Suomi (lingua)

Article bon
De Vicipedia

Suomi
suomen kieli
Parlada en: Suomi
Area:
Tota parlores: 5.4 milion
Familia: Linguas uralica
State ofisial
Lingua ofisial de:
Regulada par:
Sifras
ISO 639-1: fi
ISO 639-2: fin
ISO 639-3: [1]
SIL: [2]
Mapa
La areas en do lo es parlada
Vide ance: LinguaLista de linguas

Suomi es la lingua parlada par la majoria de la popla en Suomi, e par persones desendeda de suomis estra Suomi. Lo es un de la du linguas ofisial de Suomi e un lingua ofisial minor en Sveria. En Sveria, e suomi normal e meänkieli, un dialeto de suomi, es parlada. La lingua kven, un dialeto de suomi, es parlada en Noria norde.

Suomi es parlada par sirca sinco milion persones, la plu de ci abita en Suomi. On ave ance minorias en Sveria, Noria, Rusia, Esti, Brasil, Canada, e la SUA. Sirca 90% de la popla de Suomi parla suomi como sua lingua prima. La resta, sirca 5.5% parla svensce, sami, o otra linguas.

Suomi es un lingua ofisial de Suomi e de la Uni European.

Evolui[edita | edita la fonte]

Suomi es un membro de la familia de linguas finica (en la familia plu grande de linguas uralica) e es un lingua entre la fusante e la aglutinante. Lo altera e infleta nomes, ajetivos, pronomes, numeros, e verbos per indica sua roles en la frase. Lo mostra sua parteni con otra linguas finica en multe aspetas, incluinte estas:

  • sufisas de caso como la jenitiva '-n, la partitiva -(t)a / -(t)ä (de la uralica *-ta), la esesiva -na / -nä;
  • marcas de la plural -t e -i-;
  • sufisas de posese como -ni per la person prima singular (de uralica *-mi) e la person du singular -si (de uralica *-ti);
  • un cuantia de sufisas derivada;
  • multe parolas fundal con corespondes coerente de sonas con otra linguas uralica.

La teoria plu comun per la orijin de suomi e otra linguas finica es ce los veni de la foresta boreal sirca la Montes Ural e/o la curva de la Volga media.

La popla suomi es plu simil a sua visinas cual parla linguas indo-european ca la parlores de sua visinas cual parla sami. Un teoria sujesta ce la popla nativa cual parla un lingua finica ia asorbe un popla de parlores de indo-european cual ia migra a norde e cual adota la lingua finica.

La linguas finica ia evolui de la proto-finica pos cuando la sami ia separa de lo sirca 1500 - 1000 ace. teorias dise comun ce tre o plu dialetos ia evolui en la milenio prima. Ante la eda media, suomi ia es un lingua de parla, ma no de scrive. An pos la eda media, comersia nonlocal ia es conduida en deutx norde media, la lingua de governa ia es sveria, e avenis relijiosa ia es en latina. Suomi ia es sola usada en la vive local de la popla comun.

La esemplo prima conoseda de suomi es de esta eda e ia es trovada en un jornal de viaja de sirca 1450:

  • Mÿnna tachton gernast spuho somen gelen Emÿna daÿda
  • Suomi moderna: Minä tahdon kernaasti puhua suomen kieltä, [mutta] en minä taida
  • Elefen: Me desira parla suomi, ma me no es capas

Seguente la jornal, un bispo suomi ia es la fonte de esta sita, e lo ave alga eras cual indica un parlor nova. Alora, la prestas ia es, per la plu parte, parlores de svensce.

Varias de suomi[edita | edita la fonte]

La dialetos de suomi es divideda a du grupos, la ueste e la este. La dialetos es cuasi tota comprendable con lunlotra, e es distinguida par cambias minor de vocales, diftongos, e ritmo. Per la plu parte, la dialetos opera con la mesma fonolojia, gramatica, e vocabulo. On ave sola un poca de esemplos de sonas o construis gramatical cual es trovada en un dialeto e no en suomi normal. Du esemplos es la fricante dental vosida en la dialeto de Rauma, e la caso esesiva en la dialetos este.

On ave du varias de suomi usada tra la tota pais. La un es la lingua normal (yleiskieli), e la otra es la lingua parlada o comun (puhekieli). La lingua normal es usada en situas formal como parlas political e difusas de novas e es enseniada en la scolas. La lingua normal en sua forma scriveda, la lingua scriveda (kirjakieli) es usada en cuasi tota testos scriveda. La lingua parlada es la varia usada en televide e radio popular e a locas de labora.

Fonolojia[edita | edita la fonte]

Cualias distinguinte de suomi (ance trovada en otra linguas uralica) inclui armonia de vocales e un morfolojia aglutinante. La asentua es sempre a la silaba prima, ma no es multe forte. On ave oto vocales cual pote es corta o longa, indicada par dupli la letera. La colie de consonantes es alga peti e vose no es distinguinte. Consonantes, como vocales, pote es corta o longa, ance indicada par dupli la letera.

Frontal Dorsal
Nonronda Ronda Nonronda Ronda
Cluida i [i] y [y] u [u]
Media e [e] ö [ø] o [o]
Abrida ä {[æ] a [ɑ]


Labial Dental Alveolal Posalveolal
Palatal
Velal Glotal
Nasal m [m] n [n] [ŋ]
Plosive p [p] t [t] k [k] [ʔ]
Fricante s [s] h [h]
Prosiminte v [ʋ] l [l] j [j]
Vibrante r [r]

Armonia de vocales es un regula en suomi par cual la vocal prima de un parola determina si la otra vocales en la parola (incluinte sufisas) debe es frontal (i, e, ä, y, ö) o dorsal (a, o, u). Un otra regula morfofonetica es ce, si la consonante final es p, t, o k, lo es duplida per un o la otra de la radis nominativa o la radis oblica.

