Etrusca (lingua)

De Vicipedia
Italia, sirca sentenio 6 aec

La lingua etrusca ia es parlada e scriveda par la popla de la sivilia etrusca en la loca cual es aora Italia, en la area antica Etruria (aora Toscana, con Umbria ueste e Latium norde) e en partes de Lombardia, Veneto e Emilia-Romagna (do la etruscas ia es deslocada par la galos). La lingua ia es tota sustituida par latina, e sola alga documentos survive, con alga parolas emprestada a latina, como persona (de la etrusca φersu), e alga nomes de locas, como "Roma".

Alfabetisme etrusca ia es vasta a la costas de la Mediteraneo, mostrada par sirca 13 000 enscrives de sirca 700 aec. La etruscas ia ave un leteratur rica, notada par autores latina. Triste, sola un libro – aora nonlejable – ia survive. La lingua etrusca ia es sustituida par latina ante 100 ec. Sola alga romanes bon instruida ci ia es interesada par cosas antica, como Varro, ia pote leje etrusca. La person final ci ia pote leje etrusca ia es la imperor roman Claudio (10 aec – 54 ec), la autor de un trata en dudes volumes sur la etruscas, nomida Tyrrenikà aora perdeda. El ia scrive un disionario de etrusca par intervisa la poca campanianes vea ci ia pote parla ancora la lingua. Urgulanilla, la sposa prima de la imperor, ia es etrusca.

Livio e Cicero ia sabe ce la rituos de la relijio etrusca es codigida en colies diversa de libros scriveda en etrusca su la nom latina Etrusca disciplina. La sola libro survivente – Liber linteus – ia es scriveda sur stofa de lino, e ia survive sola car lo ia es usada como un envolvente per momias.

La lingua etrusca es difisil per analise car lo es un lingua solitar. Sua fonolojia ia es conoseda par causa de la alterna de leteras elinica e etrusca en alga enscrives, e multe parolas ia es conoseda par causa de emprestas de o a elinica e latina, e par esplicas de parolas etrusca par autores antica. La comprende de la lingua es ancora noncompleta.

La majoria de linguistes acorda ce etrusca es sola relatada a otra membros de la familia tirsenica, composada de etrusca, retica, e lemnian. Alga linguistes opina ce un otra relata posible es minoan. E alga pensa ce la linguas tirsenica es distante relatada a la linguas indoeuropean. Alga crede ce la etruscas ia es un popla de Anatolia (aora Turcia), e ce la lingua es cisa un varia de luvian (relatada a hitita) con influes de misian.

Sistem de scrive[edita | edita la fonte]

La scrive latina es derivada de la scrive etrusca, cual es derivada de la varia eubean de la alfabeta elinica. La etruscas ia ave un alfabeta de 26 leteras, ma no ia usa cuatro de los – b, d, g, e o. Los ia crea un letera per f.

La scrive ia es de destra a sinistra, estra en enscrives antica, cual usa a veses la metodo nomida bustrofedon (o boustrophedon, "como la bove", pd: alternante de destra a sinistra e de sinistra a destra). Orijinal, los no ia separa la parolas. De la sentenio ses aec, los ia usa un punto o punto duple. La etruscas no ia ave un sistem formal de scrive. Tota ia es scriveda como la scrivor ia pronunsia. Plu, multe enscrives usa cortis unica.

La parlores ia pone un asentua forte a la silaba prima de un parola, cual ia causa sincopa par debili de la vocales restante, cual ia es alora no representada en la scrive: pe: Alcsntre per Alexandro, Rasna per Rasena. Esta es un esplica de la "grupos de consonantes nonposible" de etrusca. Lo es ance posible ce la consonantes resonante ia deveni silabal.

Vocales: Etrusca no indica plu ca la cuatro vocales. La U ia es usada per transcrive ambos O e U de latina. A su es la trascrive tradisional, con la pronunsia AFI:

TT i e a u
AFI [i] [e] [ɑ] [u]

Consonantes: La leteras prima es la formas normal usada per transcrive etrusca; en la brasetas es la pronunsia en AFI. La consonantes distingui la esplodentes aspirada e nonaspirada, ma no esplodentes con vose. Per esemplo, la parola elinica thriambos ia deveni triumpus en etrusca (e alora triumphus en latina). Es posible ce la esplodentes aspirada ia es vera esplodentes palatal, sujestada par speles variante como amφare/amφiare, larθal/larθial, aranθ/aranθiia.

