Natal

Natal es un festa anial a 25 desembre, cuando cristianes selebra la nase de Jesus Cristo. Lo es presededa par la saison de Ariva. La nara tradisional cristian, indicada en la Atesta Nova, dise ce Jesus ia nase en Bethlehem, seguente la predises maxial, cuando Josef e Maria ia ariva a la site, la oteles ia ave no salas libre e on ia ofre a los un stala do Cristo ia nase, con anjeles proclamante la novas a la pastores ci ia difusa plu la mesaje. La Dia de Natal es un festa nasional en multe nasiones de la mundo, es selebrada en modo relijiosa par la majoria de cristianes como ance en forma cultural par multe noncristianes, e formi un parte intera de la saison de festas.

An si la data de la nase de Jesus es nonconoseda, en la dui de la sentenio 4 la Eglesa Cristian Ueste ia loca Natal la 25 desembre, un data cual ta es adotada plu tarda par la Este. Oji, plu cristianes selebra la 25 desembre en la calendario gregorian, cual ia es adotada cuasi universal en la calendarios sivil en tota la mundo. An tal, alga Eglesas Cristian Este selebra Natal en 25 desembre de la calendario julian, cual oji es la 7 janero en la calendario gregorian, la dia a pos la Eglesa Cristian Ueste selebra la Epifania. Lo no es un desacorda sur la data de Natal, ma un prefere de cual calendario ta debe es usada per determina la dia de 25 desembre. Plu, per la cristianes, la crede ce Dio ia veni a la mundo en un forma umana per espia la pecas de la umania, en loca de la data esata de nase, es considerada la intende xef de selebra Natal.

La abituas de selebra liada a Natal en varia paises ave un misca de temas e orijinas precristian e cristian. La abituas popular de oji inclui donadas, completa un calendario de Ariva, musica cristian e cantas de natal, intercambia de cartas de natal e mostra de varia decoras de natal, como la arbores de natal, la luses de natal, garlandas, viscio e ilex.