Paleolitica

De Vicipedia
Jump to navigation Jump to search
La xasa de un glitodon
Arte paleolitica de la Cava de Altamira

La paleolitica (de elinica "petra vea") es un periodo en la preistoria de umanas distinguida par la developa orijinal de utiles de petra, cual covre sirca 99% de la periodo de la preistoria tecnolojial umana. Lo estende de la usa la plu temprana conoseda de utiles de petra sirca 3.3 milion anios a ante, a la fini de la plestosene, sirca 11,650 ante aora.

La eda paleolitica en Europa ia presede la eda mesolitica, an si la dato de la traversa varia jeografial par alga miles anios. En la eda paleolitica, umanas ia grupi con lunlotra en sosias peti como bandes familial e ia susiste par colie plantas, pexa, xasa, o foraje animales savaje. La paleolitica es marcada par la usa de utiles de petra, en ajunta lenio e oso. Otra cosas usada como utiles inclui fibres vejetal e cuoro, ma no multe ia survive, la resulta de descomposa.

Sirca 50,000 anios ante aora, un crese marcada de la diversia de fabricada ia aveni. En Africa, fabricadas de oso e la arte prima ia apare en la arcivo arceolojia. La indicas prima de pexa par umanas es ance notada, de fabricadas en locas como la Cava Blombo en Africa sude. Arceolojistes ia clasi estas de la 50,000 anios a ante en multe categorias diferente, como puntos per lansas, utiles per grava, laminas de coteles, e utiles per fora e perfora.

Gradal, umania ia evolui de umanas como Homo habilis, ci ia usa utiles de petra simple, a umanas de anatomia moderna e condui moderna per la paleolitica alta. En la fini de la eda paleolitica, umanas ia comensa produi la obras la plu temprana de arte, e ia partisipa en rituos relijiosa o spirital como entera. La ambiente de la paleolitica ia inclui un colie de periodos glasial e interglasial en cual la clima ia flutua periodal entre temperatures calda e fria. La datos arceolojial e jenetica sujesta ce la poplas fundal de umanas paleolitica ia survive en areas de bosces rarida e ia sperde tra areas de produi alta en cuando evita forestas densa.

Per sirca 50,000 a sirca 40,000 ante aora, la umanas prima ia ariva en Australia. Per sirca 45,000 aa, umanas ia abita asta la latitude 61º norde en Europa. Per sirca 30,000 aa, los ateni Japan, e par sirca 27,000 aa, umanas ia abita en Sibir, plu norde ca la Sirculo Artica. A la fini de la paleolitica alta, un grupo de umanas ia crusi Beringia e sperdeda rapida tra la Americas.