Cultur Ertebolle

De Vicipedia
Jump to navigation Jump to search
La periodo neolitica media en Europa
Un vaso de la cultur Ertebolle

La cultur Ertebolle (sirca 5300 - 3950 aec; dansce - Ertebølle, pronunsiada [ˈæɐ̯dəˌbølə]) es la nom de un cultur xasor-colior e pexor, e seramicor datida a la fini de la periodo mesolitica. La cultur ia es consentrada en Scandinavia sude, ma lo ia ave lias jenetical a cultures simil en Deutxland norde e Nederland norde. Lo es nomida per la loca de tipo, la vileta peti de Ertebølle a Limfjorden en Jutland, Danmarc. En la desenio de 1890, la Museo Nasional de Danmarc ia escava montones de concas de ostras, miscada con multe caracoles, osos, e fabricadas de oso, antler, e petra de foco, cual ia es evaluada como dejetadas de cosina. La cultur es multe simil a la cultur ellerbek de Schleswig-Holstein, nomida per la vileta Ellerbek prosima de Kiel, Deutxland.

En la desenios de 1960 e 1970, un otra cultur multe simil ia es trovada en la Noordoostpoldor en Nederland, prosima a la vileta Swifterbant, cual ia dona la nom a la cultur swifterbant. Lo mostra un cambia de xasor-colior e eleva de animales - xef boves e porcos, e la cultiva de orzo e trigo emmer. Como la cultur Ertebolle, los ia abita prosima a acua abrida, en esta caso la rietas, dunas de rio, e pantanes longo la rivas posglasial de la Overijsselse Vecht. En la pasos forminte, contata con la cultur de vasos linial de vilas en Limburg ia es detetada.

Escavas resente mostra un continui local a, a min, 5600 aec, cuando la metodos de entera ia sembla la campos enteral en Danmarc e Sveria sude en tota detalias. Lo ia sujeste ce sola parte de un erita diversa ertebollin ia continui a la tradision swifterbant de la neolitica media (4200 - 3200 aec).

La cultur Ertebolle ia es cuasi contempora con la cultur de vasos linial, la produores de comedas a la sude. La popla de Ertebolle no ia cultiva ma ia usa gran en alga grado, cual ia debe es otenida de la popla a sude.

La cultur Ertebolle ia repone la cultur kongemose plu temprana de Danmarc. Lo ia es limitada a la norde par la cultur nostvet e cultur lihult. Lo es divideda entre un fase temprana en sirca 5300 - 4500 aec e un fase tarde en sirca 4500 - 3950 aec. Pronto pos 4200 aec, la cultur Ertebolle ia comensa estende longo la costa de la Mar Baltica a min tan distante como Rugen. Pronto pos, lo ia es reponeda par la cultur de vasos embutin.

En anios resente, arceolojistes ia trova ce la acronim EBK (de deutx: Ertebolle Kultur) conveni, paralel a la LBK per la cultur de vasos linial (en deutx: Linearbandkeramik) e TRB per la cultur de vasos embutin (en deutx: Tirchterbecher).

Ambiente[edita | edita la fonte]

La cultur Ertebolle ia aveni entre la periodo de clima atlantica e la fase litorinal de la basin de la Mar Baltica; cual es per dise, la clima ia es plu calda e umida ca oji, forestas caduca ia covre Europa, e la Mar Baltica ia es a niveles plu alta ca oji, e pote inonda a 5 o 6 metres plu alta ca oji. Jutland ia es un arcipelago. Pantanes ia es estendente, con partes de acua basa rica con pex. La ambiente mesma ia invita tal coloni.

La popla Ertebolle ia coloni sur capos, prosima o sur plaias, sur isolas, longa rios e estuarios a via de la forestas densa. La ambiente ia es la plu simil a la Mar Wadden parte de la Mar Norde de Nederland a Danmarc. La resulta de la cambias de niveles de mar en la periodo de la cultur Ertebolle es ce multe de la vilas es aora su 3 a 4 metres de acual. Algas ia es escavada par arceolojia su mar. La fabricadas es en states eselente de preserva, car lo ia es protejeda par la fango nonairobial. A la otra lado, moves de acua ia disturba multe abitadas.

