Cultur de vasos campanin

De Vicipedia
Jump to navigation Jump to search
La estende masima de la cultur de vasos campanin
Un esemplo eselente de un vaso campanin, de Espania

La cultur de vasos campanin es un cultur arceolojial nomida per la vaso per bevi en la forma de un campanin inversada usada a la comensa de la eda de bronze de Europa. Comensante sirca 2800 aec e durante en Europa continental asta 2300 aec, en Britan asta tan tarde como 1800 aec. La cultur ia es sperdeda tra Europa ueste, de rejiones variosa en Iberia e locas fasante Africa norde a la planos danubian, Britan e Er, e la isolas de Sisilia e Sardinia.

La cultur segue la cultur de vasos cordida e, per Europa norde-sentral, la cultur de vasos embutin. En sua fase temprana, la cultur ia pote es videda como un cultur contemprana ueste de la cultur de vasos cordida. De sirca 2400 aec, la popla de la vasos campanin ia estende a la este, a la orizon de la vasos cordida. En partes de Europa sentral e este, tan distante como Polsca, un segue aveni de vasos cordida a vasos campanin.

Esta periodo marca un eda de contata cultural entre Europa Atlantica e Europa ueste, seguente un periodo longa de isola relativa en la neolitica.

En sua fase matur, la cultur de vasos campanin es videda como no sola un colie de tipos tipal de fabricada, ma un fenomeno cultural e complicada cual inclui obras de cupre e oro, xuta con arcos, spesial tipos de ornas, e (on suposa) ideas ideolojial, cultural, e relijiosa compartida. Un estende vasta de diversia rejional continua en la cultur de vasos campanin tarde, spesial en la stilos de entera local, incluinte casos de seni en loca de entera, stilos de casas, modo de economia, e seramica local unica.

La orijina de la vasos campanin ia es trasada a la milenia tre temprana en la estuario de la Rio Tago en Portugal. Alga rexercores ia indica ce asendentes de la stilo pote es trovada en Africa norde, cual sujeste ce la stilo campanin ia es la resulta de contatas par mar entre Iberia e Maroco en la dui prima de la milenio tre aec. La moves comensante de la estuario ia es par mar. Un move a sude ia crea grupos de la cultur en Espania sude-ueste e Frans sude sirca la Golfo de Leon e a la vale de la Rio Po en Italia, probable par vias antica de intercambia tra la Alpes ueste, usada per distrigui axas de jadita.

Un move a la norde ia inclui la costa sude de Armorica. La enclave fundida en Bres sude ia es liada forte con la vias de la rios, via la Rio Loire a la vale de la Rio Seine e alora a la Rio Reno basa. Esta ia es un via vea videda en la distribui temprana de axas de petra. Via esta rede, la vasos campanin ia ateni la Reno basa en sirca 2600 aec.

La produi la plu temprana de cupre en Er, a Isola Ross en sirca 2400 a 2200 aec, ia es asosiada con la vasos campanin temprana. Asi, la minerales local ia es fundida per produi la axas prima de cupre en Britan e Er. La mesma tecnolojias ia es usada en la rejion de la Tago e en la ueste e sude de Frans. Los sujeste ce la sperde de la cultur ia es asosiada direta con la xerca per cupre e otra materiales rara.

Un estende longo la Rio Danubio alta a la basin de Wien en Osteraic, e a Magiar e Txecia, e otra enclaves en la area de Deutxland sude e Polsca sude-ueste, ia esiste ance, con un misca de la cultur de vasos campanin e otra cultures. Ma on ave min evidentes per un penetra plu direta en la este.