Cultur Vinča

Un mapa de la estende de la cultur Vinča

La cultur Vinča (vintxa), ance conoseda como la cultur Turdaș o Turdaș–Vinča, es un cultur arceolojial de la eda neolitica en Serbia e partes de Transilvania en Romania, datida a la periodo 5700 a 4500 aec. Lo es nomida per sua loca tipal a Vinča-Belo Brdo, descovreda par arceolojiste serbsce Miloje Vasić en 1908. Lo ia es un colonia grande distinguida par la model de coloni e condui ritual. Tecnicas de cultiva ia es prima introduida a la rejion en la periodo de la neolitica prima temperada, e ia es plu developada par la cultur de Vinča. Esta ia permete un buma de popla e ia produi alga de la colonias la plu grande en Europa preistorial. La colonias ia manteni un grado alta de uniformia tra la intercambia de cosas ritual a distantes longa, ma probable no ia es unida political. La cultur es famosa per sua figures de animales e umanas, e per la usa de simboles, cual algas sujesta es la forma la plu temprana de protoscrive, ma la plu de espertas crede es sola decoras. An si la cultur no es normal videda como parte de la eda de cupre, lo es la esemplo la plu temprana de metalurjia de cupre.

Jeografia e demografia

La cultur Vinča ia abita un rejion de Europa sude-este (pd la Balcanes), corespondente xef a Serbia, Cosovo, e partes de Romania, Bulgaria, Bosnia, Montenegro, Macedonia, e Elas moderna.

Esta rejion ia es ja colonida par sosias cultivante de la neolitica prima temperada, ma en la periodo de Vinča, la crese de popla ia condui a un nivel nonpresedente de grandia e densia, plu grande ca cualce otra cultur european de la eda. En alga casos, los suprapasa la sites de la Ejean e de la eda bronze temprana de Asia sude-ueste un milenio plu tarda. Un de la locas la plu grande ia es Vinča-Belo Brdo, aora un suburbe de Beograd, cual ia covre 29 ectare e ia ave tan multe como 2500 abitantes. La densia de colonias de Vinča temprana ia es 50 a 200 persones per ectare. Un loca ia es a Stubline de sirca 4850 aec, con un cuantia masima de popla de sirca 4000.

En sua fase plu tarda, la sentro de la rede de Vinča ia move de Vinča-Belo Brdo a Vršac, e la intercambia de fabricadas de osidian de Magiar moderna e e spondilo la Ejean ia deveni plu importante ca la figures de Vinča. Ultima, la rede ia perde sua coere e ia declina. Lo es posible ce, pos du milenio de cultiva intensa, la stresa economial causada par la descrese de fertilia de la solo ia es partal culpable per la declina.

Cultiva e fabrica

La cultiva de la cultur ia introdui trigo, avena, e lino a Europa temperada, e lo ia usa orzo plu ca cualce otra cultures de Europa. Esta inovas ia crese la furni de colies e ia permete la fabrica de vestes de stofas de plantas en ajunta a de animales (pd lana e cuoro). On ave alga evidentes nondireta ce la cultivores de Vinča ia usa arados traeda par boves, cual ta pote ave un efeto major a la cuantia de labora umana nesesada per cultiva, e a la abri de areas nova de tera per cultiva. Multe de la locas la plu grande es a rejiones con tipos de solo cual ta nesesa aradi.

Areas cual no ia debe es cultivada ia es usada per pastoria transumante, en cual grupos de vilas de areas basa ta move sua bestias a areas alta prosima, saison par saison. Boves ia es plu importante ca oveas e capras, e (plu ca en otra cultures de la eda) los ia es usada per lete, cuoro, e per trae arados plu ca per carne. La moves saisonal a areas alta ia es ance usada per esplota la recursas de petras e minerales.

An si la cultur ia foca cresente sur plantas e animales domada, la economia ia usa ance recursas savaje. Un parte importante de la dieta de la popla de Vinča ia es composada de servos, senglares, uros, carpas, pex gatines, avias, sereales savaje, e frutas e nozes de la foresta. Ma estas ia es min importante ca la plantas cultivada e la animales domada.

Jeneral, fabrica en la rede de Vinča ia es fada a la nivel de la casa: On ave evidentes minima per spesiali economial a la nivel de la individua. An tal, alga ojetos fabricada mostra multe capasia tecnical. Un tecnica de du niveles ia es usada per produi vasos con surfases briliada o de multe colores, conoseda como "negra covreda" e "vasos de arco de sielo". A veses, sinabar e limonite polvida ia es aplicada a la arjila coceda per decora. La stilo de vestes pote es deduida de la figures con camisones con colos abrida e faldas decorada. Stofa ia es texeda de e lino e lana, e botones ia es fada de petra o concas ia es ance usada.