Gramatica[edita | edita la fonte]

Pronomes[edita | edita la fonte]

Pronomes personal[edita | edita la fonte]

La pronomes personal es sola usada per umanas. Estas esemplos es en la caso nominativa:

Pronomes personal
Suomi Elefen
Singular
minä me
sinä tu
hän el
Plural
me nos
te vos
he los
Cortes
Te tu

Car la verbos conteni inflexas per person e numero, la pronomes usada per la sujeto no es nesesada, e la person prima e du es plu comun ometeda en suomi formal, estra per asentua. En suomi comun, tota pronomes es plu comun usada. Per la person tre, la pronom es nesesada en ambos suomi formal e suomi comun.

En suomi comun, la pronomes se e ne es comun usada per person tre, singular e plural. Simil, e es usada per minä e sinä

Pronomes de mostra[edita | edita la fonte]

Pronomes de mostra es usada per cosas nonumana, estra ce se e ne es usada en suomi comun.

Pronomes de mostra
Suomi Elefen
Singular
tämä esta
tuo acel
se lo, acel
Plural
nämä estas
nuo aceles
ne los, aceles

Pronomes de demanda[edita | edita la fonte]

Pronomes de demanda
Suomi Elefen
kuka ci
mikä cual
ken ci (parola antica o dialetal)
kumpi cual (de du)
kumpainen cual (de du) (parola antica o dialetal)

Pronomes de relata[edita | edita la fonte]

Pronomes de relata
Pronom Esemplo Elefen
joka (refere a la parola a ante) hän on ainoa, jonka muistan el es la sola person ci (me) recorda
mikä (refere a la proposa o frase a ante o a un pronom o superlativa cual refere a un cosa) se on ainoa asia, minkä muistan lo es la sola cosa cual (me) recorda

Pronomes mutual[edita | edita la fonte]

Pronomes mutual
Pronom Esemplo Elefen
toinen he rakastavat toisiaan los ama lunlotra
he rakastavat toinen toistaan los ama lunlotra

Pronomes refletante[edita | edita la fonte]

Pronomes refletante
Pronom Sufisa Esemplo Elefen
itse plu la sufisa de posese corespondente keitin itselleni teetä (me) fa alga te per me mesma

Pronomes nondefininte[edita | edita la fonte]

Un grupo grande de pronomes es la pronomes nondefininte. Suomi no ave pronomes negativa; en loca, la pronom positiva es negada con la verbo de nega ei. Duple negas no es permeteda.

Pronomes nondefininte
Suomi Elefen
joka (noninfletada) cada
jokainen cada cosa, cadun
joku alga cosa, algun
jompikumpi la un o la otra
jokin (animal, cosa)
kukin cadun
kumpainenkin ambos (antica o dialetal)
kumpikin ambos
mikin cada cosa (dialetal)
kenkään cadun (antica o poesial)
kukaan (nom.), kene+..+kään (oblica) cadun
ei kukaan nun
kumpikaan la un o la otra
ei kumpikaan no la un o la otra, nun
mikään cualce cosa -> ei mikään = no cosa
mones (nom.), monente- (oblica) la pronom ordinal (represente prima, numero du, etc)

Nota ce cada pronom nesesa sufisas de caso. Elefen no ave un cosa egal a mones. La plu prosima ta es "la loca en un ordina".

Alga ajetivos nondefininte es comun videda como pronomes:

Ajetivos nondefininte
Suomi Elefen
ainoa la sola
eräs alga cosa o algun spesifada
harva poca
itse (nonmutual) la mesma
kaikki tota
molemmat ambos
moni multe
muu otra
muutama alga, un poca
sama la mesma
toinen (nonmutual, nonumeral) un otra

Nomes[edita | edita la fonte]

La lingua suomi no distingui entra mas e fem o otra distinguis de seso, an en la pronomes personal. Per esemplo, hän es mas o fem, dependente a lo cual on refere.

Casos[edita | edita la fonte]

Suomi ave 15 casos de nomes: cuatro casos gramatical, ses casos de loca, du casos de rol (o tre, en alga dialetos este), e tre casos de asosia. Nota ce un parola en un caso de loca altera un verbo, no un nom.

Casos suomi
Caso Sufisa Preposada en elefen Esemplo Tradui a elefen
Casos gramatical
Nominativa (Sujeto) - - talo casa
Jenetiva (Caso de posese) -n de talon de un/la casa
Acusativa (Ojeto) -, -t, -n - talo / talon casa
Partitiva -(t)a - taloa casa (como un ojeto)
Casos de loca (interna)
Inesiva -ssa en talossa en un/la casa
Elativa -sta de (en) talosta de un/la casa
Ilativa -an, -en, etc a (en) taloon a en un/la casa
Casos de loca (esterna)
Adesiva -lla a, sur talolla a un/la casa
Ablativa -lta de talolta de un/la casa
Alativa -lle a talolle a un/la casa
Casos de rol
Esiva -na como talona como un/la casa
Esesiva -nta de es talonta de es un/la casa
Translativa -ksi a la rol de taloksi a es un/la casa
Casos de asosia
Instrutiva -n con la aida de taloin con la aida de un/la casa
Abesiva -tta sin talotta sin un/la casa
Comitativa -ne- con taloineen con la casa/casas

Nota ce un nom en la comitativa es sempre seguente par un sufisa de posese, ma un ajetivo no es tal: Mies ylellisine taloineen, "un om con sua casa/casas lusosa". Ance sola la acusativa de pronomes difere de la nominativa o jenetiva: minut, la forma acusativa de minä, "me"

Plurales[edita | edita la fonte]

Suomi ave tre plurales:

La plural nominativa es la plural definida. La sufisa es -t e lo pote aveni sola en la loca final de la parola, pd, lo es cadeda cuando un sufisa de posese aveni ance.

