Siera Leon

De Vicipedia
Republica de Siera Leon
Republic of Sierra Leone
Informa jeneral
Capital: Freetown
Lingua ofisial: Engles
Dirije
Governa: Republica paramental constitual unida
- Xef de stato: Presidente Ernest Bai Koroma
- Xef de governa: Vispresidente Victor Bockarie Foh
Otras
Area: 71 840 km²
Popla: 7 075 641
Densia: 79,4
PIB:
Mone: Leone (SLL)
Zona de ora: GMT (UTC+0)
Numero de telefon: +232
Interede: .sl

Siera Leon, ofisial la Republica de Siera Leon, es un pais en Africa ueste. Lo ave frontera con Gine en la norde-este, Liberia en la sude-este e la Mar Atlantica a la sude-ueste. Lo ave un clima tropical, con un ambiente diversa variante de savana a foresta. La pais ave un area de 71 740 cilometres cuadrida e un cuantia de popla de 7 075 641 en 2015. Lo es un republica constitual con un presidente elejeda direta e un legeria con un salon, la Parlamento. La capital e site xef es Freetown. Siera Leon es divideda en sinco rejiones manejal: la Provinse Norde, Norde-Ueste, Este, sude e ueste. Esta rejiones es sudivideda en des-ses distritos, cual es divideda en xefias. Cada distrito ave sua governa local elejeda direta, an con potias multe limitada, car multe de la potias es de la governa sentral en Freetown.

Siera Leon ia es un colonia de la corona brites de 1808 a 1961. Lo ia deveni autonom de Rena Unida en 27 april 1961, gidada par Sr Milton Margai. En maio 1962, Siera Leon ia ave sua prima votas jeneral como un nasion nondependente. En 19 april 1971, la governa de Siaka Stevens ia aboli la governa parlamental e ia declara Siera Leona un republica presidental con Stevens como la prima presidente de la pais. De 1978 a 1985, Siera Leona ia es un pais con un sistem unipartital en cual la APC de Stevens ia es la sola partito political legal en la pais. La constituida de Siera Leona de oji, cual inclui un democratia multipartital, ia es adotada en 1991 par la governa de la presidente Joseph Saidu Momoh, la seguente de Stevens elejeda par el mesma. En 23 marto 1991, un grupo rebelante conoseda como la Frente Unida Revoluiste, gidada par la ofisior militar pasada Foday Sankoh ia lansa un gera interna de 11 anios en la pais, con un ojeto nonsusedosa de suverti la governa de Siera Leon.

En april 1992, la armada ia fa cade Momoh de la governa. En janero 1996, la governa militar su la jeneral brigador Julius Maada Bio ia fa reveni a la pais a un democratia multipartital e la constituida de 1991 ia es reinstituida. Bio ia dona la potia a Ahmad Tejan Kabbah pos sua vinse en la votas presidental de 1996. En 1997, la armada ia suverti la presidente Kabbah. An tal, en febrero 1998, un alia de fortes militar de Ecowas gidada par Nijeria ia sutrae la junta militar e la presidente Kabbah ia es reponeda como presidente. Siera Leona ia ave un democratia noninterompeda de 1998 asta oji. En janero 2002, la presidente Ahmad Tejan Kabbah ia completi sua promete de campania cuando el ia fini la gera interna, vinsente la rebelores con aida e suporta de Ecowas, la governa brites, la Uni African e la Nasiones Unida.

Sirca 16 etnicos abita Siera Leon, cada con sua propre lingua e costumes. La du plu grande e influente es la temne e mende. La temne abita xef en la norde-ueste de la pais, e la mende abita xef en la sude-este. Composada de un minoria peti, sirca 2%, es la popla crio, ci es desendente de la sclavos african-american librida. An si engles es la lingua ofisial, usada en scolas e en la maneja governal, crio, un creol fundida sur engles, es la lingua la plu parlada en la pais, parlada par 97% de la abitores. La lingua crio uni tota la etnicos en la pais, spesial en sua interatas comersial e sosial.

