Europa preistorial

De Vicipedia
Jump to navigation Jump to search
Skara Brae, la vila neolitica la plu vea en Europa

Europa preistorial ia estende de la comensa de la eda paleolitica asta la eda istorial, o de sirca 1800 mil anios ante aora asta la sentenios final aec. De la paleolitica temprana a la media de la paleolitica tarda (sirca 20 mil anios ante aora), Europa ia es poplada par Homo erectus e Homo neanderthalensis. En la paleolitica tarda e la mesolitica (43 mil anios asta 6 mil anios ante aora), Europa ia ave ance xasores-coliores de Homo sapiens. En la eda glasial la plu resente, multe partes de Europa ia es despoplada e alora, sirca 15 mil anios ante aora, ia es repoplada. La eda neolitica ia comensa sirca 9 mil anios ante aora en Europa sude-este, e ia estende a Europa norde sirca 7,5 mil anios ante aora, cuando la eda de cupre ia comensa.

La eda de bronze ia comensa sirca 3200 aec en Elas. La eda de fero ia comensa sirca 1200 aec e ia estende a Europa norde sirca 500 aec, cuando Europa ia ateni la periodo istorial. Alfabetisme ia veni a Europa sirca la sentenio oto aec a la costa mediteranean, ma multe areas de Europa norde e este ia resta preistorial asta tan tarda como la eda media.

La paleolitica[edita | edita la fonte]

La paleolitica temprana[edita | edita la fonte]

Europa ia es poplada par Homo erectus de sirca 900 mil anios ante aora, e es asosiada con la tecnolojia de utiles de calcula, e plu tarda con la tecnolojia de la cultur acheulean (de sirca 300 mil anios ante aora).

La paleolitica media[edita | edita la fonte]

Pos un tempo, spesies de Homo nova ia evolui. Homo neanderthalensis (de sirca 200 mil anios ante aora) es asosiada con la tecnolojia de la cultur mousterian. Nosa asendentes propre, Homo sapiens, ia usa ance esta tecnolojia tra un periodo longa.

La paleolitica tarda, parte prima[edita | edita la fonte]

Lo pare ce la usores de la tecnolojia de la parte prima de la paleolitica tarda ia es xef Homo sapiens, con cisa un parte peti de Homo neanderthalensis. La avansa defininte de esta tecnolojias ia es la cultur auriniasian. La forma prima ia es locada en Balgaria, e la forma completa ia es locada en Magiar. Sirca 37 mil anios ante aora, la cultur ia estende tra la plu de Europa. Lo pare ce la neandertalanes ia es puiada par esta prosede a la dui sude de la penisola iberian.

La esemplos prima, an si rara, de obras de arte ia apare en esta periodo.

La paleolitica tarda, parte media[edita | edita la fonte]

Sirca 32 mil anios ante aora, la cultur gravetian ia apare en la montanias de Crimea (aora, la sude de Ucraina). Esta cultur e sua tecnolojia es cisa la resulta de migras de popla de Asia sude-ueste, Anatolia, e la Balcanes. Lo es ance posible ce los ia deriva partal de la cultur aurignacian. La gravetian ia apare ance en la Caucasos e Zagros. Lo ia desapare presipita de Europa sude-ueste, estra la costa mediteranean de Iberia.

La cultur solutrean, cual estende de Espania norde a Frans sude-este, inclui no sola un tecnolojia de petra bela, ma ance la developa vera de la depinta de cavas, la usa de agos, e posible la arco e flexa. La cultur gravetian ia es ance avansada, a min sur la artes: sculta – comun en la forma de "Venuses", es un esemplo bela de la creosia de esta popla.

La paleolitica tarde, parte final[edita | edita la fonte]

Sirca 19 mil anios ante aora, Europa ia vide la apare de un cultur nova, la cultur magdalenian, cual ia deriva cisa de la aurignacian. Esta cultur ia sustitui rapida la solutrean, e ance la gravetian de Europa sentral. Ma en la area mediteranean de Iberia, Italia, la Balcanes e Turcia, cultures epigravetian continua local.

Con la cultur magdalenian, la developa paleolitica en Europa ia culmina, e esta es refletada en la arte.

