Cultur Hamangia

De Vicipedia
Jump to navigation Jump to search
La neolitica media en Europa

La cultur hamangia es un cultur de la neolitica tarde de la area de Dobruja (en Romania e Balgaria) entre la Rio Danubio e la Mar Negra e Muntenia en la sude. Lo es nomida per la loca de Baia-Hamangia, descovreda en 1952 longo Lago Golovita.

La cultur hamangia ia comensa sirca 5250 o 5200 aec e ia dura asta sirca 4550 o 4500 aec. Lo ia es asorbada par la cultur boian cual ia estende se en la dirije de Gumelnitsa. Sua lias cultural con Anatolia sujeste ce lo ia es la resulta de un colonia de popla de Anatolia, no como la cultures visina, cual es desendeda de coloni neolitica plu temprana.

Vasos pintida con motifes jeometrial complicada fundida sur spirales es tipal de la cultur. Los ia es decorada con puntos, linias paralel, e zigzagas, cual fa ce la seramicas de la cultur hamangia multe orijinal.

La cultur hamangia ia atrae e atrae ancora la atende de multe istoristes de arte per sua figuras de arjila multe sofisticada. La figuras es tipal multe stilida e mostra femes nuda con senos e gluteos esajerada ma fases asenta. Du figures, conoseda como "la pensor" e "la fem sentante" es considerada obras mestral de arte neolitica.

Vilas es composada de casas retangulo con un o du sales, construida de vim e arjila, a veses con fundas de petra. Los ia es normal ordinada en un grilia retangulo e pote formi colinas peti. Colonias es locada longo la costa, a la costa de lagos, a la terazas basa e media longo rios, e a veses en cavas.

Enteras es colieda en semeteros, con la corpo acrupida o estendeda. Benes en tombas inclui petra de foco, ornas de concas, e utiles de oso, ma tende es sin vasos en hamangia prima.

Alga locas es spesial importante: La vila a la Lago Durankulak ia comensa sur un isola peti, sirca 7000 aec. Un necropoli en Cernavoda es do la statuetas famosa - "la pensor" e "la fem sentante" - ia es descovreda. E la vila de Baia-Hamangia, ia es descovreda en 1953 longo Lago Golovita, prosima la Mar Negra en la provinse Romanian de Dobrogea.