Siera Leon es un pais de majoria muslim, con la 78% de la popla seguente esta relijio, an si lo ave un minoria cristian influente (21%). La pais es videda como un de la statos la plu tolerante en la mundo. Muslimes e cristianes colabora e interata lunlotra multe pasosa, e violentia relijial es multe rara. La festa xef cristian e muslim es vacanses ofisial en la pais. En politica, la plu parte de la persones vota per un aspiror sin regarda sua relijio.

Siera Leon ia depende de minas, spesial de diamantes, per sua economia. Lo es entre la produores xef de titanio e bauxita, es un produor major de oro, e un de la deponedas plu grande de rutilo. Lo ave la porto natural tri plu grande en la mundo. An con tota sua ricia natural, 53% de la popla vive en povria en 2011. Siera Leon es membro de multe organizas internasional, incluinte la Nasiones Unida, la Uni African, la comunia Economial de Statos African Ueste (ECOWAS), la Uni de la Rio Mano, la Comunia de Nasiones, la Banco African de Developa e la Organiza de Coopera Muslim.

Istoria[edita | edita la fonte]

Istoria temprana[edita | edita la fonte]

Descovres arceolojial mostra ce Siera Leon ia es abitada continua per a la min 2 500 anios, poplada par sosias ci ia migra de otra partes de Africa. La popla ia adota la usa de fero en la sentenio 9 e en la anio 1000 cultiva ia es praticada longo la costa. La clima ia cambia notable e la limitas entre la zonas ecolojial diferente ia cambia, afetante migra e concista.

La foresta pluvosa tropical densa e la ambiente pantanosa de Siera Leon ia es considerable nonpenetrable; lo ia es ance la abiteria de la tsetse, cual ia porta un maladia fatal per cavalos e la zebus de la popla mande. Esta fator ambiental ia proteje sua popla de es concistada par la Impero Mali e otra imperos african. Esta ia ance redui la influe muslim de la Impero Mali ma islam, introduida par mercatores e migrores susu de la norde e la este, ia es jeneral adotada en la sentenio 18.

Comersia european[edita | edita la fonte]

La contatas european con Siera Leon ia es entre la prima en Africa Ueste en la sentenio 15. En 1462, la esploror portuges Pedro de Sintra ia mapa la colinas ensircante cual oji es la porto de Freetown, nominte la formi ‘’Serra da Leoa’’’ o “Serra Leoa” (portuges per Montes Leon Fema). La tradui espaniol es ‘’Sierra Leona’’ cual pos adatada e malspeleda ia deveni la nom corente de la pais en engles.

Poca pos la mision de Sintra, la comersiones portuges ia ariva a la porto. En 1495 los ia construi ja un punto de comersia en la costa. La nederlandes e la franseses ia comensa comersia ala, e cada nasion ia usa Siera Leon como un punto de comersia per sclavos traeda par comersiones african de areas interna con geras tribal e lutas per la teritorio. En 1562, la ingleses ia comensa la Triangulo de Comersia cuando la amiral Sir John Hawkins de la Marina Real ia transporta 300 sclavos african -otenida par spada e parta par otra metodos- a la colonia espaniol de Santo Domingo en Hispaniola en la Mar Caribe, do el ia vende los.

Colonias temprana[edita | edita la fonte]

Seguente la Gera de Nondepende Esuan, la brites ia evacua miles de african-american sclavos libre e ia relocali los en colonias canadian e caribe como ance en London. En 1787 la Corona Brites ia fundi un colonia en Siera Leon en cual ia es nomida la Provinse de Libria. Lo ia intende relocali alga de la “negra povre de London”, xef african-americanes librida par la brites en la gera. Sirca 400 negras e 60 blancas ia ateni Siera Leon en 15 maio 1787. La grupo ance ia inclui alga persones de Indias Ueste desendente de africanes de London. Pos institui Granville Town, plu de la prima grupo de colonistes ia moria, par causa de maladias e gera con la poplas african nativa (temne) ci ia resiste la intrui. La 64 colonistes restante ia institui un Granville Town du.