La epipaleolitica[edita | edita la fonte]

Sirca 12 500 anios ante aora, la eda glasial de Wurm ia fini. Lenta, tra la milenios seguente, temperatures ia leva, la niveles de mares ia leva, e la ambiente ia cambia per la popla preistorial. La cultur magdalenian ia continua asta sirca 10 mil anios ante aora, e ia evolui pronto a du cultures microlitiste: la cultur azilian en Espania e Frans sude, e la cultur sauveterrian, en Frans norde e Europa sentral. Estra alga diferes, la du cultures ia comparti la crea de utiles de petra multe peti ma la raria de arte figural, sustituida par un decora astrata de utiles.

En la parte tarda de esta periodo, la sauveterrean ia evolui e deveni la cultur tardenosian, e ia influe forte sua visina sude, sustituinte lo en Espania mediteranean e Portugal. Un otra cultur, la cultur maglemosian, cual es derivada de la sauveterrean e la tardenosian, ma con sua carater propre, ia coloni Danmarc e areas prosima, incluinte partes de Britan.

La mesolitica[edita | edita la fonte]

La eda mesolitica ia es un periodo de cambia en la developa de tecnolojia umana entre la paleolitica e la neolitica, e aplica xef a la parte ueste de Europa. La periodo ia comensa sirca 11 500 anios ante aora e ia fini con la introdui de cultiva, de cual la datas varia per cada area jeografial. En alga areas, como Asia sude-este, la cultiva ia es ja ativa a la fini de la pleistosene. En areas con glasias minima, la parola "epipaleolitica" es prefereda a alga veses. Areas con efetos la plu grande de ambiente a la fini de la eda glasial resente ia ave un periodo mesolitica plu distinguida, e lo ia continua tra milenios.

En Europa norde, sosias ia pote vive bon, con bon furnis de comedas de la pantanes cual ia es creada par la clima plu calda. Esta statos ia produi cultures bon conservada en la arcivo material, como la cultures maglemosian e azilian. Esta statos ia retarda la aveni de la neolitica a tan tarda como 6 mil anios ante aora en Europa norde.

Cuando la cambias cual Vere Gordon Childe ia nomida "la paco neolitica" (cual inclui cultiva, eleva de animales, axas de petra briliada, casas longa de lenio, e vasia) ia estende tra Europa, la modo de vive mesolitica ia es marjinida e ultima estinguida.

La neolitica[edita | edita la fonte]

La eda neolitica en Europa ia ariva probable de Asia sude-este, tra Anatolia, la mar Mediteraneo, e an tra la montanias Caucaso. Un discute longa esiste entre los (la "migristes") ci crede ce la cultivores de Asia sude-este ia migra e desloca la xasores-coliores nativa, e los (la "difusistes") ci crede ce la prosede ia es lenta e ia aveni xef par transmete cultural. Un relata entre la estende de cultiva e lo de la linguas indoeuropean es posible.

La neolitica antica[edita | edita la fonte]

Lo pare ce la loca prima de cultiva, eleva de animales, e vasio en Europa es la area de Tesalia en Elas, e ce lo ia es relatada a la cultur hacilar en Anatolia. Esta grados prima es nomida la cultur presesclo, e lo ia evolui rapida a la cultur sesclo (sirca 8000 anios ante aora), un cultur plu stable e la orijina de la estende neolitica en Europa.

Cuasi tota de la penisola balcan ia es colonida en la milenio ses aec de ala. Esta ia estende a la partes la plu este de la cultur tardenosian a la Tisza alta, e ia comensa la cultur de vasos de bandas. Esta cultur ia condui alora a la grupo danubian de cultures, cual es multe importante en la preistoria de Europa.

Paralel, la costas de la Adriatica e Italia sude ia es la loca de la estende de un otra move neolitica de orijinas min clar. La cultur de vasos cardial ia ariva a Dalmatia, cisa de Tesalia o de Lubnan (Biblos). Los ia es marinores, pexores e pastores de oveas e capras, e la trovas arceolojial mostra ce los ia misca con la nativas en la plu de locas.

Otra cultures neolitica es trovada en Ucraina e Rusia sude, do la poplas epigravetian ia adota alga de la influes de cultures ultra la Caucasos (la cultur de Dniepr-Don e relatadas), e en Andalusia (Espania), do la cultur de vasos de La Almagra ia apare sirca 7800 anios ante aora, de orijinas nonconoseda.