Restas cultural[edita | edita la fonte]

La popla Ertebolle ia deriva sua nesesas en un varia de modos, ma xef de la mar. Los ia flori, manteni sua sania, e reprodui con un dieta de pex. Los ia es la mestres de la acuas interna, cual los traversa en canoas escavada con remos. Como multe poplas en istoria, los ia pote xasa balenas e focas de sua canoas. Sua materias ia es xef lenio, con osos, cornos, e petra de foco per funsiones cual nesesa surfases plu cur. Casas ia es xef construida de arboretas o lenio lejera. La materias coraji nos per vide los como abitantes temporal. Ma los ia pote ance pone la mor en semeteros usada per tempos longa. Posible la locas de abita ia es tempora, ma la teritorios no ia es tal.

Antropolojia fisical[edita | edita la fonte]

Restas sceletal es alga poca. Los ia es studiada e descriveda en detalia en la modo de antropometria. Sin usante la lingua spesial, la concluis major es esta: La popla Ertebolle e la popla presedente kongemose ia es de un tipo miscada. A un lado, los no ia difere multe de sceletos de la abitantes de Danmarc oji, ma la cualias de texeda mol, cual es conoseda sola tra reconstrui, pote es plu variada.

Multe cranios mostra marcas fasal o mesuras de la cromagnon. Esta tipo ia domina la periodo paleolitica tarde en Europa, reponente la neandertales. Analise jenetical par la siensistes de la Universia de Ferrara en Italia indica ce la cromagnones ia es asendentes de la popla de Europa oji.

Evidente de desacorda[edita | edita la fonte]

On ave alga evidentes de desacorda entre vilas Ertebolle: un testa de un flexa en la pelvis a Skateholm en Sveria; un punto de oso en un garga a Vedbæk, Zealand; un punto de oso en un peto a Stora Biers, Sveria. Plu sinifiante es evidente de canibalisme a Dyrholmen, Jutland, e Møllegabet a Ærø. On ave osos umana cual ia es rompeda per oteni la medula de oso. Car canibalisme no es praticada per oteni nuri, la esplica plu probable es ce la popla Ertebolle gerosa ia come ritual sua enemis per consuma sua potias.

Cultures simil[edita | edita la fonte]

La cultur Ertebolle es un de un tipo jeneral nomida mesolitica tarde, de cual otra esemplos pote es trovada en la cultur swifterbant, cultur zedmar, cultur narva, e en Rusia. Algas ta inclui la cultur nostvet e la cultur lihult a norde ance. La loca variosa par fratida e isolada, ma esta cualia pote es un acaso de descovre. Posible, si tota la locas su mar ia es conoseda, un cultur costal continuante ta apare de Nederland a la lagos de Rusia; ma esta debe alora es demostradas.

Pexa[edita | edita la fonte]

La comeda xef de la cultur Ertebolle ia es pex. Tre metodos de pexa ia es usada:trapa, onca, e lansa. Per trapa pex, la pexores ia construi sercas de bastones de nozeto sirca 4 metres de longia, situada vertical en la fango a la fondo de acua basa. La pex ia debe es ensircida par alga metodo e alora colieda. Trapas de vim ia es ance usada.

Pexores de la cultur ia pexa ance con oncas fabricada de la osos de servos roja, de cual a min un esemplo ia es trovada con la filo afisada. Los ia pexa ance con lansas fabricada de ases a cual dentes de nozeto ia es afisada. La barcos ia es canoas escavada min ca un metre de larga, propulsada par remos construida de ases a cual rondas folin o corin de lenio ia es afisada. Un strato de arjila ia es sperdeda a la fondo de la canoa per suporta carbones calda, cual ia es nesesada si on ta spende multe oras a la acua.

