Cultur Afanasevo

De Vicipedia
Un mapa con un estima de la area de la popla afanasevo
Lago Canas, en la Montes Altai

La cultur Afanasevo (rusce: Афанасьевская культура) es la cultur arceolojial la plu temprana conoseda de Sibir sude, en la basin Minusinsk e la Montes Altai en la eda eneolitica, sirca 3300 a 2500 aec. Lo es nomida per un monte prosima, Gora Afanasieva (rusce: Гора Афанасьева).

La afanasevos ia es posible desendeda de popla ci ia migra sirca 3700 a 3300 aec tra la stepe eurasian de la cultur Repin de la rejion don-volga (es posible con membros de la cultur Iamna visina. Per sua loca jeografial e dati, siensistes ia lia la afanasevanos a la lingua prototocarian.

Tombas con persones multiple no ia es noncomun per esta cultur. Semeteros afanasevo ia inclui ambos enteras individua e peti coletiva, con la mor tipal flexeda sur sua dorso en un escava. La escavas a es ordinada en ensircas retangulo o a veses sirculo marcada par mures de petra. Lo es suposada ce la enteras ia representa tombas familial con cuatro o sinco ensircas composante la grupo sosial loca.

La economia afanasevo ia inclui boves, oveas, e capras. Resta de cavalos, o savaje o domada, ia es ance trovada. La popla afanasevo ia deveni la produores de comedas prima en la area. Utiles ia es fabricada de petra (axas, puntos de flexas), oso (oncas per pexa, puntos), e corno. Entre la pesos de corno es ojetos cual ia es identifiada como pesos de jeno posible per cavalos. Representas artal de veculos con rotas trovada en la area ia es atribuida a la cultur Afanasevo. Ornas de cupre, arjento, e oro ia es ance trovada.

Per sua multe marcas atribuida a la indoeuropeanes temprana, como usa de metal, cavalos, e veculos con rotas, e relatas cultural con la cultures de curgan, on suposa ce la afanasevos ia parla indoeuropean. Jenetical, afanasevos no es distinguable de la popla iamna. Restas de omes ia es determinada como membros de la aplogrupo R1b, la plu comun aplogrupo de la iamnas e popla de Europa ueste moderna.