Plural nominativa
Suomi Elefen
koirat olivat huoneessa la canes ia es en la sala
huoneet olivat suuria la salas ia es grande

Pos numeros plu ca un en la nominativa singular, la nom reseta la partitiva singular. Estra esta, la nom e la numero acorda la un con la otra en numero e caso.

Seguente numeros
Suomi Elefen
huoneessa oli kaksi koiraa on ia ave tre canes en la sala
talossa oli kolme huonetta la casa ia ave tre salas
ostin tietokoneen tuhannella eurolla me ia compra un computador per mil euros
tarvitsen kahdet kengät me nesesa du duples de sapatos

La plural infletada usa la radis de la plural partitiva con la mesma finis como la nomes singular. La sufisa es -i-, e vocales longa es supresada; lo pote aveni sola ante un otra sufisa.

Plural infletada
Suomi Elefen
huonehuoneita alga salas
huoneissa en salas

Casos de pronomes[edita | edita la fonte]

La pronomes personal es infletada en la mesma modo como nomes, e pote es trovada en la plu de la mesma casos como nomes. Per esemplo:

Infleta de pronomes
Suomi Caso Esemplo Elefen
minä nominativa me vade a la site
minun jenitiva tämä talo on minun esta casa es de me
tämä on minun taloni esta es me casa
minut acusativa hän tuntee minut el conose me
minua partitiva hän rakastaa minua el ama me
minussa inesiva tämä herättää minussa vihaa esta velia la coleria en me
minusta elativa hän puhui minusta el ia parla de/sur me (ance usada per "en me opine")
minuun ilativa hän uskoi minuun el fide en me
minulla adesiva minulla on rahaa meave alga mone
minulta ablativa 'hän otti minulta rahaa el prende alga mone de me
minulle alativa anna minulle rahaa dona alga mone a me
sinuna esiva sinuna en tekisi sitä si me ia es tu, me no ta fa lo (leteral "como tu...")
minuksi translativa häntä luullaan usein minuksi el es comun malpersepida per me

Ajetivos[edita | edita la fonte]

Ajetivos en suomi es infletada en la mesma modo esata como nomes, e un ajetivo debe acorda en numero e caso con la nom lo altera. Per esemplo, asi es alga ajetivos

Suomi Elefen
iso grande
pieni peti
punainen roja

E asi es alga esemplos de ajetivos infletada per acorda con se nomes:

Suomi Elefen
iso-n talo-n edessä ante la casa grande
kaksi pien-tä talo-a du casas peti
punaise-ssa talo-ssa en la casa roja

Nota ance ce la ajetivos ave la mesma tipos de cambias de radis como la nomes.

Compara de ajetivos[edita | edita la fonte]

La compara de un ajetivo es formida par ajunta -mpi a la radis. Per esemplo:

Suomi Elefen Suomi Elefen
iso grande iso-mpi plu grande
pieni peti piene-mpi plu peti
punainen roja punaise-mpi plu roja

Car un ajetivo comparante es ancora un ajetivo, lo debe es infletada per acorda con se nom. Per crea un radis per la forma de compara, la -mpi perde se i final. Si la contesto silabal nesesa un consonante debil, la -mpi deveni -mm-. Alora -a- es ajuntada ante la sufisa de caso (o -i- en la plural). Per esemplo:

Suomi Elefen
iso-mma-n talo-n edessä ante la casa plu grande
kaksi piene-mpä-ä talo-a du casas plu peti
punaise-mma-ssa talo-ssa en la casa plu roja
punaise-mmi-ssa taloi-ssa en la casas plu grande

La superior de ajetivos[edita | edita la fonte]

La forma superior de ajetivos es creada par ajunta -in a la radis. Per esemplo:

Suomi Elefen Suomi Elefen
iso grande iso/in la plu grande
punainen roja punais-in la plu roja
pieni peti pien-in la plu peti (no *pienein)

Como la forma de compara, la forma superior debe es infletada per acorda con se nom. La -in deveni o -imma- o -impa (plural -immi o -impi):

Suomi Elefen
iso-imma-n talo-n edessä ante la casa plu grande
kaksi pien-in-tä talo-a la du casas plu peti
punais-imma-ssa talo-ssa en la casa plu roja
punais-immi-ssa taloi-ssa en la casas plu roja

Averbos[edita | edita la fonte]

Un modo comun per crea averbos es par ajunta la sufisa -sti a la radis de un ajetivo:

Averbos
Suomi Elefen
nopeasti rapida
kauniisti bela
hitaasti lente
helposti fasil

Averbos altera verbos, no nomes, e donce los no infleta.

Compara de averbos[edita | edita la fonte]

On formi la compara de un averbo con la sufisa -mmin:

Compara
Suomi Elefen
nopeasti, nopeammin rapida, plu rapida
kauniisti, kauniimmin bela, plu bela
hitaasti, hitaammin lenta, plu lenta
helposti, helpommin fasil, plu fasil

La superior de averbos[edita | edita la fonte]

La forma superior de la averbo ave la sufisa -immin:

Superior
Suomi Elefen
helposti, helpommin, helpoimmin fasil, plu fasil, la plu fasil

Posposadas e preposadas[edita | edita la fonte]

Posposadas es plu comun en suomi ca preposadas.