TT m n p φ t/d θ c/k/q χ z f s ś h l i v r
AFI [m] [n] [p] [ph] [t] [th] [k] [kh] [ts] [ɸ] [s] [ʃ] [h] [l] [j] [w] [r]

Gramatica[edita | edita la fonte]

Nomes en etrusca ave sinco casos, con singular e plural. La nominativa e la acusativa es combinada en nomes comun, ma no en pronomes. La sufisas per la casos es plu aglutinante ca infletante, e alga nomes ave du o an tre sufisas. Per esemplo, latina ave fili-us (nom. sing.), fili-i (nom. plur.), fili-is (dat. plur.), ma etrusca ave clan, clen-ar, e clen-ar-aśi. Ance, etrusca pote usa plu ca un sufisa de caso. Per esemplo, Uni-al-θi ("en la loca santa de Juno"), en cual -al es un sufisa jenitiva e -θies un sufisa locativa.

  • Nominativa/acusativa: Comun, la radis nonmarcada. Nomes de omes comun fini con -e (Hercle, Achle, Tite); nomes de femes en la otra vocales (Uni, Menrva, Zipu). La nomes de dios pote ance fini con -s (Fufluns, Tins) e otras (Aplu, Paχa, Turan).
  • Jenitiva: On ave du grupos, con sufisas en -s /-ś o con l. En alga casos, un vocal es ajuntada entre la radis e la sufisa. On ave un sufisa per la nom padral, -sa o -isa ("la fio de..."), ma la jenitiva pote servi ance asi. Per esemplo, Vel Avleś sinifia "Vel, fio de Avle", ma on pote usa ance Vel-uś Avles-la.
  • Dativa: La fini es -si, pe Tit-si.
  • Locativa: La fini es -θi, pe Tarχna-l-θi.
  • Pluralia: La fini pare es -ar. Clan (fio) deveni clenar (ance mostrante umlaut). La sufisas per casos otra ca nominativa es ajuntada pos la sufisa per pluralia.

Pronomes:

  • Personal: mi (me, nom.), mini (me, acc.), an (el), in (lo), un (? tu, acc), une (? tu, dat.).
  • Mostrante: ca, ta (esta, acel, sin distingui); ica, eca, ca, ita, ta (nom./acc. sing.), cei, tei (nom./acc. plur.); cla, tla, cal (jen. sing.), clal (jen. plur.); can, cen, cn, ecn, etan tn (acc. sing.), cnl (acc. plur.); calti, ceiθi, clθ(i), eclθi (loc. sing.), caiti, ceiθi (loc. plur.)

Ajetivos no es infletada, ma alga sufisas formi ajetivos de nomes:

  • Cualia: -u, -iu o -c. Pe, ais/ais-iu, "dio/divin"; zamaθi/zamθi-c, "oro/orosa."
  • Posese o refere: -na, -ne, -ni. Pe, paχa/paχa-na, "Baccho, bacchal"; laut/laut-ni, "familia/familial (servor)."
  • Colie: -cva, -chva, -cve, -χve, -ia. Pe, sren/sren-cva: "figur/figurida"; etera/etera-ia, "sclavo/sclavin"

Averbos no es marcada. Pe: etnam, "denova"; θui, "aora"; θuni, "a prima".

Verbos ia ave un modo indicante e un modo de comanda. La tempos ia es presente e pasada. La pasada ia ave un vose ativa e un vose pasiva.

  • Presente ativa: La radis o -a, sin distingui numero o person. Pe: ar, ar-a "tu/el/lo/nos/vos/los fa".
  • Pasada ativa: -ce o -ke produi la pasada ativa per la person tre. Esta no indica aspeta, pe: tur/tur-ce, "dona/ia dona"; sval/sval-ce "vive/ia vive".
  • Pasada pasiva: -che produi la pasada pasiva per la person tre. Pe: mena/mena-ce/mena-che, "ofre/ia ofre/ia es ofreda".

