Kosmos

Kosmos es un proposa per un lingua aidante internasional creada par Eugen A. Lauda e publicida en 1888. Lauda ia critica Volapük per sua artifisia, e ia sujesta ce on pote crea un lingua par combina un gramatica pur lojical con un vocabula de un lingua esistente (e plu comun studiada en sua eda ca oji), latina. En esta modo, on pote aprende rapida la gramatica e ance usa fasil la disionarios de latina. Serta, si Lauda ia crea un gramatica plu reduida, esta lingua ia pote deveni multe plu popular!

Kosmos usa la alfabeta latina con la pronunsia clasica (como Peano ta usa per se "latino sine flexione" de 1903). Lo ave ses vocales (a, e, i, o, u, y [y]) e 17 consonantes (b, c [k], d, f, g [g], h, l, m, n, p, q [k], r, s, t, v, x [ks], z). Lo ave ance tre vocales longa (ā,ō,ū) usada en la sufisas per la sujuntiva. La diftongos ae, oe, (ai, ei, au, eu, ui) es pronunsiada como du vocales separada. Q es sempre segueda par u, e la du es pronunsiada [kv]. Strana, Lauda usa K en la nom de la lingua!

La asentua es a la silaba anteultima (un ante la silaba final) o du ante la ultima (du ante la silaba final), como en latina, e depende de la longia de la vocal anteultima.

Articles e nomes

Lauda trova ce la articles no es usada, e nota ce linguas como latina e rusce no nesesa los. Ma el crea un grupo nova de "articles" cual no indica la definida o nondefinida de la nom, ma indica la pluralia e caso de la nom:

	singular	plural
nominativa	ta	tas
acusativa	tan	tans
dativa	te	tes
jenitiva	tio	tios

Nomes es nonvariante per seso, pluralia, e caso - sola la article varia. Los segue sempre la forma nominativa singular de latina (o la plural si la singular no esiste), pe: dominus, mensa, castra, divitiae.

Pronomes

La pronomes personal es...

	singular	plural
person un	mi	mis
person du	si	sis
person tre	ti	tis

• Per cortesia, usa sis.
• Per "on", usa moi (de homo).
• Per la pronom refletante, usa sovi.

la formas de posese es...

	singular	plural
person un	miic	misic
person du	siic	sisic
person tre	tiic	tisic

• Pronomes de mostra: hici (esta), isti, illi (acel), isi (el ci), ipsi (mesma), isidem (la mesma).
• Pronomes de relata: quui, quicunque
• Pronomes de demanda: quisi, quisinam
• Pronomes nondefinida: quidam (un conoseda), quivis, quilibet (cualce), aliquisi (alga), quisique (cada)

Tota pronomes varia con la ajunta de la article, ma la article segue la pronom: mi-ta, mi-tio, mi-tan, etc; miic-ta, misic-ta, etc. En loca de la pronom de posese, on pote usa la jenitiva: ta pater miic = ta pater mi-tio.

Ajetivos e averbos

Ajetivos es ance nonvariante. Los es indicada par la fini -ic ajuntada a la radis latina, pe: bonic, liberic, nigric, dulcic, veteric. Per compara ajetivos, on usa la sufisas -ir e -ist, pe: fortic > forticir, forticist. On pote ance usa la averbos magis e maxime per eufonia: magis maleficic, maxime maleficic. Final, on pote cambia ajetivos a nomes par ajunta un article ante la parola.

Averbos es derivada de ajetivos par ajunta la sufisa -o, pe: fortic > fortico.

Verbos

La verbos ave varias coerente. La presente de la verbo es la radis con -o , plu la pronomes personal. Pe, per la verbo am- (= ama):

amo (= ama)	singular	plural
person un	amomi	amomis
person du	amosi	amosis
person tre	amoti	amotis

La fini de la verbo cambia per la otra tempos:

• amomi - me ama
• amumi - me ia ama
• amami - me va ama

Ave otra tempos composada, cual es formida par presede la verbo par è:

• è amomi - me es amante
• è amumi - me ia ama ja
• è amami - me va ama ja

La sujuntiva es creada par longi la vocales de la otra tempos:

• amōmi
• amūmi
• amāmi
• è amōmi
• etc

Per la forma cortes de comanda, on usa la sujuntiva presente. Per comandas plu forte, on usa la verbo en -o o -os, sin pronom.

Per la pasiva, on cambia la -i final a -ai, pe: amomai, amosai, amotai...

La infinitivas es creada par ajunta la sufisa -min (per ativa) o -main (pasiva) a un de la tempos simple, pe: amomin, amomain...

Partisipios es creada par ajunta -ntic (ativa) o -ntaic (pasiva), pe: amontic, amontaic...

Verbos nonpersonal es formida par usa la varia neutra de la person tre, -tid, pe: ningotid (neva), eveniotid (ariva).

En Kosmos, an la verbo es (= es) es coerente. On pote usa es per crea multe verbos composada per indica sinifias multe esata (e misteriosa).

Particulas

Particulas como averbos nonderivada, preposadas, e conjuntas es prendeda sin cambia de latina. Preposadas governa sempre la acusativa (no como en latina, do otra formas de la nom cambia la sinifia de la preposada). La loca normal de ajetivos es ante la nom, pos la article. Esetante per esta, la ordina de parolas es libre.

Numeros

La numeros fini con -a:

• 0 - nulla
• 1 - una
• 2 - dua
• 3 - tria
• 4 - quadra
• 5 - quinqua
• 6 - sexa
• 7 - septa
• 8 - octa
• 9 - nova
• 10 - deca
• 11 - deca una
• 12 - deca dua
• 20 - dua deca
• 30 - tria deca
• 100 - centa
• 1,000 - milla
• 1,000,000 - milliona
• 1,000,000,000 - milliarda

• La numeros ordinal es creada par ajunta -st, pe: unuast, duast, triast...
• La numeros per indica veses es creada par cambia la -a a -o, pe: uno, duo...
• La averbos ordinal fini con -sto, pe: unasto, duasto...
• Per indica la distribui, on usa -ni, pe: unani, duani...
• Per multiplia, usa -plic, pe: unaplic, duaplic...
• La fratas es formida par ajunta -ar, pe: duastar, triastar...

Per crea otra parolas de cuantia, on usa esta trucos:

• quota - cuanto?
• tota - tan multe
• quotast - cual loca en la ordina?
• totast - esta loca en la ordina
• quoto - cuanto veses?
• toto - tan multe veses