Etrusca (sivilia)

De Vicipedia
Jump to navigation Jump to search
Etruscan civilization map.png

La sivilia etrusca es la nom donada a la sivilia de Italia antica en la area cual coresponde prosima a Toscana moderna, Umbria ueste, e Latium norde. La romanes antica ia nomi la creores de esta sivilia la Tusci o Etrusci. Esta nomes es la orijina de la nomes "Tuscana" e "Etruria". En elinica antica atica, la etruscas ia es nomida la Τυρρηνοὶ, de cual la romanes ia deriva la nomes Tyrrheni, Tyrrhenia, e Mare Tyrrhenum. La etruscanes mesma ia nomi se Rasenna, cual ia deveni sincopada a Rasna o Raśna.

Esta sivilia ia dura en Italia de sirca 800 aec tra la cultur de la eda de fero e la cultur Villanova. Esta cultur ia sede a un cultur forte influeda par la visinas e mercatores elinica en Magna Graecia (Elas grande) de Italia sude. Pos 500 aec, la fortuna de Italia ia parti de la controla de la etruscas. Los ia es asorbeda par la republica de Roma en la sentenio prima aec.

La orijinas de la etruscas no es conoseda. Istoristes no ave leteratur, testos de relijio o filosofia. Donce, la plu parte de nosa conose de los es derivada de la benes trovada en tombas. La ipotese la plu comun es ce los ia es nativa a la area, probable derivada de la cultur Villanova. Alga siensistes crede ce los ia migra de Asia sude-ueste, posible Anatolia. Los ia estende sua potia a la norde ultra la Apeninas e a Campania. La mina e vende de metales, spesial cupre e fero, ia rici la etruscas e contribui a la crese de sua influe en Italia e la Mediteraneo ueste. Esta estendes ia condui los a un fronti con la elinicas, spesial en la sentenio ses aec, cuando la elinicas ia fundi colonias longo la costa de Frans, Espania e Corse. Esta ia condui la etruscas a un alia con la punicas, ci ia fronti ance la elinicas.

Sirca 540 aec, la batalia de Alalia ia cambia la distribui de potia en la Mediteraneo ueste. An si la batalia no ia ave un ganior clar, Cartago ia pote estende sua influe a la costa elinica, e Etruria ia es restrinjeda a la Mar Tirenia norde, ma con posese de Corse completa. La situa nova ia sinia la comensa de la desende etrusca par sua perde de sua provinses sude. En 480 aec, Cartago ia es vinseda par la elinicas de Magna Graecia, gidada par Siracusa. Alora, en 474 aec, Hiero (tirano de Siracusa) ia vinse la etruscas a la batalia de Cumae. Esta ia redui la controla de Latium e Campania, e la romanes e la samnitos. En la sentenio cuatro, la galos ia invade la vale de la Po e la costa Adriatica. Entretempo, Roma ia comensa ajunta sites etrusca, cual ia comensa la perde de la provinses etrusca norde. Etruria ia es concistada par Roma en la sentenio tre aec.

La etruscas de la periodo istorial ia ave un governa cual ia es esensal un teocratia, con alga restas de xefia e formas tribal. En esta los ia difere de la italicas sirca los, ci ia ave xefes e tribus. Roma ia es la stato prima de la italicas, ma lo ia comensa como un stato etrusca. On crede ce la governa etrusca ia cambia de un monarcia completa a un republica oligarcal (como la republica roman) en la sentenio ses aec, an si esta no ia aveni en tota la statos-sites.

Como un teocratia, la governa ia es la autoria sentral supra tota organizas tribal o familial. Lo ia ave la potia de vive e moria. En fato, la gorgon, un simbol antica de acel potia, apare como un motif en decora etrusca. La unia political fundal ia es la stato-site, probable nomida la methlum ("distrito"). La testos etrusca ave nomes per judores, sin indica de sua roles, pe la camthi, la parnich, la purth, la tamera, la macstrev, etc. La popla ia es la mech, e la renor xef de un methlum ia es probable un zilach.

