Cultur Narva
La cultur Narva (o la cultur baltica este, sirca 5300 a 1750 aec) ia es un cultur arceolojial de la eda neolitica european trovada en cual es oji nomida Esti, Latvia, Lietuva, e partes visina de Polsca, Bielarus, e Rusia. Seguente la cultur Kunda de la mesolitica, la cultur Narva ia continua asta la comensa de la Eda de Bronze. La tecnolojia ia es xasor-colior. Lo ia es nomida per la Rio Narva en Esti.
La popla de la cultur no ia ave multe asede a petra de foco, e donce ia es forsada per intercambia e conserva lo. Per esemplo, on no ia trova multe testas de flexas e la petra ia es frecuente reusada. La cultur ia depende plu sur materias local, como osos, cornos, e xiste. Persones ia es enterada sur sua dorsos con poca benes de entera. La cultur ia usa e intercambia ambar. Un de sua fabricadas plu famosa es un basto ritual de corno siselida como la testo de un alce fema, trovada en Sventoji, Lietuva.
La popla ia es xef pexores, xasores, e coliores. Los ia comensa lente la adota de eleva animales en la neolitica media. Los no ia es nomada e ia abitada la mesma vilas per periodos longa, como mostrada par multe seramica, montones, e strutures construida prosima a lagos e rios per aida pexa. La vasos ia ave similes con la cultur de vasos petenida, ma con alga cualias unica. Un de acel cualias ia es la misca de arjila con otra materia organica, como cascos de caracoles. La vasos ia es construida de bandas de arjila de 6 a 9 cm larga. La altia e largia ia es comun la mesma. La basas ia es puntida o ronda, e sola la esemplos plu tarda ia ave basas magra e plata. De la media de la eda neolitica, la vasos ia es plu e plu influeda par la cultur de vasos cordida.
Jeneral, arceolojistes crede ce la cultur ia es finica. Ma lo pare ce lo ia es influeda par la popla baltica veninte de la sude.