Anatolia

De Vicipedia
Jump to navigation Jump to search
La defini tradisional de Anatolia en Turcia moderna.

Anatolia es la penisola la plu ueste de Asia, a sude de la Mar Negra e a norde de la Mar Mediteraneo, cual formi la plu de Turcia moderna. Lo es ance conoseda como "Asia Minor", "Turcia Asian", "la penisola anatolian" o "la plano anatolian".

La rejion es bordada par la Mar Negra a la norde, la Mar Mediteraneo a la sude e la Mar Ejeo a la ueste. La Mar Marmara formi un lia entre la Mares Negra e Ejeo tra la Stretos Bosporo e Dardanelia, e separa Anatolia de Tracia sur la continente european.

Tradisional, on regarda Anatolia como estendente en la este asta un linia entre la Golfo Iskenderun e la Mar Negra asta la Montania Haiaren (Haiastan Major). Esta rejion es aora nomida e xef situada en la rejion Anatolia Este de la norde-este estrema de Turcia, e lo converje con la Caucaso – un area cual ia es asorbeda en la rejion Transcaucasia de la Impero Rusce en la sentenio 19. Tal, tradisional, Anatolia es la teritorio cual composa aprosima la du tris ueste de la parte asian de Turcia.

An tal, de pos la Jenoside Haiaren e la declara de la Republica Turces en 1923, la Montania Hairen es renomida como Anatolia Este par la governa turces, e on regarda comun Anatolia como sinonim con Turcia asian, cual formi cuasi la intera de la pais; sua bordas este e sude-este es jeneral suposada como egal a la fronteras turces con Sacartvelo, Haiastan, Azerbaidjan, Iran, Irac e Suria, en dirije de orolojo.

La abitores antica de Anatolia ia parla la linguas anatolian, aora estinguida, per cual la lingua elinica ia sustitui jeneral, comensnate en anticia clasica e continuante en la periodos eliniste, roman e bizantian. La turcesi de Anatolia ia comensa su la Impero Seljuk en la tarda de la sentenio 11, e ia continua su la Impero Osmanian entre la temprana de la sentenio 14 e la temprana de la 20. An tal, alga linguas nonturcica es ancora parlada oji par minorias en Anatolia, incluinte curdi, asirian, haiaren, arabi, laz, cartuli e elinica.