Posposada indica loca, tempo, causa, resulta, o relata. La nom es plu comun en la forma de posese:

Posposadas
Suomi Elefen
pöydän alla su la table
joulun jälkeen pos Natal
lasten tähden per la enfantes
jonkun puolesta per of algun

Como con verbos, la pronom no pote es cadeda en la person tre, singular o plural:

  • Olin mukanasi - me ia es con tu
    • Olin hänen mukanaan - me ia es con el
  • Tulen mukaanne - me va vade con vos
    • Tulen heidän mukanaan" - me va vade con los

On ave alga preposadas importante en suomi. En formulas preposadal, la nom es sempre en la partitiva:

Preposadas
Suomi Elefen
ennen joulua ante Natal
ilman sinua sin tu

Alga posposadas pote es ance usada como preposadas:

  • kylän keskelläkeskellä kylää (en la media de la vileta)

Verbos[edita | edita la fonte]

Verbos en suomi es normal divideda entre sete grupos, dependente de la tipo de radis. Tota sete tipos ave la mesma finis, ma la radises ave alga diferes (no grande) cuando infletada

On ave poca verbos noncoerente en suomi. Sola olla (es) ave du formas noncoerente, la singular on e la plural ovat. Otra formas segue de la radis ole-/ol-, pe olet derivada de ole+t (tu es), olkoon, de ol-koon (lasa lo es), etc. Un poca de verbos, como nähdä (vide), tehdä (fa, fabrica), e juosta (core) ave mutas rara de consonantes no derivable de se infinitiva. En suomi como comun parlada, alga verbos comun (mennä, tulla, olla, panna) ave radises noncoerente (mee, tuu, oo, paa, en loca de mene, tule, ole, pane - vade, veni, es, pone en esta ordina).

Suomi no ave un verbo unica per posese (como "ave" en lfn). Posese es indicada en otra modos, per la plu parte par jenitivas e proposas de esisite. Per posesores animada, la caso adesiva es usada con olla, pe koiralla on häntä (la can ave un coda), leteral "sur la can es un coda". Esta es simil a la formas usada en eres e cimri, como "es un famia sur me".

Formas de tempo e aspeta[edita | edita la fonte]

Verbos suomi ave formas per presente, nonperfeta, perfeta, e pluperfeta:

  • Presente (nonpasada): usada per presente e futur. Per la futur, un averbo de tempo ta es ajuntada per evita ambiguia. La presente es formida sola par la usa de la sufisas de person, pe, otan (me prende), de ottaa (prende).
  • Nonperfeta: vera la pasada, ma nomida la nonperfeta per razonas istorial. Lo es formida con la sufisa -i- con la sufisa de person, pe, otin (me ia prende).
  • Perfeta: coresponde a la perfeta de engles, ma pote indica ance un ata pasada con afetas en la presente. Lo usa la verbo olla (es) en la presente como un verbo aidante. Sufisas personal es ajuntada a la aidante, en cuando la verbo major usa la forma partisipial con -nut/-nyt. Per esemplo, olen ottanut (me ia prende ja), con ole- per la verbo aidante, -n per la sufisa personal (me), otta- per la verbo major, e -nut per marca la partisipio. Alga linguistes opine ce esta forma es derivada de la linguas germanica.
  • Pluperfeta: coresponde a la pasada perfeta de engles ("I had visited"). Lo usa la verbo olla en la pasada como un verbo aidante, pe, olin ottanut (me ia prende ja).

Voses[edita | edita la fonte]

Suomi ave du voses per verbos: ativa e pasiva.

La pasiva en suomi es unipersonal, cual es per dise, lo apare sola en un forma, sin regarda ci fa la ata. On pote vide lo como un "person cuatro", car lo no inclui un modo de refere a un ajento spesifada. La usa de la vose pasiva no es tan comun en suomi ca in otra linguas, e la vose ativa es prefereda.

Per esemplo: talo maalataan (la casa va es pintada) no ave un modo simple per indica la person ci pinta (la casa va es pintada par Jim. On pote usa un parola toimesta (par la ata de), un imita de svensce, pd talo maalataan Jimin toimesta (la casa va es pintada par la ata de Jim), ma lo no es videda como un espresa normal. Par tradision, un proposa pasiva no ave tecnical un sujeto.

En suomi comun, la pasiva es usada en loca de la person un plural en la indicativa e la imperativa, pd, me mennään (nos vade) e mennään! (ta ce nos vade).

En frases de "person zero", indicada en lfn par la pronom "on", usa ance la pasiva:

  • Saunassa hikoilee - en la sauna, on sua
  • Jos tulee ajoissa, saa paremman paikan - Si tu ta ariva temprana, on ta prende un seja plu bon

La modo indicativa[edita | edita la fonte]

La indicativa es la forma de la verbo usada per declaras o demandas. La conjuga es cuasi regulal. Per esemplo, per "puha" (parla):

Sufisas verbal de person
Person Sufisa Esemplo
Singular
1 minä -n puhun
2 sinä -t puhut
3 hän -u puhuu
Plural
4 me -mme puhumme
5 te -tte puhutte
6 he -vat puhuvat

Per forma la negativa, on usa en, et, ei, emme, ette, eivät, ante puhu.

Per la nonperfeta, on usa puhu + -i- + -n, -t, -u, etc.

Per la nonperfeta negativa, on usa en, et, ei, etc, ante puhu- + ...

  • 1, 2, 3 -nut
  • 4, 5 - neet
  • 6 -ttu

Per la pluperfeta, on usa olin, olit oli, olimme, olitte, olivat, ante puhunut.

Per la pluperfeta negativa, on usa en, etc ante...

  • 1, 2, 3 ollut
  • 4, 5, 6 olleet

... ante puhunut.

La modo ipotesal[edita | edita la fonte]

La ipotesal espresa la idea ce la ata o state indicada par la verbo es posible ma no serta. Lo es usada en suomi en frases dependente (pe, "me ta dise lo a tu si me ta recorda") e en demandas cortes (pe, "me ta gusta alga cafe"). En suomi, la modo ipotesal debe es usada en ambos proposas de la frase:

  • ymmärtäisin jos puhuisit hitaammin = me ta comprende si tu ta parla plu lente

En la morfolojia de suomi, la ipotesal ave isi entre la radis e la fini personal:

  • tiedän = me sabe, tietäisin = me ta sabe.
  • haluan = me desira, haluaisin = me ta desira

Formas ipotesal esiste per voses ativa e pasiva, e per tempos presente e perfeta.