Jeografia e clima[edita | edita la fonte]

A map of Sierra Leone

Siera Leon es locada en la costa ueste de Africa, entre la latitudes 7° e 10°N (un area peti es a sude de 7°) e lonjitudes 10° e 14°U. La pais limita con Ginea a norde e norde-este, Liberia a sude e sude-este, e la Mar Atlantica a ueste. Siera Leon ave un area total de 71 740 km2, divideda en un area de tera de 71 620 km2 e 120km2 de acua. La pais ave cuatro areas jeografial diferente: En Siera Leon este on trova la plano alta es miscada con montes alta, do la Monte Bintumani ateni 1 948 m, la punto la plu alta de la pais.

  • La parte alta de la basin drena de la rio Mona es locada a sude de esta rejio.
  • La sentro de la pais es un rejion de planos basa, conteninte forestas, arboretas e teras cultivada, cual ocupa sirca 43% de la tera de Siera Leon. La parte norde de esta ia es categorida par la Funda Mundal de Natur como parte de la ecorejion Mosaica de Foresta e Savana Ginean, en cuando la sude ia es categorida como planos de foresta pluvosa e teras cultivada.
  • En la ueste, Siera Leon ave alga 400 km de costa atlantica, cual dona a el furnis maral abundante e un potensial per atrae turistes. La costa ave un rejion basa e pantanosa, nomida la Rizoforas Ginean. La capital Freetown es locada en la peninsula costa, junta a la porto de Siera Leon, la porto natural tri plu grande en la mundo.

La clima es tropical, con du saisones determinante la sicle cultival: la saison pluvosa de maio a novembre, e la saison seca de desebre a maio, cual inclui HARMATAN, cuando ventas fresca e seca venta de la Deserto Sahara e la temperatur a note pote es de 16º C. La temperatur promedia es 26ºC e varia de 26 a 36ºC tra la anio.

Educa[edita | edita la fonte]

Educa en Siera Leon es legal esijeda per tota enfantes de ses anios en educa prima (clase P1 a P6) e tre anios en educa de liseo minor, ma un manca de scolas e enseniores ia fa reali lo nonposible. Du tris de la popla adulte de la pais es nonalfabetiste.

La gera interna de Siera Leon ia resulta en la destrui de 1 270 scolas de educa prima e, en 2001, 67% de la enfantes en eda de vade a scola ia es estra lo. La situa ia boni notable de alora con la dupli de la enrola en la scola de educa prima entre 2001 e 2005 e la reconstrui de multe scolas de la fini de la gera. Studiantes en scolas de educa prima es entre 6 e 12 anios, e en la scolas de liseo entre 13 e 18. La educa prima es sin custa e obligante en scolas publica sponsorida par la governa.

La pais ave tre universias: Fourah Bay College, instituida en 1827 (la universia la plu vea en Africa ueste), la Universia de Makeni (instituida como The Fatima Institute en setembre 2005 e donada la state de universia en agosto 2008 con la nom de Universia de Makeni; e la Universia de Njala, locada en la Distrito Bo. La Universia de Njala ia es instituida como la Njala Agricultural Experimental Station en 1910 e ia deveni un universia en 2005. Scolas per instrui profesores e seminarios relijial pote es trovada en tota la pais. Israel dona donadas per studia a studiantes de Siera Leon como parte de sua program de coopera a developa internasional.

Economia[edita | edita la fonte]

En la desenio de 1990 la ativia economial ia es descresente e la infrastrutur economial ia deveni vera degradada. En la desenio seguente plu de la economia formal ia es destruida en la gera interna de la pais. De la fini de combates en janero 2002, aida masosa esterna ia aida Siera Leon en sua recovre.

Plu de la recovre depende de la susede e la fortias de la governa per limita la froda de la ofisiores, cual multe crede ce lo ia es la causa de la gera interna. Un indicador xef de susede va es la eficasia de la maneja governal de la setor de diamantes.

On ave un nivel alta de nonemplea, xef entre jovenes e soldatos pasada. Autorias ia comensa lenta a reali reformis en la setor publica e la program de privati.

La mone es la leone. La banca sentral es la Banca de Siera Leon.