Deses de spesies de pex ia es trovada en la montones de dejetas. Plu comun es lusios, coregones, gados, e molvas a Østenkaer; anxoas, spinosas, e angilas a Krabbesholm; pexes plata, selacos a Yderhede; arenges, carpas, e percas a Egsminde. La presente de selacos e pexes de mar sujeste ce la pexores de Ertebolle ia vade a mar profonda. Lo no es serta esce los ia vade a mar en la canoas o los ia ave barcos plu grande ance.

A Lystrup Enge, Yderhede, e otra locas, la osos de setasios e focas ia es trovada, spesial de orcas e delfines. Lo es posible ce estas ia es encaliada a la plaias e taliada ala, en loca de es lansada a mar basa. La focas inclui la focas anelida, focas de gronland, e focas gris. Estas ia es comun en la Mar Litorina (la periodo de la Mar Baltica min salosa), ma no trovada en la Mar Baltica de aora. Como la setasios, los ia pote es caturada a plaias o en la acua basa.

La spesies trovada sujeste un demanda: esce la popla Ertebolle ave un industria de xasa setasios e focas, o esce la osos de foraje oportuniste. La taxe de viaja a mar en canoas per arponi setasios cual pote mata la viajores en un momento causa dutas. Ma los ia usa un lampa de gras - un bol peti en cual on pote ensende un peso de gras de balena con un mexa. La usa comun de esta lampa sujeste ce la popla ia xasa balenas plu frecuente ca foraje oportuniste.

Xasa[edita | edita la fonte]

La popla Ertebolle ia xasa comun la servos roja e la caprioles, e ance senglares, alces, e min comun la uros e, rara, un cavalo, probable savaje, cual ia abita la forestas de Europa. En la planos a este, cavalos es sola trovada asosiada con umanes. La senglares ia es aumentada par porcos con eritas miscada de Europa e Asia sude-ueste, otenida tra sua visinas, la cultivores neolitica, tan temprana como 4600 aec.

Animales con pelos valuada ia pote es fasil caturada: la castores, scurales, furones, texones, volpes, e linces. Pelos ia es posible usada per comersia entre tribus. Avias de mar ia pote es xasada en la pantantes e lagetas de la rejion: gavias, pelicanes, fasianes galin, grebes, cormoranes, sinies, e patos. Otras inclui la canes e la volpes, e du serpentes.

Plantas[edita | edita la fonte]

La popla Ertebolle ia colie bacas per come e ance ia preparada un cuantia de plantas savaje, judinte de la restas de semes de plantas cual no pote es comeda sin prepara. De la bacas trovada es frambosas, la rubos gris, fresas savaje. Min saborosa ma ancora comable ia es corneos, spinablancas, sorbos, pomas savaje, e frutas de rosa.

Alga semes ia es preparada como un gaxa en la periodos istorial, como cuercas e gliserias. Radises de la beta maral ia es ance preparada. Acel spesie es la asendente de la betas moderne. Vejetales verde pote es bolida de ortica, armol, e pede de ganso.

Alga pesos de seramica mostra impresas de gran, cual algas sujeste indica la usa de comedas importada de la sude. Serta, los no ia nesesa importa comedas e los ia es probable plu bon nurida ca la popla a sude. Analise de restas ardeda en un vaso indica ce lo, a min, ia es usada per fermente sangue e nozes. Algas ia divina, donce, ce la fermente de gran ia es usada per produi bir.

Final, fratis de stofas de Tybrind Vig ia es texeda en la tecnica de rede de ago de fibres de plantas filida.

Casas[edita | edita la fonte]

La multe vilas a la costa e en la interna varia entre abitadas grande e usada tra la anio e abitadas plu peti usada saisonal. Un vila ia es composada de cabanas, probable de subosca suportada par palos. La cabanas ia es en un ordina nonspesial. Cavetas de foco ia es locada esta la cabanas, cual sujeste ce la plu de funsiones de la vila ia es estra casa, con casas usada posible per no plu ca dormi e reserva. En acel eda la invernos ia es moderada. Un ximine esterna de Ronaes Skae ia es construida como un perimetre de petras sircante un ximineria sur cual lenio ardeda ia es trovada en un motif de raios. La lenio ia es colieda de la costa, e fungos ia es usada per esca.