La modo imperativa[edita | edita la fonte]

La modo imperativa (modo de comanda) es usada per espresa comandas. Lo ave sola un tempo (la presente-futur), ma pote varia per alga otra casos:

  • la person un, du, o tre
  • la singular o plural
  • la vose ativa o pasiva
  • la positiva o negativa

La imperativa ativa per person du (pe "fa lo!" o "no fa lo!") es la tempo presente sin alga fini personal (pd, sutrae la -n de la person prima singular, etc)

Suomi Elefen
tule! veni!
syö! come!
huomaa! nota!

Per fa esta negativa, älä es ajuntada ante la forma positiva:

Suomi Elefen
älä sano! no dise!
älä mene! no vade!
älä valehtele! no menti!

Per la plural, ajunta -kaa o -kää a la radis:

Suomi Elefen
tulkaa! veni!
juokaa! bevi!
mitatkaa! mesura!

Per fa esta negativa, älkää es ajuntada ante la forma positiva, e la sufisa -ko o -kö es ajuntada a la verbo:

Suomi Elefen
älkää sanoko! no dise!
älkää menkö! no vade!
älkää tarjotko! no ofre!

Suomi no ave un espresa simil a "per favore". La egal es ce on usa o ole hyvä o olkaa hyvä ("es bon..."), ma lo es normal oblida. Cortesia es normal indicada par la tono de la vose, espresas de la fas, e la usa de verbos dependente e nomes partitiva. Per esemplo, voisitteko sinifia "tu ta pote...", pe voisitteko auttaa "ta ce tu pote aida me, per favore?"

Ance, otra espresas (no tan cortes) pote es ajuntada a imperativas: Menes sinifia la espeta, pd, la demanda no nesesa discute; menepä ave la -pa, cual indica insiste; e menehän ave la -hän cual indica sertia.

Imperativas pasiva:

Suomi Elefen
tehtäköön ta ce (alga cosa) es fada
älköön tehtäkö ta ce (alga cosa) no es fada
olkoon tehty ta ce (alga cosa) ia es fada ja
älköön olko tehty ta ce (alga cosa) no ia es fada ja

Imperativas en la person tre:

Suomi Elefen
olkoon permete ce el resta
tehkööt permete ce los fa
älköön unohtako no permete ce el oblida, ta ce el no oblida
älkööt unohtako no permete ce los oblida, ta ce los no oblida

Imperativa en la person un:

Suomi Elefen
menkäämme ta ce nos vade
älkäämme tehkö ta ce nos no fa, lo ta es plu bon si nos no fa

Esta sona antica, e un forma de la indicativa pasiva es comun usada en loca: mennään! = ta ce nos vade!

The optative mood is an archaic or poetic variant of the imperative mood that expresses hopes or wishes. It is not used in normal language.

La modo optativa es un varia antica o poesial de la modo imperativa cual espresa esperas o desiras:

Suomi Elefen
ollos o, si tu ia ta es!

La modo potential[edita | edita la fonte]

La modo potential es usada per espresa ce la ata o state es posible ma no serta. Lo es cuasi rara en suomi moderna. La forma es normal fada par ajunta -ne entre la radis e la fini personal. Lo esiste per la voses ativa e pasiva, e per la tempo presente e perfeta:

Suomi Elefen
lienen cisa me es
pessee cisa el lava
korjannee cisa el repara
surrevat cisa los lamenta o va lamenta
se pestäneen probable lo va es lavada (par algun)
lienette nähneet cisa tu ia vide
ei liene annettu cisa lo no ia es donada (par algun)


La modo eventiva[edita | edita la fonte]

La eventiva no es usada en suomi moderne, ma pote es trovada en la Kalevala. Lo es un combina de la potential e la dependente.

Suomi Elefen
kävelleisin Probable me ta pasea

Infinitivas[edita | edita la fonte]

Verbos suomi ave cuatro infinitivas:

La infinitiva prima es usada en la disionarios suomi. Lo es marcada par la sufisa -a o , a alga veses con alteras. Lo ave sola formas ativa.

Suomi Elefen
sanoa dise
tietää sabe
lukea leje
tuoda trae
imuroida suca (polvo)
mennä vade
olla es
purra morde
pestä lava
mainita ' nota

La infinitiva du es usada per espresa aspetas de atas en relata a la tempo o la modo de la ata. Lo es formida par ajunta e en loca de a/ä. Acel es segueda par alga sufisas de caso.

Suomi Elefen
Ativa Inesiva
tehdessä en fa
sanoessa en dise
Ativa Inesiva con Sufisa de Posese
lukiessaan en cuando el (ia) leje
sanoessasi en cuando tu (ia) dise
Pasiva Inesiva
sanottaessa en es diseda
tehtäessä en es fada
luettaessa en es lejeda
Ativa Instrutiva
tehden par fa
sanoen par dise
lukien par leje
hän tuli itkien huoneeseen el veni en la sala en plora

La forma inesiva es videda plu en suomi scriveda. Suomi parlada espresa comun la mesma idea par usa du proposas juntada par kun (cuando). La instrutiva es an plu rara e es normal espresada par espresas como toisin sanoen (en otra parolas).

La infinitiva tre es simil a la jerundio en engles (la forma de -ing), e ata como un nom cual pote es infletada en alga casos. Lo es ance usada per refere a un ata spesifada o la ves de la ata. Lo es fada par usa la radis "forte" de la verbo e ajunta ma segueda par la caso.