Vocabulo[edita | edita la fonte]

Sola alga sentos parolas de la vocabulo etrusca es conoseda con alga sertia. La parolas cual coresponde con formas indoeuropean es probable emprestas, a o de etrusca. Pe: neftś, "sobrino" es probable de latina (nepos, nepotis) e es conaseda con deutx Neffe e norsce vea nefi. A la min un parola es de la linguas semitica (arami o fenisia): talitha, "xica".

La numeros etrusca es conoseda, an si debate continua sur cual parola sinifia sinco e cual ses. Los indica clar ce etrusca no es un lingua indoeuropean:

  • 1 θu
  • 2 zal (esal)
  • 3 ci
  • 4 śa o huθ
  • 5 maχ
  • 6 huθ o śa
  • 7 semɸ (?)
  • 8 cezp
  • 9 nurɸ (?)
  • 10 śar

Nota ce linguistes no ia acorda regardante la nomes de 4 e 6.

Esemplos:

Etruscan LFN
Familia
apa padre (latina: pater)
apana padral
papa, papacs avo
ati, ativu madre
teta, ati nacna ava
pui, puia sposa
tusurθir sposa e sposo
clan fio
papals neto
sec, sech fia
ruva frate
neftś, nefś, nefiś sobrino (latina: nepos)
prumaθ, prumaθś, prumats, prumts dusobrino o duneto
nene madre de lete
snenaθ xica, camerada
hus joven
husiur enfantes
pava xico
taliθa xica (arami: talitha)
lautun, lautn jenera (grupo de familias)
lautni om libre
lautniθa, lautnita fem librida
etera, eteri stranjer, sclavo, cliente (elinica: ἑταῖροϛ)
Governa
Rasna Etrusca
meχl Rasnal Etruria
pes pais
tul petra
tular, tularu bordas
tular rasnal bordas publica
tular spural bordas de site
vaχr contrata
tuθiu, tuθi promete
tuθin, tuθina donada de dedica
meχ popla
meχl, meθlum nasion, popla
spur, śpur site, popla (latina: civitas, populus)
spureni, spurana sital
θruna monarcia
lucair rena (v)
lauχum re, prinse
lauχumna real, palasio
tenve, tenine, tenu, tenθas teni un posto
zil, zilac, zilc, zilaχ, zilaθ judor local (latina: praetor)
camθi judores local nonconaseda
ceχase
parniχ
macstreve
maru, marunu, marniu, marunuχ, maruχva
purθ, purθne
tamera
Tempo
tin- dia
θesan matina, dia
uslane a mediadia
tiur, tivr, tiu mense, luna
avil anio
ril a la eda de
Velcitna marto
Capr- april
Ampile maia
Acale junio
Hermi agosto
Celi setembre
χosfer otobre
Masan, Masn un de la mensas
Natur
anθa vento norde (latina: aquila)
arac falcon (cisa elinica: ἱέραξ)
arim simia
capu falcon
falatu sielo
hiuls bu
leu leon (latina: leo)
neri acua
pulumχva stelas
θamna cavalo
θevru bove mas (latina: taurus)
tiu luna
θi acua
usil sol (latina: sol)
vers- foco
Vasos
aska vaso elinica, vesica per vino (elinica: ἄσκος)
aska eleivana vaseta per olio de oliva
cape, capi carafa (posible latina: capio o capis)
capra vaso
cletram bol o sesto (umbrian: kletra)
culiχna calix (elinica: κύλιξ)
cupe copa, tas (elinica: κύπη o latina: cūpa)
leχtum botela (elinica: λήκυθоς)
leχtumuza botela peti
patna bol (elinica: πατάνη)
pruχ, pruχum bol per lava se (elinica: πρόχоυς)
qutun, qutum vaso de Laconia (elinica: κώθων)
qutumuza qutum peti
θafna calix
θina, tina deriva de θi "acua"
Verbos comun
am- es
cer- fa
tur- dona
ziχ- scrive