La neolitica media[edita | edita la fonte]

Europa en la neolitica media

Esta periodo, cual comensa a 7000 anios ante aora, es marcada par la solidi de la estende neolitica a Europa ueste e norde, ma ance par la invade de un cultur nova, probable violente, cual ia ocupa multe de la balcanes e ia concista la colonistes prima. Esta ia es la cultur de Dimini (Tesalia) e la cultures relatada, la cultur de Vinca (Serbia e Romania) e la cultur de Karanova 3 e de Veselinova (Balgaria e areas prosima).

Entretempo, la temprana cultur de vasos de bandas, multe peti, ia pari du ramos multe plu ativa: la varia ueste e la varia este. La varia este ia es un estende de la neolitica balcan, ma la varia ueste ia es plu inventosa e ia estende rapida, e ia asorbe rejiones cual es aora Deutxland, Txecia, Polsca, partes grande de Ucraina ueste, Moldovia, la paises basa de Romania, e partes de Frans, Beljia e Nederland. Tota ia es completida en min ca un mil anios. La cultur ia diversi e alga cultures danubian local ia developa a la fini de la milenio sinco.

En la Mediteraneo, la pexores de la cultur de vasos cardial ia es ance ativa, e ia coloni o asorbe tota Italia e la areas mediteranean de Frans e Espania. An en la costa de la Atlantica, alga grupos de la xasores-coliores nativa ia comensa asorbe la tecnolojias nova. Entre los, la areas la plu notable pare es Iberia sude-ueste, cual ia es influeda par cultures mediteranean e andalusian. Los ia developa la tombas megalitica prima. Simil, la cultur de Ertebolle en Danmarc ia crese, influeda par la danubianes.

La neolitica tarde[edita | edita la fonte]

Esta periodo aveni en la dui prima de la milenio ses e es alga cuieta. La tendes de la periodo a ante ia continua, e ia ave un Europa neolitica completa con sinco areas cultural xef:

  • La cultures danubian, de Frans norde a Ucraina ueste. A esta periodo, lo es divideda entre alga cultures local. La plu notable ia es la cultur de Boian (Romania e Bulgaria), la cultur de Rossen (en la ueste), e la cultur de Lengyel (Osteraic e Magiar ueste). Los va ave roles major en periodos a pos.
  • La cultures mediteranean, de la Adriatica a Espania este, incluinte Italia e partes grande de Frans e Suiz. Estas ia es ance diversida entre alga grupos.
  • La cultures de Dimini e Vinca, en Tesalia, Macedonia e Serbia, ma con estendes de sua influe a partes de la danubia media (Tisza, Slavonia) e Italia sude.
  • La cultures de Europa este en Ucraina sentral e este e partes de Rusia sude e Belarus (la cultur de Dniepr-Don). Lo pare ce esta popla ia es los ci ia doma prima la cavalos, si atestas paleolitica no contrademostra lo.
  • La cultures de Europa atlantica, de Portugal a Sveria sude. Estas ia es un mosaica de cultures local, e alga de los ia es ancora preneolitica. De sirca 5800 anios ante aora, la area ueste de Frans ia adota ance la modo megalitica de entera.

On ave ance alga areas autonom, incluinte Andalusia, Elas sude, e la costas ueste de la Mar Negra (la cultur hamangian)

La calcolitica[edita | edita la fonte]

La estende de la cultures megalitica

La eda calcolitica (o eda de cupre) ia es un eda de cambias e confusa. La plu importante es la invade de partes grande de Europa par poplas ci ia veni de Asia sentral, sur cual multe siensistes crede ce los ia es la indoeuropeanes orijinal, an si multe otra siensistes no acorda. Otra avenis ia es la crese de la cultur megalitica e la apare de la strati economial prima sinifiosa e, relatada con esta, la monarcias prima conoseda en la rejion balcan.

La economia de la calcolitica, an en areas do cupre no ia es ancora usada, ia es no plu la economia de comunias e tribus de campaniores. Alora, alga materias ia es produida en locas spesifada e ia es distribuida a areas vasta. La mina de metales e petras ia es vera developada en alga areas, con la prosede de esta materiales a benes valuada.