Seramica[edita | edita la fonte]

Vasos ia es fabricada de arjila nativa miscada con arena, petra craseda, e materia organica. La vasos ia es fabricada par la tecnica de enrola, e ia es ardeda sur un leto abrida de carbon calda. Los no ia es simil a los de la cultur LBK neolitica prosima e pare es relatada plu a la tipo de seramica cual apare prima en la rejion Samara en Rusia sirca 7000 aec, e cual sperde longo la Rio Volga a la Baltica este e alora a ueste longo la costa. (Esta sujeste ce la popla ia es, posible, relatada a la popla uralica, e no a la indoeuropeanes, cual ia es sujesteda par alga linguistes ci nota ce la linguas germanica es la resulta de un suprapone de indoeuropean sur un forma temprana de uralica.)

Du tipos de seramica es trovada: un vaso e un lampa. La vaso ave un dui a su ronda cual magri a la colo, con un borda esvasada. La fondo ia es tipal formida a un punto o bulba (o embuto) de la mesma tipo cual suportada la vaso cuando lo ia es poneda en arjila o arena. On pote imajina un saleta de comedas movable composada de series de vasos poneda aora en la cabana, alora asta la foco, e alora en la strato de arjila a la fondo de un canoa.

La vaso ia es en grandias variosa, de 8 a 50 cm alta e de 5 a 20 cm larga. Decora pleni la surfas intera con bandas orizonal de impresas de ditos o ungias. Plu tarde en la periodo, la tecnica e decora ia deveni cuasi plu variada e sofisticada: la mures de la vasos ia es plu magra e motifes diferente ia es usada per la impresas: xevrones, marcas de cordas, e perforas fada par osos de animales. Manicos ia es a veses ajuntada, e la bordas a supra pote verje a la interna en loca de a estra.

La lampa de gras de balenas ia es moldida de un peso singular de arjila. La usa de tal lampas sujeste ce alga ativia ia aveni en la cabanas cuando la sol ia reposa.

Utiles[edita | edita la fonte]

La fabrica de utiles con petra de foco ia evolui a un nivel alta e unida, con axas con testas peti e flocida, flocos longa e magra como cotelas, e testos de flexas agu. Ma utiles ia es fabricada de multe materiales: puntos e forces de lenio, partes de la cornos de servos, e de osos taliada.

Arte[edita | edita la fonte]

Remos de Tybrind Vig mostra sinias de talia de lenio bon developada e estetica. Esta es un esemplo de la decora de pesos funsional. La popla ia ance brilia e grava pesos nonfunsional - pd per la arte mesma - de pesos de oso o corno. Motifes ia es xef jeometrial con alga representas de animales o persones. Ance presente (pe a Fanø) es representes de avias, senglares, e orsos en ambar. Joalas ia es fabricada de dentes de animales o concas. Lo no es clar si esta pesos ia simboli state o ricia.

Entera[edita | edita la fonte]

Semetero]]s, como los a Vedbæk e Skateholm, dona un cualia de sentante a la vilas. Ocer e cornos de servos ia es poned en alga enteras, ma no otras. Alga distinguis sosial ia pote esiste. On ave ance alga nota de dimorfisme sesal: la femes ia porta colaretas e sintures de dentes e concas. No posa spesial de la corpo ia es usada. E entera e seni ia aveni. A Møllegabet, un person ia es enterada en un canoa, cual algas vide como la comensa de la enteras en barcones de Scandinavia plu tarde.

Skateholm ia conteni ance un semetero per canes. La enteras ia es preparada e decorada la mesma como los de umanas. Lo pare ce la can ia es un animal multe valuada e es comun tratada como un person.