e brice, e vasia.

La sivila sumer ia formi en la periodo de Uruc (la milenio cuatro aec), continuante en la periodos de Jemdet Nasr e de la dinastias temprana. Entre la milenio tre aec, un simbiose cultural ia developa entre la sumeres, ci parla sua lingua isolada, e la parlores de acad, con multe bilingualisme. La influe de la lingua sumer a acad e la reversa es mostrada en tota partes de la linguas, incluinte multe emprestas de parolas e converje de sintatica, morfolojia, e fonolojia. Esta ia condui sientistes a la conclui ce sumer e acad en la milenio tre aec ia deveni un "sprachbund" o area linguistica, pd linguas nonrelatada con multe similias emprestada. Sumer ia es concistada par la res de la Impero Acad, ci parla un lingua semita, sirca 2270 aec, ma sumer ia continua como un lingua relijiosa, simil como latin ia es retenida en cristianisme catolica e ivri en iudisme.

Rena par la sumeres ia recomensa per sirca un sentenio en la dinastia tre de Ur a sirca 2100 a 2000 aec, ma la lingua acad ia resta usada. La site sumer de Eridu, a la costa de la Golfo Persian, es regardada como la site prima en la mundo, do tre cultures separada ia fusada posible: lo de la cultivores ubaid, abitante cabanas de brices de fango e irigante sua campos; lo de la pastoralistes nomada semita, abitante tendas negra e seguente manadas de oveas e capras; e lo de la pescores, abitante cabanas de cana en la pantanes, ci ia es posible la antesedentes de la sumeres.