Cultur Andronovo

De Vicipedia
Jump to navigation Jump to search
La estende de la cultur andronovo
La stepe de Cazacstan

La cultur Andronovo es un colie de cultures simil de la eda bronze cual ia flori sirca 2000 a 900 aec en Sibir ueste e la stepe eurasian sentral. Alga arceolojistes prefere nomi lo un orizon o complesa. La cultur Sintaxta (2100 - 1800 aec) ia es incluida en la cultur Andronovo en la pasada, ma es aora videda como sua presedente, ma asetada como un parte de un orizon Andronovo plu vasta.

La plu de rexercores asosia la orizon Andronovo con la linguas indoiranian plu temprana, ma lo ia pote coaveni con la area temprana de parlores de linguas uralica a sua partes norde.

Seguente studias jenetical, la cultur Andronovo e la cultur Sintaxta presedente ia es partal derivada de la cultur de vasos cordida, car la proportio de jenetica cual es simi a lo de la cultivores temprana de Europa, como la jenetica de la popla de la cultur de vasos cordida.

La estende jeografial de la cultur es vasta e difisil deliniada. A la franjes ueste, lo ia coaveni partal con la cultur Srubna cuasi contempora en la area de la prosimi de la Rio Volga e Rio Ural. A la este, lo estende a la basin Minusinsk, con alga locas tan ueste como la Montes Ural sude, coaveninte partal con la cultur Afanasevo plu temprana. Alga plu locas es sperdeda tan sude como la Copet Dag (Turcmenistan) e la Tian Xan (Cirgistan). La borda norde coresponde partal a la comensa de la taiga. Plu resente, la evidente per la presenta de la cultur en Xinjiang en Xina ueste ia es ance trovada.

La cultur Andronovo es composada de e comunias xef movante e comunias en vilas peti. Vilas es spesial dominante en la partes en Asia sentral. Fortreses inclui fosos, rivas de tera, e sercas de palos, de cual sirca 20 ia es descovreda. Vilas andronovo ia conteni tipal sirca du a 20 casas, ma vilas de tan multe como 100 casas ia es descovreda. Casas andronovo ia es tipal construida de lenio de pino, sedro, o betul, e ia es plu comun aliniada e supravide la rivas de rios. Casas plu grande es de 80 a 300 m2, e parteni pobable a familias estendeda, un cualia tipal de indoiranianes temprana.

La mor ia es enterada en cameras de lenio o petra su curganes (tumulos) o ronda o retangulo. Enteras ia inclui bestias, veculos con rotas, pesos de jenas per cavalos, e armas, seramicas, e ornas. Entre la restas la plu notable es la enteras de caros, datida de sirca 2000 aec e posible plu temprana. La caros ia es trovada con duples de cavalos, e la entera ritual de la cavalo en un culta de "testa e ungulas" ia es ance trovada. Alga mores andronovo ia es enterada en duples, de adultes o un adulte e un enfante.

Bestias ia inclui boves, cavalos, capras, oveas, e cameles. La porco domada es asente, tipal de un economia movante. La persento de boves entre restas es clar plu alta ca entre sua visinas ueste de la cultur Srubna. La cavalo ia es usada per e monta e trae. Cultiva ia jua ance un rol importante en la ecnomia. La cultur Andronovo es notable per avansas rejional en metalurjia. Los ia mina depones de minerales de cupre en la Montes Altai de sirca la sentenio 14. Ojetos de bronze ia es comun, e fabricerias ia esiste per labora con cupre.

Multe eruditas asosia la cultur Andronovo con la indoiranianes. La cultur es ance atribuida con la inventa de la caro con rotas con raios sirca 2000 aec. La lia de la cultur con la indoiranianes es suportada par la distribui de nomes irani per locas tra la orizon Andronovo e par la evidente istorial de domina par popla variosa irani, incluinte la sacas (scitianes), sarmatianes, e alanes tra la orizon Andronovo en la milenia prima aec.