Engles (lingua)

De Vicipedia
Engles (English)
Parlada en: Vide su
Area: Tota la mundo
Tota parlores: L1: 430 million (2013), L2: 950 million (2013)
Ordina:
Familia: Linguas germanica
State ofisial
Lingua ofisial de:
Regulada par:
Sifras
ISO 639-1 en
ISO 639-2 eng
SIL eng
  Paises do Engles es un lingua ofisial o ofisial par fato, o lingua nasional
  Paises do lo es un lingua ofisial ma no lingua prima
Vide ance: LinguaLista de linguas

Engles parteni a la grupo anglofrisce en la ramo ueste de la linguas germanica, un sufamilia de linguas indo-european.

Lo es la lingua dominante en comunica, siensa, tecnolojia, comersia, avioni, diverti, radio e diplomatia. Lo es la lingua du (pos xines) en cuantia de parlores nativa, e la lingua prima si on inclui los ci aprende lo como un lingua du. Lo es un lingua ofisial en 53 paises, incluinte Britan, Er, Sudafrica, India, Australia, Zeland Nova, Canada, e la SUA, e ance en organizas como la Nasiones Unida.

Istoria[edita | edita la fonte]

On reconose tre niveles xef en la developa de engles.

  • "Engles vea" ia esiste de 449 a 1066 e.c.
  • "Engles media" ia dura de 1066 a 1500.
  • "Engles moderna" comensa sirca 1500 e es sudivideda en "engles moderna temprana" de 1500 a 1660 e "engles moderna tarda" de 1660 asta la presente.

Engles vea, un varia de germanica ueste, es parlada par alga poplas germanica ci ia invade Britan en la sentenio 5 e.c. Engles vea ia es un lingua infletada, e an si lo ia es rica en capasias de construi parolas, sua vocabulo ia es peti. Lo ia presta vera poca parolas de la linguas celta, latina e scandinavian.

A comensa de la periodo de engles media, la lingua ia es ancora infletada; a la fini de la periodo, la relata entre la elementos de un frase ia depende esensal de la ordina de parolas. Casos gramatical e alteras de nom ia es simple. Un cuantia de parolas aidante ia veni de nordica vea e la normandes, ci ia concista England en 1066, ia trae otra ajuntadas a la vocabulo.

En comensa de engles moderna, un cambia major ia aveni en pronunsia. La "desloca grande de la vocales", cual es ancora continuante, ia fa ce la pronunsia de parolas engles difere de otra linguas europan. La vocabulo ia grandi alora par la reusa vasta de un parte de parla per un otra, e par presta de otra linguas.

La regulas formal de gramatica ia es bon fundida sirca la fini de sentenio 18. A resulta de sperde colonial en sentenios 19 e 20, multe parolas nova ia es asetada, incluinte parolas nativa de America norde, de Australia, e de Africa. Ance miles de termas siensal ia es developada per indica descovres, consetas e inventas nova.

En Britan Grande a presente, la parla de la popla instruida es nomida "engles normal asetada" (Received Standard English). Multe persones engles ci parla un de la dialetos local diferente en sua infantia usa engles normal asetada cuando los studia a scola. En la SUA, dialetos variosa esiste ance. An si los no ave un norma ofisial, "american jeneral" ia developa cual es usada en educa, comersia, e alga formas de telecomunica.

Dialetos importante local ia developa en Er, Scotland, Australia, Zeland Nova, Sudafrica, e Canada.

Cualias[edita | edita la fonte]

La vocabulo engles ia grandi multe en plu ca 1500 anios de developa, cresente a plu ca 1 milion de parolas. Lo ave la vocabulo la plu grande de tota la linguas de la mundo. Parolas nova es creada par presta de otra linguas e par metodos como onomatopea (imita de sonas natural), afisa (ajunta de prefisas e sufisas), la formi libre de composadas, la altera de parolas esistente, e la cambia de clase — p.e. la usa de un verbo como un nom: to find "trova" (verbo) e a find "un trovada" (nom).

Engles ave la spele la plu difisil de linguas cual usa la alfabeta latina, car la spele de parolas no ia cambia cuando sua sona ia cambia, e car la modo de spele stranjer ia es retenida sin cambia en parolas adotada par engles.

Engles moderna ave infletas rara. Nomes ave finis diferente sola per indica la pluralia par -s e la posese par 's. La verbo engles es ance multe simple, comparada con la strutur verbal en linguas relatada, usante sola -ing per la jerundio e la partisipio presente, e -ed per la pasada e la partisipio pasada. Ma multe verbos no es coerente, con formas diferente per presente e pasada e, en alga verbos, an la partisipio pasada. La tempo futur es formida par usa la vero aidante will ante la verbo, e formas perfeta par usa la verbo have. En loca de afisas, lo usa comun verbos aidante como do, can, may, must e would, cual pote causa multe difisiles per aprendores. Final, a multe veses, du parolas es contraeda, pe I'll ("me va"), don't ("no fa"), we've ("nos ave"), etc.

Dialetos[edita | edita la fonte]

Engles brites inclui la multe dialetos parlada en la Isolas Brites, incluinte England, Scotland, Cimri e Er. Simil a engles brites es la engles parlada en Australia, Zeland Nova, Sudafrica e alga isolas en la Caribe e la Pasifica, e como un lingua franca en nasiones como India, Cenia, etc. Alga de esta dialetos difere multe de la otras, ma la parlores atende la dialeto cuasi ofisial nomida "Received English" o "The Queen's English", cual introdui alga grado de coere a esta dialetos.

Engles norde american es plu coerente, ma ave ance sua varias, incluinte la engles parlada en Canada cual reteni alga cualias de pronunsia, spele e vocabulo brites. Multe persones reconose la dialetos parlada en la sude de la SUA, en la montanias de Apalatxia, e en la sites grande de la costa este, como New York, par sua representas en la sinema e la televisa.

La diferes la plu distinguinte entre engles american e engles brites es en pronunsia e vocabulo con diferes peti en spele, altia de tono, e asentua. La influe de medias publica pare move la lingua a un model plu coerente tra la mundo. Ma un cualia unica de la lingua engles resta: sua tende de crese e cambia. En la sentenio dudes, engles ia deveni la lingua xef de comunica internasional.

Vide ance[edita | edita la fonte]

Linguas germanica
Germanica norde DansceFaroisceIslansceNorsceSvensce
Germanica ueste AfricansDeutxEnglesEngles anticaFrisceIdesLimburganNederlandesPlatdeutxScotes
Germanica este BurgundaGotoLangobardaVandal
Creoles BislamaCreol jamaicanSinglesSrananPisin
Artifisial FolkspraakFrenkisch