Interlingue

Occidental (Occidental, Interlingue)
Creada par:	Edgar de Wahl
Anio:	1922
Tota parlores:
Familia:	Linguas construida  lingua aidante internasional
Fonte:	Linguas indoeuropean
State ofisial
Regulada par:
Sifras
ISO 639-1:	ile
ISO 639-2:	ile
ISO 639-3:	[1]
SIL:	[2]
Mapa
La simbol de Occidental
Vide ance: Lingua – Lista de linguas

Occidental (pronunsiada "ocsidental") es un lingua construida par Edgar de Wahl, un mestre e un ofisior de la marina deutx. El publici la lingua en 1922. El ia crea la lingua usante formas de parolas comun en la linguas de Europa ueste. Con un gramatica simple, occidental es fasil lejeda par la plu de europeanes. La lingua ia es multe poplal ante la Gera Mundal Du, con posible sirca du milion parlores. La nom ia es cambiada a interlingue, ma la introdui de interlingua de ALAI, el deveni min conoseda. Oji, a la rede, Occidental deveni de nova plu poplal. El es multe fasil per los ci conose elefen. Occidental es sirca egal fasil lejeda ca elefen per persones european sin preconose de occidental o elefen. Occidental es plu complicada per scrive ca elefen. Per esemplo: en occidental on ave 41 preposadas frecuente, en elefen on ave 22 preposadas frecuente. Occidental no es fonetical e donce min fasil parlada ca elefen.

Istoria

La prima numero de Kosmoglott (a pos Cosmoglotta), publicida rapida pos la anunsia ce la Liga de Nasiones ia es studiante la problem de un lingua internasional.

Comensa

Edgar de Wahl ia anunsia la crea de occidental en 1922 con la prima numero de la jornal Cosmoglotta, publicida en Tallinn (Esti) con la nom Kosmoglott. Occidental ia es un produida de anios de esperimenta personal su la nom Auli (auxiliary language), cual el ia usa entre 1906 e 1921 e cual a pos ia gania la nometa proto-occidental. De Wahl, orijinal un defendor de volapük e, a pos, de esperanto, ia comensa crea occidental pos la vota falida per reformi esperanto en 1894.

De Wahl ia coresponde con otra creores de linguas, entre los la matematiciste italian Giuseppe Peano (creor de Latino sine flexione), de ci ia gania un respeta por la vocabulo internasional, e Waldemar Rosenberger, la creor de Idioma Neutral.

A un ves anunsiada en 1922, occidental ia es cuasi completa. De Wahl no ia intende anunsia la lingua per alga anios, ma el ia deside aselera sua lansa pos escuta ce la Liga de Nasiones ia comensa ja un investiga de la lingua internasional. La prima publica conoseda en occidental, un libreta titulida Transcendent Algebra per Jacob Linzbach, ia apare corta pos la publici de Kosmoglott.

Occidental ia comensa asembla seguores par sua lejablia, an con un manca completa de gramaticas e disionarios. Du anios a pos, en 1924, de Wahl ia scrive ce el ia es corespondente con sirca 30 persones "en un Occidental bon" an con la manca de material de aprende, e usores de otra linguas ia comensa uni a la promove. La prima disionario, la Radicarium Directiv, un colie de radises de Occidental e sua corespondentes en oto linguas, ia es publicida a la anio seguente.

Gramatica

Nomes

La plural es indicada par la sufisa -s (pos vocal) o -es (pos multe consonantes).

La nom pote fini en -o per marca la forma mas o -a per marca la forma fema, per persones e animales.

La nom pote es presededa par la article de defini li o par la article de nondefini un.

On espresa la forma posese par presede la nom par de, e la dativa par presede la nom par a.

Ajetivos e averbos

Ajetivos no varia. Si nesesada per distingui el de otra categorias de parolas, un ajetivo pote fini con -i. Ma multe sufisas es spesifada per ajetivos e no nesesa la -i: -al, -an, -at, -(í)bil, -esc, -ic, -in, -íssim, -iv, -nd, -ut.

Averbos cual deriva de ajetivos es marcada par ajunta -men a la ajetivo. Multe parolas cual es sola averbos esiste ance.

Ajetivos usada como nomes pote aseta -s o -es per deveni plural.

Per compara:

• min... quam - min... ca
• plu... quam - plu... ca
• minim - la min, minima
• maxim - la plu, masima
• -issim - la plu, masima
• tre - multe, vera
• egalmen... quam - tan... como, egal... como
• altrimen... quam - otra... ca

Pronomes

Pronomes personal:

Elefen	Sujeto	Ojeto	Pronom de posese	Ajetivo de posese
me	yo	me	mei	mi
tu	tu	te	tui	tu
el (mas)	il	le	sui	su
el (fema)	ella	la
lo (cosa)	it
nos	noi	nos	nostri	nor
vos	vu	vos	vestri	vor
los (mas)	illos	los	lor	lor
los (fema)	ellas
los (jeneral)	ili

La pronom nondefinada es on.

