Santa Claus

De Vicipedia
Jump to navigation Jump to search
Santa Claus, escutante la desiras de enfantes
Padre Natal, 1895

Santa Claus, ance conoseda como San Nicola e Padre Natal, es un carater lejendal ci ia orijina en la cultur de cristianisme ueste, e ci es notada per trae donadas a la casas de enfantes "bon conduinte" a la sera ante natal (24 desembre) e la matina temprana de natal (25 desembre). La Santa Claus moderne ia developa de tradisiones sirca la santa istorial San Nicola, un bispo elinica de Myra (Demre, en Turcia moderne) en la sentenio cuatro ci ia es notada como un donor de donadas. El ia evolui e deveni Sinterklaas en Nederland e Padre Natal en Britan Alga studentes de mitos sujeste ce el ia asorbe ance elementos de la dio germanica Wodan, ci ia es asosiada con la avenis pagan de la media de inverno nomida Jul (engles: Yule).

Santa Claus es asosiada xef con tradisiones de America norde. El es depintada como un om vea, joiosa, con un barba longa e blanca, e alga obesa. Tipal, el es mostrada con un oculo, un jacon roja con pelo blanca e botas negra, e portante un saco grande plen de donadas per enfantes. Esta imaje ia deveni popular en America norde en la sentenio 19, la resulta de un poesia par Clement Clarke Moore, "Un visita de San Nicola", de 1823, e un depinta par la cartuniste Thomas Nast. Esta imaje ia es fortida par cantas, radio, televide, libros de enfantes, filmas, e an anunsia. La imaje contraste con la imaje de San Nicola orijinal, cual es como un om alta e magra, con la vestes de un bispo. Ma la orijinal ia ave ance un barba blanca e vestes roja, plu bon representada par Sinterklaas en Nederland.

En la mito moderne, Santa Claus abita a la polo norde, do el fabrica juetas con la aida de multe elfos, e porta sua donadas a la enfantes de la mundo en un treno traeda par renos. La carater de Padre Natal de Britan ave sua orijin en tradisiones vea. Cuando la puritanes ia controla la governa en la sentenio 17 e ia atenta deslegali la selebra de natal en un modo nonrelijiosa, otras ia usa un carater plu vea per simboli la selebra tradisional, cual inclui cantas, dansas, comedas spesial, e alcol. En la rena de rea Victoria, la selebra ia cambia a un cual asentua enfantes, la resulta de la sposo de la rea, prinse Albert, traente alga ideas de la natal de sua enfantia en Deutxland a Britan. En la sentenio 20, Padre Natal ia deveni fusada con Santa Claus de America norde.