La calcolitica antica[edita | edita la fonte]

De sirca 5500 a 5000 aa, on ia comensa usa cupre en la Balcanes e Europa este e sentral. Ma la elemento la plu importante ia es cisa la usa de cavalos, cual ia crese la movablia de popla. De sirca 5500 a pos, lo pare ce Europa este ia es invadeda par persones de la area ultra la Volga (la cultur de Yamna), cual ia crea un misca complicada – la cultur de Sredny Stog – cual ia sustitui per la cultur presedente – la cultur de Dnieper-Donets – e ia puia la nativas a la norde-ueste a la Baltica e Danmarc, do los ia misca con la nativas (Trbk A e C). Esta pote es corelatada con la estende linguistica de la indoeuropeanes (la ipotese curgan). Prosima la fini de la periodo, un otra ramo ia lasa multe atestas en la area de la Danubio basa (la cultur de Cernavoda 1), en lo cual pare es un otra invade.

Entretempo, la cultur de Lengyel de la Danubio ia asorbe sua visinas a la norde en Txecia e Polsca per alga sentenios, ma alora los diminui en la dui du de la periodo. En Balgaria e Romania sude, la cultur de Boian-Marica ia evolui a un monarcia con un semetero clar reial asta la costa de la Mar Negra. Lo pare ce esta model ia es imitada plu tarda en la area de Tiszan en la cultur de Bodrogkeresztur. Spesiali de labora, strati de economia, e cisa la risca de invade ia es cisa la razonas per esta developa. La influe de la cultur de Troy 1 es clar, no sola en la estende de metalurjia, ma ance en la organiza sosial.

En la area de Danubio ueste (la basines de la Reno e la Seine), la cultur de Michelsberg ia sustitui per sua presedente, la cultur Rossen. Entretempo, en la Mediteraneo, alga cultures (pe la cultur Chassey en Frans sude-este e la cultur La Lagozza en Italia norde) ia conflue en un uni de funsiona, con la indica la plu sinifiosa de silica refinada de color mielin. An tal, la sinias de desacorda es clar, e multe sceletos mostra feris violente. Esta es la tempo e la area do Otzi, la om famosa trovada en la Alpas, ia vive. Un otra developa major de esta periodo es ce la construi de megaliticas ia comensa estende tra la area atlantica, cual ia trae ance la usa de cultiva a alga areas sudevelopada ala.

La calcolitica media[edita | edita la fonte]

Esta periodo estende tra la dui prima de la milenio tre aec. La aveni la plu importante es la reorganiza de la danubianes en la cultur Baden, un cultur potiosa cual ia estende a sirca la area de la Impero Austro-Magiar resente. La resta de la Balcanes ia es ance multe restruturida pos la invades de la periodo presedente, con la eseta de la cultur de Cotofeni en la montanias, cual no ia mostra alga cualias de la cultur plu este (cisa la indoeuropeanes). La cultur de Ezero, un cultur nova en Balgaria, ia mostra la esemplos prima de pseudobronze (un lia de cupre con arsenico). La cultur de la Ciclades en la Ejean ia mostra ance la mesma formas pos 2800 aec.

En la norde, la grupos cual es cisa indoeuropean ia pare retrosede tempora e ia es forte afetada par la cultur danubian. En la este, la popla ultra la Volga (la cultur de Yamna), probable asendentes de la scitas, ia domina Ucraina e Rusia sude. En la ueste, la sola sinia de unia ia es la supercultur megalitica, cual ia estende alora de Sveria sude asta Espania sude, con partes grande de Deutxland sude ance. Ma la grupos de la periodo presedente a la costa de la Mediteraneo e en la area de la Danubio ia pare divideda entre multe pesos peti, e alga de los ia retrosede an en tecnolojia. De sirca 2800 aec, la cultur danubian de la Seine, Oise e Marne ia puia a la sude e ia destrui la plu de la cultur rica megalitica de Frans ueste.

Pos sirca 2600 aec, on pote vide alga avenis cual predise la cambias de la periodo veninte: vilas grande con mures de petra apare en du areas de la penisola iberian, la un en la area portuges de Estremadura (la cultur de Vila Nova de Sao Pedro) cual ia ave un cultur megalitica, e la otra prosima a Almeria en Espania sude, sirca la vila de Los Millares, cual ave un cultur mediteranean. An si los ia ave multe diferes, los ia pare amin, con intercambias produosa. En la area de Dordogne (Aquitaine, Frans), un cultur nova de arcores ia apare – la cultur de Artenac – cual ia prende pronto la controla de Frans ueste e norde e Beljia. En Polsca e prosima, la cultures este (probable indoeuropean) ia reorganiza e solidi ancora con la cultur de amforas globin. Ma la influe de multe sentenios de contata con la popla potiosa de la Danubio ia cambia multe sua cultur.