Caso Suomi Elefen
inesiva lukema-ssa (en la ata de) leje
Esemplo: hän on lukema-ssa kirjasto-ssa el leje en la biblioteca
elativa lukema-sta veni de leje
ilativa lukema-an vade a o intende leje
adesiva lukema-lla par leje
abesiva lukema-tta sin leje

La infinitiva tre es normal sustituida par la infinitva prima en suomi moderne.

La infinitiva cuatro es rara aora. Lo es formida par ajunta minen. Aora, on usa plu comun parolas como pitää e täytyy cual ave la mesma sinifia. Per esemplo:

  • Sinne ei ole menemistä (On debe no vade ala)

Un plu comun usa de -minen no es un infinitiva ma un nom verbal cual dona la nom de la ata cual la verbo descrive. Lo pote es infletada como cualce otra nom.

Suomi Elefen
lukeminen on hauskaa leje es divertinte
vihaan lukemista me odi leje
nautin lukemisesta me gusta leje

On ave un infinitiva sinco cual es multe rara, e cual ave la sinifia "es a punto de...". Per esemplo:

  • olin lukemaisillani (me ia es a punto de leje)

Partisipios[edita | edita la fonte]

Verbos suomi ave partisipios en la tempos pasada e presente e la voses ativa e pasiva, e un partisipio per la ajente. Los pote aseta un ojeto.

La partisipio pasada pasiva:

  • lähde-tty-ä-si kotiin – pos (ce tu ia) vada a casa

La partisipio pasada ativa – -nut/-nyt:

Infinitiva Partisipio
puhua puhunut
syödä syönyt
mennä mennyt
pestä pessyt
harjoitella harjoitellut
haluta halunnut
tarvita tarvinnut
rohjeta rohjennut

La partisipio presente pasiva – -a/-ä:

Infinitiva Partisipio Elefen
antaa annettava cual va es donada, cual debe es donada, cual es donable
syödä syötävä cual va es comeda, cual debe es comeda, cual es comable
kertoa kerrottava cual va es diseda, cual debe es diseda, cual es disable

Otra esemplos:

  • Juotava vesi – Acua bevable Drinkable water
  • Onko sinulla mitään sanottavaa? – Esce tu ave cualce cosa per dise?
  • Onko pöydässä jotakin syötävää? – Esce cualce cosa per come a la table?
  • Minun on lähdettävä – Me debe departi
  • Heidän olisi mentävä – Los ta debe vade
  • Onko Pekka tavattavissa? – Esce Pekka es disponable/encontrable?

Partisipio presente ativa – -va/-vä:

Suomi Elefen
nukku-va koira can dorminte
häikäise-vä valo lus siecante
olin luke-v-i-na-ni me ia finge leje

La partisipio de la ajente:

Esta es formida como la infinitivo tre, par ajunta -ma o -mä a la radis. Per esemplo:

Suomi Elefen
ihmisen tekemä muodostelma un forma creada par umanas
tytön lukema kirja la libro lejeda par la xica
tytön lukemassa kirjassa en la libro lejeda par la xica

Nega de verbos[edita | edita la fonte]

Indicativa presente: Per esta, on usa un verbo de nega ante la verbo en la tempo presente:

Suomi Elefen Suomi Elefen
tiedän me sabe en tiedä me no sabe
tiedät tu sabe et tiedä tu no sabe
tietää el sabe ei tiedä el no sabe
tiedämme nos sabe emme tiedä nos no sabe
tiedätte vos sabe ette tiedä vos no sabe
tietävät los sabe eivät tiedä los no sabe

Per la nega de la presente pasiva, on usa la person tre singular de la verbo de nega e la presente pasiva de la verbo con la -an sutraeda:

Suomi Elefen
ei puhuta lo no es diseda
ei tiedetä lo no es conoseda

La nega de la indicativa nonperfeta es la verbo de nega segueda par la partisipio pasada ativa:

en puhunut me no ia parla
et puhunut tu no ia parla

La nega de la nonperfeta pasiva es formida con la verbo de nega e la partisipio presente pasiva:

ei puhuttu lo no ia es diseda
ei tiedetty lo no ia es conoseda

Ordina de parolas[edita | edita la fonte]

Car suomi es un lingua infletada, la ordina de parolas en frases pote es multe plu libre ca, per esemplo, elefen. En elefen, la ordina forte de sujeto-verbo-ojeto indica la rol de un nom como sujeto o ojeto. En suomi, la rol de la nom es indicada par marcas de caso cual indica sujeto e ojeto. An si la ordina la plu "neutral" en suomi es sujeto-verbo-ojeto, la tema de la frase es plu comun a la comensa.

Suomi Elefen Esplica
koira puri miestä la can morde la om nos parla sur la can e lo cual el ia fa
miestä puri koira la om ia es mordeda par un/la can nos parla sur la om e lo cual ia morde el, pe, no un serpente
koira miestä puri la can morde la om nos parla de la atas de la can en un modo cuasi poesial
Suomi Elefen Esplica
minulla on rahaa me ave mone un declara simple de un fato
rahaa minulla on mone es alga cosa ce me ave ... an si me pote no ave alga otra cosa
rahaa on minulla la mone es con me me dise a tu do la mone es
minulla rahaa on me ave serta (la) mone me confirma ce me ave (la) mone
on minulla rahaa si, me ave (la) mone si la posese de mone ia es dutada

Frases de esiste[edita | edita la fonte]

Esta es frase cual introdui un sujeto nova. Los comensa comun con "lo es" o "on ave" en elefen. La loca de la cosa nova veni prima, segueda par la verbo stativa, segueda par la cosa se mesma.

