Nadsat

Ator Malcolm McDowell como "Alex" en la filma "Clockwork Orange"

Nadsat es un jergo naral usada par la adolesentes en la novela "A clockwork orange" ("un orania mecanical") par Anthony Burgess. La titulo de la libro es, seguente Burgess, de un espresa el ia oia en un bar as queer as a clockwork orange ("tan strana como un orania mecanical"), cual el interprete como sujestente la confusa de la person natural e la idea ce persones es no plu ca macinas complicada. Burgess ia es un linguiste en ajunta a un noveliste, e usa sua esperia per crea un jergo per sua carateres en la forma de un engles influeda par rusce. La nom "nadsat" mesma deriva de la sufisa rusce -надцать per engles -teen como en thirteen (des-tre) per adolesente. Nadsat es ance usada en la filma derivada de la libro par Stanley Kurbrick.

La antieroe e naror de la libro - Alex - usa lo en un stilo de la prima person per raconta sua nara a la lejor. El ance usa lo per comunica con otra carateres en la novela, como sua droogs (de rusce друг, "amis"), parentes, vitimes, e cualce persones de autoria. Como con multe parlores de varias nonormal de engles, Alex es capas de parla engles normal cuando el vole.

Nadsat es fundal engles con alga parolas emprestada de rusce. Lo conteni ance influes de la jergo rimante, la King James Bible, la lingua deutx, la jergo de jovenes en scolas engles, e alga parolas inventada. Alga parolas es cuasi enfantin, como eggiweg per egg ("ovo") e appy polly loggy per apology ("escusa"). Parolas como like e old es usada como plenintes o marcas.

Multe esemplos de rusce es cuasi englesida: per esemplo, lewdies es de люди ("persones"); baboochka, de бабушка (ava, per "fem vea"). Algas es cortida: pe pony, de понимать ("comprende"), veck, de человек ("person, om"). Ma alga parolas es plu direta de rusce: devotchka es de девочка ("xica")

Un otra modo de construi parolas per nadsat es con omofones. Per esemplo horrorshow, cual sona como la engles parolas per "teror" e "gala", es vera de la parola rusce хорошо ("bon"); o "Gulliver", derivada de rusce голова ("testa").

Plu, alga partes de la jergo es construida de engles par fusa, corti, o composada: guff es un corti de guffawing, es un rie; un polyclef, de "multe claves" es un clave sceletin; la staja es un corti de state jail o prison de stato; un cancer es un corti de cancer stick, un espresa engles temprana per sigareta.

Final, Burgess usa alga esemplos de la jergo rimante de London, nomida "Cockney": cutter ("mone") es un rima de bread and butter ("pan e bur", pd la nesesas de vive, como mone).