Pronomes de indica:

• ti - asi/ala
• ti-ci - asi
• ti-ta - ala
• to - asi/ala (neutral)
• lo - lo (astrata)

Pronomes de relata e demanda:

• qui - ci (sujeto)
• quel - cual (jeneral - cosas o persones)
• quem - ci (ojeto)
• qual - cual tipo (cualias)
• quo - cual cosa (cosas)
• quant - cuanto

On pote ajunta estas a la pronomes de relata e demanda:

• ne- - no
• al- - alga
• -cunc - cualce

Verbos

Tre formas de la verbo es marcada par sufisas:

• La infinitivo es marcada par ajunta -r.
• La pasada (e la partisipio pasada) es marcada par ajunta -t.
• La partisipio presente es marcada par ajunta -nt (o -nte per usa como un averbo).

La forma de comanda es indicada par cade la sujeto.

Otra tempos e aspetas es indicada par particles poneda ante la infinitivo:

• La futur es indicada par la particle va.
• La ipotesal es indicada par la particle vell.
• La forma de cortesia es indicada par la particle ples.
• La forma de sujesta ("ortativa") es indicada par la particle mey.

La pasiva es indicada par usa es (en la tempo e aspeta desirada) segueda par la partisipio pasiva (-t).

La aspeta perfeta es creada par usa ha (ave) segueda par la partisipio pasive (-t).

Simil, la aspeta continuante es creada par usa es segueda par la partisipio ativa (-nt).

Numeros

Numeros cardinal:

• null, un, du, tri, quar, quin, six, sett, ott, nin, etc.
  • zero, un, du, tre, cuatro, sinco, ses, set, oto, nove, etc.
• deci, deciun, decidu , etc.
  • des, des-un, des-du, etc.
• duant, triant, quarant, etc.
  • dudes, tredes, cuatrodes, etc.
• duantun, duantdu, etc.
  • dudes-un, dudes-du, etc.
• cent, centun, centdu, etc.
  • sento, sento-un, sento-du, etc.
• centdeci, centdeciun, centdecidu, etc.
  • sento-des, sento-des-un, sento-des-cu, etc.
• centduant, centduantun, etc.
  • sento-dudes, sento-dudes-un, etc.
• centtriant, centriantun, etc.
  • sento-tredes, sento-tredes-un, etc.
• ducent, etc.
  • dusento, etc.
• mill, million, milliarde, billion.
  • mil, milion, mil milion, milion milion

Numeros ordinal:

Numeros ordinal es formada par ajunta -ésim:

• unésim, duesim, triesim, etc, deciesim, deciunesim, deciduesim, etc.

Fratales es la mesma, eseta per la cuatro prima:

• un tot, un demi, un ters, un cuart

Multiples:

Multiples es formada par ajunta -uplic (-plic pos vocales):

• unuplic, duplic, triplic, etc, deciplic, deciunuplic, etc.
• duantuplic, centuplic, milluplic, etc.

Grupos:

Grupos es formada par ajunta -ene:

• triene, quarene, quinene, etc.
• decene, deciduene, deciquinene, duantene, centene, millene, etc.
  • ma nota: unite, pare!

Veses:

Veses es formada con vez:

• un vez, du vez, tri vez, etc.
• deci vez, duant vez, cent vez, mill vez, etc.

Leteratur

Un parte importante del leteratur en interlingue ia es scriveda en sua revista ofisial, Cosmoglotta.

La testos leteratural xef en occidental ia apare en Cosmoglota. On ia ave alga obras, ambos orijinal e traduida, publicida en Interlingue. Otra testos ia apare en la jornal Helvetia ma los ia es min comun. Micri chrestomathie es un esemplo de un obra traduida, un compila de testos fada par Jaroslav Podobský, H. Pášma e Jan Kajš e publicida en 1933.

Alga testos publicida como libros separada:

• Krasina, raconta del subterrania del Moravian carst, publicida en 1938 par Jan Amos Kajš.
• Li astres del Verne, un colie de poesia orijinal publicida par Jaroslav Podobský, en 1935 e 1947.
• Li sercha in li castelle Dewahl e altri racontas, scriveda e publicida par Vicente Costalago en 2021.

Un esemplo

Patre nor, qui es in li cieles.

Mey tui nómine esser sanctificat,

mey tui regnia venir.

Mey tui vole esser fat

qualmen in li cieles talmen anc sur li terre.

Da nos hodie nor pan omnidial,

e pardona nor débites,

qualmen anc noi pardona nor debitores.

E ne inducte nos in tentation,

ma libera nos de lu mal.

Amen.

Lias esterna

• Paje ueb xef
• Salute, Jonathan!
• Disionarios