Suomi Elefen
huoneessa on sänky on ave un leto en la sala
siellä seisoi mies ala (en/estra) sta un om

Demandas[edita | edita la fonte]

On ave du modos per formi demandas: la usa de un parola de demanda, o la ajunta de la sufisa -ko/-kö a un de la parolas de la frase. Un parola de demanda veni prima en a frase, e un parola con la sufisa de demanda es ance moveda a la comensa:

Suomi Elefen
mikä tämä on? cual es esta?
tämä on kirja esta es un libro
onko tämä kirja? esce esta es un libro?
tämäkö on kirja? esce esta es un libro?
kirjako tämä on? esce esta es un libro?
eikö tämä ole kirja? esce esta no es un libro?

Per responde a un demanda, on usa plu comun la mesma strutur como la demanda. La responde a demandas de "si" o "no" en lfn es normal fada par repete la verbo en se forma de afirma o nega:

Suomi Elefen
mihin päin ne lähtee? en cual dirije los vade?
Helsinkiin a Helsinki
onko sinulla avain? esce tu ave la clave?
on/ei ole si/no (leteral: ave/no ave)
menettekö leffaan? esce vos vade a la sinema?
menemme/emme mene si/no (leteral: nos vade/nos no vade)
aiotko lähteä ilman pipoa? Esce tu intende vade sin un xapo?
aion si (leteral: me intende)

Vocabula[edita | edita la fonte]

La usa de sufisas[edita | edita la fonte]

An si lo ave poca radises (en compara con linguas como engles o elefen), suomi usa multe sufisas per crea plu parolas. Per esemplo, on pote comensa con la parola kirja (libro), e crea esta parolas:

  • kirjain – un letera de alfabeta
  • kirje – un letera de coresponde
  • kirjasto – un biblioteca
  • kirjailija – un autor
  • kirjallisuus – leteratur
  • kirjoittaa – scrive
  • kirjoittaja – scrivor
  • kirjuri – scriviste
  • kirjallinen – en la forma scriveda
  • kirjata – scrive, rejistra, recorda
  • kirjasin – un tipo de letera

Esemplos de sufisas:

  • -ja/jä: -or, ajento, un ci fa (lukea – leje → lukija – lejor).
  • -lainen/läinen: -an, -es, etc, abitor de. (Englanti – Englandenglantilainen – engles; Venäjä – Rusia → venäläinen – rusce).
  • -sto/stö: colie de (kirja – un libro → kirjasto – un biblioteca; laiva – un barcon → laivasto – marina).
  • -in: -ador util o strumento (kirjata – arcivi → kirjain – un letera de la alfabeta; vatkata – bate → vatkain – batador).
  • -uri/yri: -or, -ador, ajento o strumento (kaivaa – escava → kaivuri – escavador; laiva – un barcon → laivuri – barcor).
  • -os/ös: -da, resulta de un ata (tulla – veni → tulos – resulta; tehdä – fa → teos – un peso fabricada).
  • -ton/tön: sin alga cosa (onni – felisia → onneton – nonfelis; koti – casa propre → koditon – sin casa propre).
  • -llinen: -in, ave la cualia de alga cosa (lapsi – un enfante → lapsellinen – enfantin; kauppa – un boteca, comersa → kaupallinen – comersial).
  • -kas/käs: -in, ave la cualia de alga cosa (itse – se mesma → itsekäs – egoiste; neuvo – consela → neuvokas – recursosa).
  • -va/vä: -nte, -osa, fa o ave alga cosa (taitaa – es capas → taitava – capas; johtaa – gida → johtava – gidante).
  • -la/lä: -eria, un loca relatada a la parola major (kana – gal → kanala – galeria; pappi – un prete → pappila – preteria).

La sufisas de deriva per verbos es multe diversa:

  • hypätä – salta
  • hyppiä – es saltante
  • hypeksiä – salta asi e ala
  • hypäyttää – fa ce algun salta un ves
  • hyppyyttää – fa ce algun salta repetente (o tirani),
  • hyppyytyttää – fa ce algun fa ce un person tre salta repetente
  • hyppyytellä – fa, sin gol, ce algun salta repetente
  • hypähtää – salta subita
  • hypellä – salta repetente asi e ala
  • hypiskellä – es saltante repetente asi e ala
  • hyppimättä – sin salta
  • hyppelemättä – sin salta asi e ala

Un esemplo de la estende de la usa de sufisas de deriva e infleta:

  • istua – senta (istun me senta me)
  • istahtaa – sente per alga tempo
  • istahdan – me va senta per alga tempo
  • istahtaisin – me ta senta per alga tempo
  • istahtaisinko – esce me debe senta per alga tempo?
  • istahtaisinkohan – me demanda a me si me debe senta per alga tempo

La prende de parolas de otra linguas[edita | edita la fonte]

Tra la edas, la lingua suomi ia prende multe parolas de multe otra linguas, spesial la linguas indoeuropean visin. Alga linguistes sujeste ce sola sirca 300 parolas de la cor de la vocabula protouralica supravive en suomi. Plu, car la fonolojia e gramatica de suomi difere multe de los de la linguas indoeuropean, parolas prendeda comun es cambiada per acorda.

La parolas prima prendeda par la linguas uralica ia es de linguas indoeuropean temprana, incluinte de linguas irani, baltica, germanica, e slavica. Ance, parolas ia es prendeda de la linguas turcica. Alga parolas en suomi no esiste en otra linguas, incluinte otra linguas uralica. Linguistes divina ce los veni de un lingua paleoeuropean parlada en la area ante an la linguas uralica. Esemplos inclui jänis (lepra), musta (negra), mäki (colina), saari (isola), suo (pantan), e niemi (capo).

Esemplos de germanica inclui kuningas (re) e ruhtinas (prinse, nobil) de la germanica *kuningaz e *drihtinaz. Un otra esemplo es äiti (madre) de la goto aithei. La orijinal parola suomi - emo - aveni en contestos rara. Otra esemplos de linguas germanica e baltica es morsian (sposa nova), armas (cara), huora (puta). Esemplos de iranica antica inclui vasara (martel) de avestan vajra e orja (sclavo) de arya (om).

