Kah

Esta es un corti e reordina de la paje orijinal de kah a http://www.kwesho.com/index.html

Kah es un lingua construida per es un lingua aidante internasional. La vocabula es a priori (nova creada) e la gramatica es isolante e simil a xines. Lo es multe simple e fasil aprendeda. La desinior resta aora anonim.

Spele e pronunsia

Kah usa esta leteras e sonas:

• a
• b
• ch como elefen tx
• d
• e
• f
• g
• h
• i
• j como elefen dj
• k como elefen c
• l
• m
• n
• ny como espaniol ñ
• ng como engles ng
• o
• p
• r
• s
• sh como elefen x
• t
• u
• v
• w como elefen u consonantal
• y como elefen i consonantal
• z

Lo permete esta combinas de consonantes:

• py
• kw
• mw
• sw

Cada silaba pote fini con un vocal, un nasal (m, n, ng), l, o s.

Diftongos no esiste. Cuando on vocal segue un otra, los es pronunsiada como du vocales separada.

La asentua es sempre a la silaba ante la silaba final, estra cuando la silaba final fini con un consonante. En esta casos, la asentua es a la silaba final.

Gramatica

Kah ave cuatro tipos de parola:

• verbos
• nomes
• juntas
• paroletas

Nomes

Nomes es usada per indica cosas, persones, locas, avenis, etc:

• kaiko - libro
• ubu - om
• ala - loca

Los no varia per plural o caso. Caso es determinada par ordina e lojica. Si on nesesa espresa cuantia, on usa parolas de cuantia pos la nom: nia sun - du autos (leteral, auto du) nia wi - multe autos (leteral, auto multe)

Per indica colies, on ajunta nyo (colie) a la nom:

• penyo - foresta (leteral, arbor-colie)

Seso no es normal indicada. Cuando on nesesa, on pote ajunta la radises bu (om) o wana (fem):

• ume (ovea) > bume (ovea mas), waname (ovea fema)

Determinantes

Determinantes no difere de la ajetivos/verbos statal e sempre segue la nom. Normal, on no indica la defini. Articles no esiste. Ma on pote sujeste ideas simil par usa determinantes e cuantias:

• wau - esta
• ye - acel

Los es ance usada como pronomes.

Cuantias inclui la numeros (a su) e estas:

• yo - tota, cada
• wi - multe
• si - poca
• siwi - alga
• kakwa - cualce

Pronomes

Estas es la pronomes personal:

• wa - me
• li - tu
• yu - el
• ya - lo

La plural es indicada par ajunta -nyo. La refletante es indicada par -lo.

Otra pronomes inclui estas:

• al - on
• noyom - lunlotra

Kah es "pro-cade", pd on pote lasa pronomes (ambos sujeto e ojeto) cade si la sinifia es clarida par la contesto.

Parolas de demanda

Tota parolas de demanda comensa con ha-:

• haya - cual, cual cosa?
• hayu - ci, cual person?
• hala - do, cual loca?
• hana - cual?
• hashi - como, cual modo?
• hasa - cual spesie de?
• hata - cuando, cual tempo?
• hamun - perce, cual intende, cual causa?
• hano - a do, a cual loca?
• hachu - de do, de cual loca?
• hawi - cuanto, cual cuantia de?

Hana e hasa presede tipal la nom.

Verbos

Verbos es divideda en du tipos: ativa e stativa

Verbos ativa sinifia atas e avenis, ma nunca states. Per esemplo:

• titom tonen - la clima boni
• ubu soza binso - la om(es) bevi bir

Verbos stativa inclui parolas cual, en elefen, es ajetivos:

• yam nia - la auto es roja (leteral, es-roja auto)
• nyeka simwana - la fia es felis (leteral, es-felis fia)

Per usa lo como verbos, on reversa la ordina:

• nia yam - la auto roja (leteral, auto es-roja)
• simwana nyeka - la fia felis (leteral, fia es-felis)