Etruskischer Meister 002.jpg

La tombas de la aristocratas ia es per familias, no per individuas. Esta indica un developa de un idea de la familia aristocrata simil a, e cisa la model per, la gens de Roma. La crese de esta clase es relatada a la oteni de valuadas tra comersia. La sites la plu rica ia es prosima a la costa. A la sentro de la sosia ia es la duple sposida, la tusurthir. La sosia etrusca ia es un sosia monogamiste.

Otra sosias de Italia ia crede ce la femes etrusca es promiscua, ma sua condui no es unica a la etruscas. Plu, la festas de promiscuia ia ave sinifias relijiosa. Per esemplo, la abrasa nuda (symplegma) ia ave la potia de forsa malia a via. Ance, la esposa de la senos ia ave la mesma potia. Lo es ance posible ce la credes de la romanes e elinicas sur la femes etrusca ia es un malcomprende de la rol de femes en la sosia etrusca. En Elas e Roma, femes virtuosa ia es restrinjeda a la casa, e asosia entre la sesos no ia aveni. Tal, la libria de femes en sosia etrusca ia ta pote es malcomprendeda como indicante sua disponablia sesal. Nota ce alga tombas etrusca ave enscrives en la model "X, la fio de (nom de padre) e (nom de madre)", cual indica la importa de la lado madral de la familia. Lo es posible ce la sosias preindoeuropean de Europa ueste ia es plu matrilineal, un tradision cual on vide ance en la euscaras e partal adotada par la celtas antica.

La etruscas, como la elinicas e romanes antica, ia ave un tradision militar importante. Lo ia marca la grado e potia de alga individuas en la cultur, e gera ia es un benefica economial per la sosia. Como multe sosias antica, la etruscas ia reali campanias en la mensas de estate, cuando los ia ataca sua visinas per gania plu teritoria, onora, benes e sclavos. Prisonidas ia pote es rescatida o sacrifiada a la tombas de xefes etrusca.

La relijio de la etruscas ia es un forma de politeisme, e tota cosas ia es videda como un mostra de la potia de la dios. Du profetas ia instrui la etruscas en la modos de sabe la vole de la dios: Tages, un xico ci ia nase de tera aradida, e Vegoia, un fem. Dios ia inclui Catha e Usil (la sol), Tivr (la luna), Selvans (un dio de la site), Turan (ama), Laran (gera), Leinth (moria), Maris, Thalna, Turms, e Fufluns (dio de la popla). Supra esta dios ia es dios plu alta, derivada de la indoeuropeanes: Tin o Tinia (la sielo), Uni (sua sposa), Cel (la tera), Aritimi, Menrva, e Pacha. Los ia prende ance alga eroes elinica de la naras de Homero. Vide Etrusca (relijio) per plu detalias.

La arciteta de la etruscas antica ia es adotada de la arciteta elinica, ma ia es ajustada per crea un stilo unica. Plu tarda, los ia influe forte la arciteta de la romanes. Roma mesma es un arcivo de arciteta etrusca.

La arte etrusca ia es figurin, spesial en la forma de scultas de teracota (spesial la sculta de grandia natural a la sarcofagos e templos), scultas en bronze moldida, depintas mural, e obras de metal (spesial la mirores bronze gravada). On ia ave ance un tradision de vasos pintida. Arte etrusca ia es forte juntada a relijio, e la mundo pos mori ia es un tema major.

On pote vide la strumentos musical de la etruscas en frescos e relevas basa. Los mostra strumentos diversa de venta, como la plagiaulos (flautas de Pan), flautas de alabastro, e flautas duple; strumentos de percute como la tintinnabulum, tympanum, e crotales; e plu tarda, strumentos de cordetas como la lira e la kithera.

La lingua etrusca no es bon conoseda. Lo es clar ce lo no es un lingua indoeuropean. Lo pare es relatada a retica (de Italia norde-este) e lemnian (de la isola Lemnos). Per plu sur la lingua, vide Etrusca (lingua).