La calcolitica tarde[edita | edita la fonte]

Esta periodo ia estende de sirca 2500 aec a entre 1800 aec e 1700 aec, dependente de la area. La area ejean ia es ja completa en la eda de bronze. Sirca 2500 aec, un cultur nova (la cultur de catacombas, cisa la protocimerianes), ia desloca la popla de Yamna en la areas norde e este de la Mar Negra, e ia puia los a sua area orijinal este de la Volga. La cultur de catacombas es la cultur prima cual ia introdui vasos de bandas a la stepes, e ia mostra la usa estendeda de la asa briliada de batalia, cual ia es un lia a la ueste. A la otra lado, paraleles con la cultur de Afanasevo, incluinte malformis cranial, ia es un lia a la este. Alga de esta developas ia infiltra Polsca, cual ia aida cisa la transforma de la cultur de amforas globin a un varia nova de la cultur de vasos de bandas.

Sirca 2400 aec, la popla de esta cultur de vasos de bandas ia sustitui per sua presedentes e ia estende a partes de Deutxland ueste. Un ramo relatada ia invade Danmarc e Sveria sude, en cuando la Danubio media ia mostra sinias de renores nova, cisa indoeuropean (la cultur de Vucedol). En la ueste, la popla de la cultur de Artenac ia ateni Beljia. La cultures danubian, asta alora tan forte, ia desapare de Europa.

La estende de la cultur de vasos campanin

La resta de esta periodo es la nara de la popla strana de la cultur de vasos campanin. Esta popla ia pare es mercatores e ia prefere es enterada en un forma ritual nonvariante. De sua area orijinal de Europa ueste-sentral, los ia apare sola como partes de otra cultures local, cual sujesta ce los no ia invade o concista la popla presedente, ma ia vive entre los – como mercatores. Alga siensistes sujesta ce los ia es la protoceltas, e los ia influe ultima tota de la Europa atlantica.

La resta de la continente ia resta cuasi noncambiada e pasosa. De sirca 2300 aec, la vasos campanin apare en Boemia, longo la Rhone e la costas, asta la cultur de Vila Nova (Portugal) e Catalonia (Espania). Simultan, ma no relatada, sirca 2200 aec en la area de la Ejean, la cultur de la Ciclades ia dejenera, sustituida par un fase nova de la cultur minoan de Criti.

La fase du de la vasos campanin, de sirca 2100 aec e a pos, es marcada par la desloca de la sentro de esta fenomeno a Portugal, entre la cultur de Vila Nova. Esta sentro nova ia influe tota de Frans sude e ueste, ma no Iberia sude e ueste, estra Los Millares. Pos sirca 1900 aec, la sentro de la cultur de vasos campanin ia revade a Boemia, con un desentrali de la fenomeno tra Iberia.

La eda de bronze[edita | edita la fonte]

Cultures de la eda de bronze, sirca 1200 aec

An si la usa de bronze ia comensa plu temprana en la area ejean, lo no ia estende a Espania sude ante 1800 aec, e Europa sentral ia es fisada en la calcolitica asta 1300 aec. (Nota ce Egipte antica ia resta en la mesma state asta multe plu tarda.) Ma la anios entre 1800 e 1700 aec pote es tipal per la comensa de la eda de bronze en Europa jeneral.

  • Sirca 1800 aec, la cultur de Los Millares en Espania sude-ueste ia es sustituida par la cultur de El Argar, cual ia es cisa un stato sentralida tota en la eda de bronze.
  • Sirca 1700 aec, la cultures de Europa sentral (Unetice, Straubing, e preLausitz) ia comensa manipula la bronze, un tecnica cual ia ariva tra la Balcanes e la Danubio.
  • Sirca 1600 aec, Elas micenean ia comensa, pos sentenios de infiltra de elinicas indoeuropean de un orijin nonconoseda.
  • Sirca 1500 aec, la plu de la cultures de Europa sentral ia es unida en un cultur potiosa, la cultur de tumulos. A la mesma periodo (ma nonrelatada), la cultur de El Argar (Espania sude-este) ia comensa sua fase B, cual ia inclui un influe clar de la cultur ejean (pe: enteras en pithoi). Sirca esta tempo, on crede ce Criti minoan ia es vinseda par la elenicas micenean.
  • Sirca 1300 aec, la cultures indoeuropean de Europa sentral (incluinte la celtas, la italicas e la ilirianes) ia cambia sua fase cultural per adere a crese de la cultur de campos de vasos. Esta ia comensa un estende rapida cual ia condui los a la ocupa de Nederland, Beljie, partes de Frans, England sude-ueste, Espania norde-este, la plu de la Balcanes, e an Anatolia, do los ia destrui la Impero de la Hititas e ia oteni la secretas de fonde de fero. (Un deriva de esta estende rapida ia es la Poplas de Mar, ci ia ataca, sin susede, Egipte, ma ia fini par invade Elas e destrui Micene e, plu tarda, Troia.)

