Razisme

De Vicipedia
Jump to navigation Jump to search
Un foto de un protesta contra integra de razas (Little Rock, Arkansas, SUA)

Razisme es la crede en la superioria de un raza supra un otra, cual resulta comun en distingui e prejudi a persones fundida sur sua raza o etnico.

La ideolojia su praticas raziste inclui comun la idea ce umanas pote es sudivideda entre grupos distinguable cual difere en sua condui sosial e sua capasias inata, en ajunta a la idea ce los pote es ordinada como inferior o superior. Esemplos istorial de razisme inclui la olocausto, apartait en Sudafrica, sclavia e separadisme en la SUA, e sclavia en America latina. Razisme ia es ance un aspeta de la organiza sosial de multe statos e imperos colonial.

An si la consetas de raza e etnico es videda como separada en siensa sosial moderne, la du termas ave un istoria longa e egalia in usa popular e leteratur plu vea de siensa sosial. "Etnico" es comun usada con un sinifia prosima a lo tradisional atribuida a "raza": la divide de grupos umana fundida sur cualias suposada como esensal o inata a la grupo (pe asendentes o condui compartida). Donce, razisme e distingui razal es comun usada per descrive distingui con un funda etnico o cultural, an si estas es descriveda como razal. Seguente un conveni de la Nasiones Unida sur distingui razal, lo es no difere entre la termas distingui "razal" e "etnical". La conveni conclui plu ca superioria fundida sur distingui razal es falsa seguente siensa, condenable seguente moralia, nonjusta sosial, e perilosa, e on ave no justi per distingui razal en cualce loca, en teoria o en pratica.

La ideolojia razal pote mostra se en multe aspetas de vive sosial. Razisme pote es presente en atas e pratisas sosial o en sistemes political (pe apartait) cual suporta la espresa de prejudi o averti. Atas sosial asosiada con razisme pote inclui nativisme, xenofobia, aliena, separadisme, ierarcias, supremisme, e simil fenomenos sosial.