Tocipona

De Vicipedia
Jump to navigation Jump to search
Tocipona (Toki pona)
Creada par: Sonja Lang (Sonja Ellen Kisa a ante)
Anio: 2001
Tota parlores:
Familia: Linguas construida
Fonte:
State ofisial
Regulada par:
Sifras
ISO 639-1: [1]
ISO 639-2: [2]
ISO 639-3: [3]
SIL: [4]
Mapa
TokiPonaElopa.jpg
Mapa de Europa en tocipona.
Vide ance: LinguaLista de linguas

Tocipona (toki pona, "la bon parla") es un lingua creada estrema simple, con sola 120 parolas. Multe influeda par dauisme, lo usa la min per espresa la plu. Lo ia es desiniada en 1999 par Sonja Lang (nomida Sonja Elen Kisa a ante), un linguiste e traduor canadian, ci ia publici lo par interede en 2001. La libro ofisial defininte la lingua ia apare final en la media de 2014.

La parolas representa cosas fundal e universal de la vive umana. Combinas de parolas sujesta consetas plu complicada. An si multe frases es ambigua, la lingua es notable espresosa. Parlores nesesa considera multe la situa e redui ideas a sua esenses. Esta pote revela relatas interesante. Per esemplo, "ami" en tocipona es jan pona o "bon person". On vide ce "un mal ami" es un contradise.

Tu pote aprende tocipona con un curso scriveda en elefen.

Sonas[edita | edita la fonte]

Tocipona ave sola 14 sonas. On scrive los con leteras cual coresponde esata a simboles de la Alfabeta Fonetical Internasional:

a e i j k l m n o p s t u w

Car la lingua ave tan poca sonas, multe varias es permeteda. Per esemplo, on pote pronunsia p t k como b d g, o on pote pronunsia w como v.

Cuando n es segueda par p, on pronunsia mp. Simil, cuando n es segueda par k, on pronunsia ŋ.

On asentua cada parola a sua vocal prima.

Un silaba ave la forma CV[n]. La silaba prima de un parola no nesesa comensa con un consonante. Un silaba no pote fini con n si la silaba seguente (en la mesma parola) comensa con m o n. On no permete la silabas ji, jin, ti, tin, wo, won, wu, wun.

Parolas[edita | edita la fonte]

La plu parolas indica fundal un cualia. Otras indica fundal un ata.

pona es un esemplo de un parola cual indica un cualia. Lo es un ajetivo (o averbo) cual sinifia "bon" (o "simple", o "coreta", o un otra cualia simil bon). On pote usa lo como un nom per indica un bon person o cosa, o per la conseta de "bonia" (cual es vera un spesie de bon cosa). Plu, on pote usa lo como un verbo nontransitiva cual sinifia "es bon", e como un verbo transitiva cual sinifia "boni (alga cosa)".

toki es un esemplo de un parola cual indica un ata. Lo es un verbo transitiva cual sinifia "dise, parla". On pote usa toki sin ojeto, ma esta no cambia sua sensa. Plu, on pote usa lo como un nom per la ata de parla, o per la cosa diseda. E on pote usa lo como un ajetivo o averbo cual sinifia "pertinente a parla" o "parlante".

Ajetivos segue sempre la nom cual los descrive. Per esemplo, en toki pona, pona descrive toki. En fato, on pote comprende toki pona o como un formula de nom ("lingua simple") o como un formula de verbo ("(on) parla simple"), car averbos segue ance sua verbos.

Si on ajunta un ajetivo du, lo descrive la combina ja esistente. Per esemplo, toki pona mute sinifia "multe linguas simple". Per espresa "linguas multe simple", on dise toki pi pona mute ("linguas de multe bonia"). La parola pi es un preposada con un sensa estrema jeneral.

On espresa un nom propre como un nom comun segueda par un "ajetivo propre". Per esemplo, Sonja es jan Sonja (la person "Sonja"), Xina es ma Sonko (la tera "Jonguo"), e elefen es toki Elepen. Ajetivos propre es la sola parolas cual on scrive con un letera major.

Frases[edita | edita la fonte]

Un frase conteni un sujeto e un predica. On separa la du con li – ma on omete esta parola si la sujeto es mi ("me") o sina ("tu, vos"). La sujeto es un formula de nom, per esemplo toki pi pona mute. La predica pote comensa con un formula de verbo o un formula de nom. Con un formula de nom, on comprende ce la sujeto es la cosa indicada:

  • jan lili li lape. – La person peti (= la enfante) dormi. (lape es un verbo.)
  • jan lili li suli. – La enfante es (un person) grande (o importante). (suli es un nom.)
  • jan lili li moku. – La enfante come. / La enfante es (un esemplo de) comeda.