Ance sirca esta sentenio, la cultur de Vila Nova de Sao Pedro (cual ia dura tra 13 sentenios en sua forma urban) ia desapare en un cultur min impresante, ma final con la tecnolojia de bronze. La sentro de la cultures atlantica ia es alora deslocada a Britan. Ance, la cultur de Villanova, posible la asendente de la sivilia etrusca, ia apare en Italia sentral.

La eda de fero[edita | edita la fonte]

La estende de la cultures de Hallstatt (jala) e La Tene (verde)

An si la usa de fero ia es conoseda par la popla de la Ejean sirca 1100 aec, la tecnolojia no ia estende a Europa sentral ante 800 aec, en cual la cultur de Hallstatt (la cultur de la campos de vasos ma con la tecnolojia de fero). Posible par esta tecnolojia, la indoeuropeanes ia pote solidi sua potia en Italia e Iberia – incluinte la fundi de Roma antica en 753 aec.

Sirca esta periodo, la fenisias, ci ia benefica de la desapare de la potia maral de la elinicas (esta ia es la eda oscur elinica), ia fundi sua colonia prima a la entra a la Mar Atlantica a Gadir (Cadiz moderna), probable como un campo avansada de mercatores per la importa de minerales de Iberia e Britan.

De la sentenio sete aec e a pos, la nasion elinica ia recovre sua potia e ia comensa sua estende colonial propre, e ia fundi Massalia (Marseilles moderna) e la campo avansada Emporion (la Empuries moderna en Espania). Entretempo, la Iberianes ia reconcista Catalunia e la vale de la Ebro de la celtas, cual divide la celtas de Iberia de sua cameradas plu norde.

La fase du de la eda de fero en Europa ia es definida par la cultur de La Tene de la celtas, cual ia comensa sirca 400 aec, segueda par un estende grande de esta popla a la Balcanes, Britan (do los asimila druidisme), e otra areas de Frans e Italia.

La move de la celtas (par la presa de la tribus germanica de Scandinavia e Deutxland norde) e la formi de la Impero Roman en la sentenio final aec, es ance la fini de la preistoria de Europa, an si multe areas de Europa ia resta ancora nonalfabetiste e donce sin un istoria scriveda tra multe sentenios a pos.

La preistoria jenetical de Europa[edita | edita la fonte]

La istoria jenetical de Europa ia es deduida de la oserva de varias jenetical tra la continente e areas visina. Analisa de ADN – spesial de la mitocondrios e la cromosoma Y – ia estende multe la sabes. Ance, siensistes ia ave alga fortuna en la salva de partes de la ADN de persones antica preservada.

La analise ia mostra ce umanas moderna ia entra Europa de Asia sude-ueste ante la estende masima de la glasias resente, ma ia retira a refujias en Europa sude (Espania, Italia, la Balcanes, e Ucraina e Rusia sude). Pos cuando la glasias ia retira, la poplas ia estende tra tota Europa, con migra limitada de Asia sude-ueste.

La preistoria linguistica de Europa[edita | edita la fonte]

Nos no conose cual linguas ia es parlada en Europa preistorial. On ia ave probable multe familias de linguas ala. Tre grupos ia survive a la presente: La linguas indoeuropean, la linguas uralica e euscara. Ance, nos ave atestas de otra linguas nonrelatada con esta tre: etrusca en Italia norde, tartessos en Espania sude, iberian en Espania ueste, e la linguas orijinal de elas, criti, e la isolas prosima.

La plu de la linguas de Europa es oji indoeuropean. La orijin de esta popla es natural nonconoseda, e teorias difere. La teoria la plu popular es ce los deriva de un popla militar de Ucraina e Rusia sude, ma otras crede ce la Balcanes o Anatolia es plu probable. Alga teoristes sujesta ce la linguas indoeuropean ia esiste continuante tra Europa, de ante la eda de glasias resente.