En la edas plu prosima, suomi ia prende multe parolas de svensce, incluinte multe parolas european. Suomi ia es poseseda par Sveria de la sentenio 12 e ia es sededa a Rusia en 1809. Lo ia reteni svensce como la lingua ofisial e de la clases alta a pos. Esemplos inclui laki (lege), lääni (provinse), piispa (bispo), peruna (patata), likka (de svensce flicka, xica).

Parolas de rusce es comun multe antica e donce difisil per reconose. Los inclui papu (fava), sini (blu), pappi (prete), raamattu (biblia). Ance, nota la parola per un reno mas en suomi es irvas, e lo en serbo-hravatsce es hirvas.

La plu resente, engles ia deveni la fonte de parolas nova, tra la filmas, musica, comersia, e la interede. Multe companias suomi, como Nokia, ia adota engles per se lingua franca. Esemplos de parolas adotada inclui deittailla (encontra, de engles "date"), pleikkari (Playstation), hodari ("hot dog" - paneta de salsix), hedari ("headache, headbutt" - dole de testa, colpa de testa)

Final, alga parolas es inventada cuando nesesada:

  • puhelin – telefon (de puhel- parla + -in sufisa strumental)
  • tietokone – computador (leteral, macina de data)
  • levyke – disceta (de levy disco + -ki sufisa diminuinte)
  • sähköposti – eposta (leteral, eletrica-posta)
  • linja-auto – bus (leteral, curso-auto)
  • muovi – plastic (parola inventada)

Tra tempo, esta formas sustitui per formas plu vea, como kompuutteri (computador) e kalkulaattori (calculador).

Espresas comun[edita | edita la fonte]

  • (hyvää) huomenta – (bon) matina
  • (hyvää) päivää – (bon) dia, (bon) posmediadia
  • (hyvää) iltaa – (bon) sera
  • hyvää yötä / öitä! – bon note
  • terve! / moro! – alo!
  • hei! / moi! – alo!
  • heippa! / moikka! / hei hei! / moi moi! – adio!
  • nähdään! – adio! (asta) alora! (leteral "nos (va) vide (la un la otra))
  • näkemiin – adio! (asta) alora! (leteral "(asta ce) nos vide (la un la otra))
  • hyvästi – adio! bon viaja
  • hauska tutustua! – encantada, encontra tu es me plaser
  • kiitos – grasias Thank you
  • kiitos, samoin – grasia, e la mesma a tu
  • mitä kuuluu? – como es tu? como tu vade? cual es nova? (leteral "cual tu oia?")
  • kiitos hyvää! – (me es) bon, grasias
  • tervetuloa! – bonveni!
  • anteeksi – pardona (me)
  • kyllä – si
  • joo – si (nonformal)
  • ei – no
  • en – me no, me no va, me no ta...
  • minä, sinä, hän (se) – me, tu, el/lo
  • me, te, he (ne) – nos, vos, los
  • (minä) olen – me es
  • (sinä) olet – tu es
  • (te) olette – vos es
  • (minä) en ole – me no es
  • (sinä) et ole – tu no es
  • yksi, kaksi, kolme – un, du, tre
  • neljä, viisi, kuusi – cuatro, sinco, ses
  • seitsemän, kahdeksan – sete, oto
  • yhdeksän, kymmenen – nove, des
  • yksitoista, kaksitoista, kolmetoista – desun, desdu, destre
  • sata, tuhat, miljoona – sento, mil, milion
  • (minä) rakastan sinua – me ama tu
  • kiitos – grasias
  • anteeksi – pardona
  • voitko auttaa – esce tu pote aida?
  • apua! – aida!
  • voisit(te)ko auttaa – esce tu pote aida?
  • missä ... on? – do es...?
  • olen pahoillani – pardona me
  • otan osaa – me simpatia
  • onnea – bon fortuna
  • totta kai / tietysti / toki – natural
  • pieni hetki / pikku hetki / hetkinen – un momento, per favore
  • odota – espeta
  • missä on vessa? – do es la saleta privata?
  • Suomi – Suomi
  • suomi / suomen kieli – la lingua suomi
  • suomalainen – suomi (person)
  • En ymmärrä – me no comprende
  • (minä) ymmärrän – me comprende
  • ymmärrät(te)kö suomea? – esce tu comprende suomi?
  • puhut(te)ko englantia? – esce tu parla engles?
  • olen englantilainen / amerikkalainen / kanadalainen / australialainen / uusiseelantilainen / irlantilainen / skotlantilainen / walesilainen / ranskalainen / saksalainen / kiinalainen / japanilainen / ruotsalainen – me es engles / american / canadian / australian / novazelandes / eres / scotes / cimri / franses / deutx / xines / japanes, nion / svensce
  • olet(te)ko englantilainen? – esce tu es engles?
  • missä (sinä) asut / missä (te) asutte? – do tu abita?

La prea de nos Padre[edita | edita la fonte]

 Isä meidän, joka olet taivaassa:
 Pyhitetty olkoon Sinun nimesi,
 Tulkoon Sinun valtakuntasi,
 Tapahtukoon Sinun tahtosi maan päällä niinkuin taivaassa.
 Anna meille tänä päivänä meidän jokapäiväinen leipämme.
 Ja anna meille meidän syntimme anteeksi,
 niinkuin mekin anteeksi annamme niille,
 jotka ovat meitä vastaan rikkoneet.
 älakä johdata meitä kiusaukseen,
 vaan päästä meidät pahasta,
 sillä Sinun on valtakunta,
 voima ja kunnia iänkaikkisesti.
 Aamen.