Sorbo
La sorbo (Sorbus aucuparia) es un spesies de arbor o arboreta caduca en la familia de la rosa. Lo es un spesies multe variante e botanistes ia usa definis diferente per lo per inclui o exclui arbores nativa a alga areas; un defini resente inclui arbores nativa a la plu de Europa e partes de Asia e Africa norde. La estende es de Madeira e Island a Rusia e Xina norde. No como multe plantas con distribuis simil, lo no es nativa a Japan.
La sorbo ave un tronca magra con cortex lisa, un corona laxe e rondin, e sua folias es plumin en duples de folietas sur un veno sentral con un folieta a la fini. Lo flori de maio a junio en corimbos de flores jalin blanca e peti e cual developa frutas roja e pomin cual matura de agosto a otobre e es comeda par multe spesies de avias. La planta no es esijente e durante contra jelada, e coloni locas disturbada e nonasedable como un abrivia de vive corta.
La fruta e folias de la sorbo ia es usada par umanas en la crea de platos e bevidas, como un medisin natural, e como un comeda per bestias. Sua lenio durante e flexable ia es usada tradisional per carpenta. Lo es plantada per forti la solo en rejiones montaniosa o como un arbor ornal, e lo ave alga cultivares.