Neandertal

De Vicipedia
un mapa de la estende de la neandertales

Neandertales (Homo neanderthalensis o Homo sapiens neanderthalensis) es un spesies o suspesies de umanas antica estinguida ci ia abita Eurasia asta sirca 40,000 anios ante aora. Los ia deveni estinguida probable par compete con o elimina par umanas modern temprana cual ia migra a Europa o par un cambia grande de clima, maladia, o un combina de estas.

Lo no es clar cuando neandertales ia separa de umanas moderna; studias ia produi periodos variosa de 315,000 a plu ca 800,000 anios ante aora. La tempo de diverje de sua asedente Homo heidelbergensis es ance no clar. La osos la plu vea cual pote es de neandertales es datida a 430,000 anios ante aora, ma la clasi no es serta. Neandertales es conoseda de la cuantia grande de fosiles, spesial de pos 130,00 anios ante aora. La esemplo de la tipo, "Neandertal 1", ia es trovada en 1856 en la vale de la Rio Neander en Deutxland. Pos multe debate sur sua validia, neandertales ia es videda como primitiva, stupida, e bruta per la plu de sentenio 20. An si la persepi de los ia es cambiada multe de cuando la comunia de siensistes, la imaje de la "om de cavas" resta comun en cultur popular.

La tecnolojia de la neandertales es multe sofisticada. Lo inclui la industria [[cultur mousterian] de utiles de petra e posible la capasia per crea foco e construi ximinerias en cavas, fabrica la aderente de catran de la cortex de betul, fabrica a min vestes simple simil a covreletos e pontxos, texe, naviga barcos tra la Mediteraneo, usa plantas medical e trata feris sever, conserva comedas, e usa un varia de tecnicas de coce, como rosta, boli, e fuma. Neandertales ia usa un varia de comedas, xef mamales con ungulas, ma ance otra animales grande, plantas, mamales peti, aves, e recursos de rios e mares. An si los ia es probable predores alta, los ia debe compete con ursos, leones, ienas, e otra predores grande cual abita cavas.

Alga esemplos de pensa simbolin, e arte paleolitica ia es atribuida, con alga dutas, a neandertal, incluinte ornas fabricada de la osos de avias o concas, colies de cosas noncomun, incluinte cristales e fosiles, gravas, produi de musica (indicada par la flauta de Divje Babe, e depintas en cavas en Espania datida (nonserta) a ante 65,000 anios ante aora. Alga sujestas de credes relijiosa ia es sujestada. Neandertales ia es probable capas de parla, ma lo no es serta como complicada sua linguas ta es.

Comparada a umanas moderna, neandertales ia ave un corpo plu durante, con membros plu corte. Esta cualia ia es comun esplicada como ajustas per conserva caldia en un clima fria, ma pote ance es ajustas per sprinta en tereno de forestas. Los ia ave ajustas a clima fria como la reservas de gras corpal e un nas plu grande per caldi aira. Omes ia es sirca 165 cm en altia e femes ia es sirca 153 cm, simil a umanas moderna ante la revolui industrial. La cranios de omes neandertal ia es sirca 1600 cm3 e de femes 1300 cm3, en la estende de valuas per umanas umana.

La cuantia de popla ia resta basa. On ave indicas de cultures rejional e alga comunica entre los. Los ia abita comun en cavas, e ia move entre cavas par saison. Neandertales ia vive en un ambiente de stresa alta con frecuentias de trauma alta, e sirca 80% de los ia mori ante 40 anios. Indicas de misca de razas entre neandertales e umanas moderna ia es mostrada en la projeta de la jenom neandertal de 2010. Lo ia aveni posible 316-219 mil anios ante aora, e plu probable plu probable 100 mil anios a ante e ancora 65 mil aa. Los ia misca ance con la denisovanes, un otra grupo de umanas antica, en Sibir. Sirca 1-4% de tota jenomes umana (estra susaharan) deriva de neandertales, e sirca 20% de jenes neandertal distinguida survive oji. Lo pare ce multe jenes eritada de la neandertales ia pote es danante e ia es eliminada par eleje natural. Lo pare ce alga jenes ia afeta la sistem de imunia e alga otra strutures e funsionas biolojial, ma un parte grande pare es noncodiginte.