La problem de moku (en la esemplo a supra) aveni comun cuando la predica comensa con un parola cual es fundal un verbo. Un otra esemplo es mi toki, cual sinifia e "me es parlante" e "me es parlada, me es un lingua".

Un verbo transitiva ave un ojeto direta, cual on espresa como un formula de nom, poneda pos la formula de verbo, e separada de lo con e. On repete e si la verbo ave plu ca un ojeto. Simil, on repete li si on desira plu ca un predica:

  • mi moku e kili. – Me come frutas.
  • akesi ni li moku e kili e jan lili. – Esta lezardo come frutas e enfantes.
  • kili li pona li suwi. – La fruta es bon e dulse.

Un frase pote comensa con un (o plu ca un) espresa de situa, cual es un formula de nom (o un frase intera) segueda par la:

  • ken la, tenpo pimeja ni la, mi lape. – Posible, en esta tempo oscur (= note), me (va) dormi.
  • mi toki tawa sina la, sina kute e mi. – Si me parla a tu, tu oia me.

Comandas e demandas[edita | edita la fonte]

Per espresa un comanda, on cambia li a o. On pote omete la sujeto e comensa con o. Simil, on pote comensa un frase comun con la nom de la person a ci on parla, segueda par o:

  • mi mute o tawa! – Nos ta vade!
  • o kute e mi! – Escuta me!
  • meli o, mije o, mi wile kalama musi. – Senioras e seniores, me desira sona artal (= canta).

Per demanda esce un frase es vera, on repete la verbo pos ala, cual es ance la parola per "no":

  • moku li seli ala seli? – La come es calda?
  • ona li seli ala. – Lo no es calda.

On fa demandas de identia con seme, cual sinifia "cual?". Un otra modo de demanda sur la veria de un frase es pone anu seme? ("o cual?") a la fini:

  • sina wile seme? – Cual tu desira?
  • tenpo pi mute seme la, sina sike e suno? – A como multe veses tu ia sirculi la suno? (= Cuanto anios tu ave?)

Preposadas[edita | edita la fonte]

Tocipona ave sete preposadas. pi ave un sinifia estrema jeneral, e es la sola preposada cual pote apare en un formula de nom. Lo apare ance en formulas de verbo. La otra ses apare sola a la fini de predicas, pos la ojetos direta:

  • kepeken – par la usa de
    • mi open e poki kepeken palisa. – Me abri la caxa con un baston.
  • lon – en, sur
  • poka – con, prosima a
  • sama – como, simil a
  • tan – veninte de, causada par
    • nimi ni li kama tan seme? – De do esta parola veni?
  • tawa – dirijeda a, per, asta
    • ale li pona tawa mi. – Tota es bon per me. / Me gusta tota.

Plu, on pote usa esta ses preposadas como la sola contenida de un predica. On comprende ce la sujeto es en la situa indicada par la preposada. Per esemplo, soweli li lon telo sinifia "la animal es en la acua", e mi tawa sina sinifia "me vade a tu".

Esta preposadas es ance parolas comun. Per esemplo, kepeken es la verbo "usa", e sama es la ajetivo "egal". Donce on pote crea frases estrema ambigua: sina pana e sitelen tawa mi pote sinifia "tu envia la pitur a me" o "tu difusa me pitur movente (= me filma video)".

Numeros[edita | edita la fonte]

Tocipona evita numeros grande. On ave ala per zero, wan per un, e tu per du. Un segue de numeros indica un soma: "tre casas" es tomo wan tu, e on no nesesa pi. Per espresa numeros plu grande, on dise mute ("multe") o ale ("tota").

En casos spesial, cuando on nesesa es alga plu esata, on usa luka ("mano") per sinco, mute per dudes, e ale per sento. 234 es ale ale mute luka luka tu tu.

On espresa numeros ordinal con la parola nanpa (numero), cual no nesesa pi. "La casa tre" es tomo nanpa wan tu.

Vocabulo[edita | edita la fonte]

Asi es la 120 parolas de tocipona, con sua sinifias fundal. Los veni de linguas diversa, incluinte cartuli, nederlandes, suomi, tok pisin, e xines. La lista defini alga parolas como nomes – esta parolas indica fundal cualias, ma los es comun usada como nomes.

