Rea Victoria

De Vicipedia
Jump to navigation Jump to search
Victoria en 1833, par George Hayter

Rea Victoria (Alexandrina Victoria; 24 maio 1819 – 22 janero 1901) ia es la rea de la Rena Unida de Britan Grande e Er de 20 junio1837 a sua mori. A 1 maio 1876, el ia adota la titulo de Imperoresa de India.

Victoria ia es la fia de Prinse Edward, Duxe de Kent e Strathearn, la fio cuadro de Re George 3. Ambos la duxe e la re ia mori en 1820, e Victoria ia es elevada su la supravide constrinjente par sua madre, Prinsesa Victoria de Saxe-Coburg-Saalfeld. El ia erita la trono la eda de 18, pos tota la frates plu vea de sua padre ia mori, restante no enfantes legal survivente. La Rena Unida ia es ja un monarcia constitual plen instituida, en cual la monarca ia no teni multe potia political direta. En privata, Victoria ia atenta influe la politica de la governa e la asinia de ministros; en publica, el ia deveni un icon nasional ci ia es videda como un model seria de moralia personal.

Victoria ia sposi sua cusin (de grado un) Prinse Albert de Saxe-Coburg e Gotha en 1840. Sua nove enfantes ia sposi en familias real e nobil tra la continente, liante los con lunlotra e gania per Victoria la nometa "la ava de Europa". Pos la mori de Albert en 1861, Victoria ia desende en lamenta e evita apares publica. El ia porta vestes negra per la resta de sua vive. Como la resulta de sua privatia, republicisme ia gania tempora la fortia, ma en la dui temprana de sua rena, sua popularia ia reveni. Sua aniversarios 50 e 60 (de oro e diamante) de sua rena ia es avenis de selebra nasional.

Sua rena de 63 anios e sete menses ia es plu longa ca lo de cualce de sua presedentes e es conoseda como la Eda Victorian. Lo ia es un periodo de cambia industrial, cultural, political, siensal, e militar en la Rena Unida, e ia es marcada par la estende grande de la Impero Brites. El ia es la monarca brites final de la dinastia de Hanover. Sua fio e susedor, Re Edward 7, ia comensa la dinastia de Saxe-Coburg e Gotha, la linia de sua padre.

La familia de Rea Victoria en 1846 par Franz Xaver Winterhalter. Sinistra a destra: Prinse Alfred e la Prinse de Cimri; la Rea e Prinse Albert; Prinsesas Alice, Helena, e Victoria