Cultur de vasos cordida

De Vicipedia
Jump to navigation Jump to search
Un mapa de la cultur de vasos cordida, con otras de la mesma eda
Esemplos de vasos cordida
Esemplos de axes de gera

La cultur de vasos cordida es un "orizon" arceolojial vasta de Europa entre sirca 2900 a 2350 aec, de la neolitica tarde, tra la eda de cupre, e fininte en la eda de bronze temprana. Lo ia inclui un area grande, de la rio Reno a la ueste a la rio Volga a la este, partes de Europa norde, sentral, e este.

La nom "cultur de vasos cordida" es un tradui de la deutx Schnurkeramik-Kultur, prima introduida par la arceolojiste deutx, Friedrich Klopfleisch en 1883. La nom refere a la impresas o ornas cordin en sua vasos. Lo ia es ance nomida la cultur de enteras singular, per sua tombas, e la cultur de axes de gera, de la axas comun incluida en la tombas de omes.

Seguente W. Haak, la popla de la cultur ia es relatada jenetical prosima a la popla de la Cultur Iamna de la steppes de Ucraina e Rusia sude. Un teoria popular es ce la cultur iamna ia es composada de la popla protoindoeuropean, e ce los ia invade rapida par gera o lente par influe de cultur la areas de la cultur de Europa norde e este. La combina de la cultur Iamna e la cultures presedente de la area ia crea, seguente la teoria, la cultur de vasos cordida. Esta teoria sujeste ance ce la cultur de vasos cordida ia sperde la linguas protogermanica a protobaltoslavica. Plu, la cultur de vasos cordida ia mostra alga similia jenetica con la cultur sintashta, cual apare plu tarde, e ce esta ia es la orijin de la linguas protoindoiranica.

Arceolojistes nota ce la cultur de vasos cordida no ia es un cultur unida, car grupos cual ia abita un area jeografial tan vasta ia ave economias e modos de susista cual varia par rejion. A la mesma tempo, los ia ave alga cualias compartida trovada en tota grupos de la cultur, como sua metodos de entera, la vasos cordida, e la axas unica.

La cultur de vasos campanin ia coaveni partal con la estrema ueste de esta cultur, ueste de la rio Elbe, e ia contribui posible a la sperde de la cultur. An si la organiza sosial e ordina de colonias ia es simil a la cultur de vasos campanin, la cultur de vasos cordida no ia ave alga de la refinas cual ia deveni posible tra la intercambia e comunica par mar e rios.

Esta cultur ia es presededa par la cultur Narva de Europa norde-este, la cultur de vasos embutin e la cultur de amforas globin de Europa norde-sentral. Lo esta segueda par la cultur de vasos campanin de Europa ueste, e la cultur Andronovo en Sibir ueste.

Fontes[edita | edita la fonte]

Beckerman, Sandra Mariët (2015). Corded Ware Coastal Communities: Using ceramic analysis to reconstruct third millennium BCE societies in the Netherlands. Leiden: Sidestone Press.

Haak, W.; et al. (1 June 2015). "Massive migration from the steppe was a source for Indo-European languages in Europe". Nature. 522 (207–211)