  • a o kin – (esclama) a!
  • akesi – animal fea como un retil
  • ala – zero
  • alasa – (ata) xasa
  • ale o ali – tota
  • anpa – basa
  • ante – diferente
  • anu – (junta) o
  • awen – permanente, nonmovente
  • e – (introdui un ojeto direta)
  • en – (junta) e (entre formulas de nom, con la eseta de predicas e ojetos direta)
  • esun – intercambia, comersia
  • ijo – cosa
  • ike – mal
  • ilo – util
  • insa – interna
  • jaki – susia
  • jan – umana, personal
  • jelo – jala, pal verde
  • jo – (ata) ave
  • kala – pex
  • kalama – sonante
  • kama – veninte
  • kasi – vejetal
  • ken – posible
  • kepeken – (ata) usa
  • kili – fruta
  • kiwen – dur, de metal, de petra
  • ko – semilicuida, gaxa
  • kon – spirital, aira
  • kule – colorosa
  • kulupu – sosial, grupo
  • kute – (ata) oia
  • la – (indica la fini de un espresa de situa)
  • lape – (ata) dormi
  • laso – blu, blu verde
  • lawa – xef, testa
  • len – stofa
  • lete – fria
  • li – (introdui un predica)
  • lili – peti
  • linja – corda
  • lipu – tela, paje
  • loje – roja
  • lon – (ata) esiste
  • luka – braso, mano
  • lukin o oko – oio, vide, leje
  • lupa – buco
  • ma – tera
  • mama – jenitor
  • mani – mone, ben valuada
  • meli – fema
  • mi – me, nos
  • mije – mas
  • moku – (ata) come
  • moli – mor o morinte
  • monsi – dorsal
  • mu – (esclama: la dise de cualce animal)
  • mun – luna
  • musi – juante, divertinte, artal
  • mute – multe
  • nanpa – numeral
  • nasa – fol, strana
  • nasin – via, metodo
  • nena – boton, colina
  • ni – esta
  • nimi – parola
  • noka – gama, pede
  • o – (introdui un comanda, o indica la fini de un vocativa)
  • olin – (ata) ama
  • ona – el, lo, los
  • open – abrida, comensada, comutada
  • pakala – (ata) fali, destrui
  • pali – (ata) fa
  • palisa – baston
  • pan – gran sereal
  • pana – (ata) pone, dona, envia, causa
  • pi – (preposada) de
  • pilin – (ata) senti
  • pimeja – oscur, negra
  • pini – finida
  • pipi – inseto
  • poka – visina, lado
  • poki – contenador
  • pona – bon
  • pu – usa la libro ofisial de tocipona (strana, ma vera)
  • sama – egal
  • seli – calda
  • selo – esterna, pel
  • seme – cual?
  • sewi – alta, santa
  • sijelo – fisical, corpo
  • sike – (ata) sirculi
  • sin o namako – nova
  • sina – tu, vos
  • sinpin – mur, fas
  • sitelen – (ata) scrive, desinia
  • sona – (ata) sabe, comprende
  • soweli – animal amable
  • suli – grande, importante
  • suno – sol
  • supa – surfas orizonal
  • suwi – dulse
  • tan – orijinal, causa
  • taso – sola
  • tawa – (ata) vade, move
  • telo – acua, licuida
  • tenpo – tempo
  • toki – (ata) parla
  • tomo – casa, sala
  • tu – du
  • unpa – (ata) fa la ama
  • uta – boca
  • utala – (ata) ataca, compete
  • walo – blanca
  • wan – un
  • waso – avia
  • wawa – forte
  • weka – asente
  • wile – (ata) desira, debe, nesesa

Un esemplo[edita | edita la fonte]

La testo seguente es un tradui de Bocragonia ("Jabberwocky"), un poesia asurda, en tocipona:

suno li tawa anpa. akesi jaki
li kalama li tawa lon telo.
akesi li pilin ike.
soweli lili li kalama wawa.

"jan lili mi o, ijo Sepawa li ike!
ona li ken moku li ken awen e ijo mute!
o tawa ala lukin e waso pakala suli e
akesi suli ike!"

ona li jo e ilo moli wawa.
tenpo suli la ona li wile moli e ijo Sepawa.
ona li lape lili lon poka pi kasi pona
li kama sona e ijo.

ona li kama sona e ijo la
ijo Sepawa li kama tan ma kasi nasa!
oko ona li seli.
ona li kalama.

a! a! a! a! jan li pakala mute
e ijo Sepawa kepeken ilo moli.
ijo Sepawa li moli. jan li kama jo e lawa pi ijo Sepawa
li tawa weka.

"sina moli ala moli e ijo Sepawa?
jan lili mi o kama!
a! pona! pona!"
ona li pilin pona li musi lukin.

suno li tawa anpa. akesi jaki
li kalama li tawa lon telo.
akesi li pilin ike.
soweli lili li kalama wawa.

Lia esterna[edita | edita la fonte]