Cultur de amforas globin

De Vicipedia
Jump to navigation Jump to search
Un mapa de Europa en la milenio tre aec
Un vaso globin

La cultur de vasos globin (de la deutx Kugelamphoren-Kultur, cortida a KAK), sirca 3400 a 2800 aec, es un cultur arceolojial en Europa sentral. Marija Gimbutas ia crede ce la cultur ia es indoeurpean e la asendente de la linguas germanica e baltoslavica, ma studias jenetica resente ia mostra clar ce lo ia es liada a la cultivores neolitica de la balcanes, e no de invadores de la stepes rusce.

La cultur ia es segueda par la cultur de vasos cordida. Lo ia es bordada par la cultur Baden a la sude-ueste e la cultur Narva a la norde-este. Lo ia ocupa multe de la mesma area como la cultur de vasos embutin cual ia presede lo. La nom per la cultur ia es creada par Gustaf Kossinna per la seramica notable, vasos en la forma de un globo, con du a cuatro manicos.

La economia ia es fundida sur la eleva de bestias variosa, porcos spesial en la fase temprana, en contrasta a la prefere per boves par la cultur de vasos embutin. Vilas es sperdeda vasta, e no bon indicas de casas ia es ja escavada. Lo es posible ce alga de esta vilas no ia es permane, o ce los no ia es abitada tra la anio intera.

La cultur es reconoseda par sua enteras. Persones ia es enterada en un caveta o un caxa de petra o lenio. Un varia de ofres ia resta, incluinte partes de animales (pe un mandibula de un porco) o an un animal intera (pe un bove). Donadas ia inclui la vasos tipal e axas de petra. On ia ave ance enteras de bestias, comun en duples, acompaniada par donadas. Alga enteras ia usa tombas de la eda megalitica.