Verbos stativa como ajetivos pote servi ance como averbos en elefen:

• fanyo tizia wezai simbu - la jenitor(es) leva amante la fio (leteral, jenitor leva es-amante fio)

Los pote ance reseta ojetos:

• fanyo wezai yu - la jenitor(es) ama el (leteral, jenitor es-amante el)

Verbos no varia per person, tempo, moda, o aspeta. Los es indicada par parolas cual servi como averbos:

• kwi - ja (per indica la perfeta)
• la - es ... -nte (la ata continua)
• denu - vade (la futur)
• kwiku - ante, a cualce ves
• lum - pronto
• janja - comun (la abitual)
• ke - intende, vole
• om - ta ce, desira
• tinti - debe

Preposadas

An si kah no ave preposadas, alga verbos pote ata como preposadas. Per esemplo, na opera como elefen "de" e an "-al" e numeros de ordina:

• nia na wa - la me auto (leteral, auto de me)
• vonu na musko - un corente de atmosfera
• kwanya na kwa - la leson prima (leteral, leson de un)

Otra esemplos inclui los cual es en realia verbos serial:

• chu - par (autor e simil), de (materia), -uple (grupo)
• bo - en
• denu - a (dirije) (leteral, vade, veni)
• tos - sur (tema), per
• leleng - sin
• shi - como

Plu esemplos:

• yu za tuya tu seki - el talia la carne con un cotela (leteral, el prende cotela talia carne)
• mul wan tunti me - boves es plu grande ce oveas (leteral, bove es grande surpasa ovea)
• bau kiza seki bas - la can come completa la carne (leteral, can come carne fini)
• yunyo de weyun wa - los veni per vide me (leteral, los veni vide me)

Juntas

Juntas sinifia relatas:

• ai - e
• chumun - car
• echu - donce
• en - ce
• eno - afin
• eom - o
• esto - ma
• eta - cuando
• eye - an tal
• tabo - en cuando
• tonto - si

Paroletas

Paroletas inclui esclamas, no e si, e indicantes de demandas, etc.

• eo - si, vera
• nong - no
• ha - esce (paroleta de demanda)
• hau - haha! (amusa)
• lo - vide! (paroleta de foca e asentua)
• soi - per favore
• mai - alo
• hoi - e? (surprende)
• yai - au (dole)
• yoi - ai (simpatia)
• sus - sss, cuieta!

Numeros

• meng - 0
• kwa - 1
• sun - 2
• yem - 3
• pan - 4
• jom - 5
• vai - 6
• teo - 7
• dia - 8
• sasta - 9
• nini - 10
• nini pan - 14
• sastanini - yem - 93
• mel - 100
• pol - 1000

Per indica ordina, usa na:

• nia na vai - la auto ses (leteral, auto de ses)

Per cambia numeros a nomes, ajunta u- o a-:

• uyu sun (du persones) > usun (la du)
• aya sun (du cosas) > asun

Fratas es formida en du modos:

• meng bastan sunini jom - 0.25
• pambe (pan + mbe) - 1/4

Crea de parolas

On pote deriva verbos de otra parolas par prefisa lo con estas:

• jam - fa
• tom - deveni
• we - fa ce un verbo stativa deveni transitiva
• mun - causa
• o - fa ce un verbo deveni un stativa pasiva
• ten - capas de es, pote, es permeteda

Per esemplo:

• bo (es-en) > jambo (inserta)
• sin (es-peti) > tonsin (deveni peti)
• yun (regarda) > weyun (vide)
• jebo (comprende) > munjebo (esplica)
• kai (clui) > okai (es-cluida)
• yun (regarda) > tenyun (vidable)

On pote deriva nomes de otra parolas par prefisa con estas:

• u - ojeto animada (person, animal)
• a - ojeto nonanimada (cosa)
• i - un state

Per esemplo:

• shika (instrui) > ushika (instruor)
• toka (nara) > atoka (narada)
• namil (libre) > inamil (libria)

Nota ce u- + o- > wo-, a- + o- > au-

Un poca juntas es derivada de otra parolas par la prefisa e-:

• ta (tempo) > eta (cuando)
• we (state) > ewe (ancora)

Kah ave un sufisa - -ng - cual cambia la sinifia de un parola a se oposante, como elefen "non-":

• daito (regulal) > daitong (nonregula)
• tehim (oiable) > tehiming (nonoiable)
• ta (tempo) > tatang (nunca) (parolas de un silaba dupli lo ante la -ng)

La vocabula fundal de Kah es multe limitada. Ma multe plu parolas es creada par composa. Per esemplo, la parola "do" sinifia "casa" o "construida". Donce:

• yudo - casa (leteral, person-casa)
• talado - fabrica (leteral, macina-casa)
• fondo - prison (leteral, puni-casa)
• kwando - scola (leteral, studia-casa)

Alga composadas no es tota lojical, ma sola un junta de ideas fundal cual descriva alga cosa:

• zedodi (caracol) < dorso + casa + inseto
• sempe (oso) < corpo + baston

Cuando la ajunta de un radis a un otra no acorda con la regulas de fonemes, Kah ave modos per coreta lo:

• chen + pe > chempe
• lam + vun > lamavun
• mas + yun > mashun

Multe plu sinifias es creada par la usa de redupli partal:

• pim (pende) > pimpi (pende perilosa)
• che (colpa) > cheche (bata)
• jam (fa) > janja (ave la abitua)
• din (lus) > dindi (lumina, brilia)

En alga casos, la redupli de un verbo crea la person:

• muno (gida) > mumuno (gidor)
• ko (scrive) > koko (scrivor)

En otra casos, la redupli fa ce un nom deveni plu personal:

• ma (madre) > mama (mama)

Ordina de parolas

Kah es un lingua de SVO: sujeto - verbo - ojeto:

• Malikah koyun kaiko - Malika leje la libro (leteral, Malika leje libro)

La alterantes de un nom segue la nom:

• lanki wau - esta ris (leteral, ris esta)
• yudo wan jom ye - acel sinco casas grande (leteral, casa grande sinco acel)

Espresas averbal pote presede o segue la verbo:

• Pitah jam zemanta - Peter va fa lo deman (leteral, Peter fa deman)
• om jara lau - ta ce nos pone lo asi (leteral, tace pone asi)

Kah pone partes de un frase a la comensa per indica ce la parte es la sujeto o tema de la frase. Per esemplo:

• Jan nenju Mariah (Joan ama Maria) > Mariah Jan nenju (es Maria ci Joan ama, leteral Maria Joan ama)

Per clari la sinifia, on pote ajunta la paroleta be pos la parte temida:

• Mariah be Jan nenju - es Maria ci Joan ama
• binki be paza wana - es pan cual la fem compra (leteral, pan be compra fem)

On pote ance usa la paroleta lo per indica la foco de la frase:

• Jan lo nenju Mariah - es Joan ci ama Maria
• wana paza binki lo - es pan cual la fem compra

On pote ance temi proposas:

• yu ka en semi (el dise ce el es malada) > en semi lo, yu ka (el es malada, el dise)
• denu pau tonto li papau (me dona lo si tu paia) > tonto li papau lo, denu pau (si tu paia, me dona lo)

Proposas ajetival no ave un indicante. En loca, on usa un pronom:

• simbu yu fiti - la fio ci gania (leteral, fio el gania)

Cuando la nom no es la sujeto, on usa la indicante de temi:

• nia be wa paza ya - la auto cual me compra (leteral, auto be me compra lo)

Proposas ajetival es comun usada en la modo en cual lfn usa partisipios:

• wehim une yu la jika - me oia la avia cantante (leteral, me oia avia lo canta)