Mosambic

De Vicipedia
Mosambic
Informa jeneral
Capital: Maputo
Lingua ofisial: Portuges
Dirije
Governa:
- Xef de stato:
- Xef de governa:
Otras
Area: 801 590 km²
Popla: 28 829 476 (2016)
Densia: 28.7/km²
PIB:
Mone: Metical mosambican
Zona de ora: UTC+2
Numero de telefon: +258
Interede: .mz

Mosambic (ofisial la Republica de Mosambic) es un pais en Africa sude-este. Lo es bordada par la Mar Indian a la este, Tanzania a la norde, Malaui e Zambia a la norde-ueste, Zimbabue a la ueste, e Suaziland e Sudafrica a la sude-ueste. Lo es separada de Madagasicara par la Streta Mosambic a la este. La capital e site la plu grande es Maputo (nomida "Lourenço Marques" ante autonomi).

Entre la sentenios 1 e 5 ec, persones de lingua bantu ia migra de plu norde e ueste. Portos comersial suahili (e arabi a pos) ia esiste longo la costas asta la ariva de europeanes. La area ia es esplorada par Vasco da Gama en 1498 e colonida par Portugal en 1505. Lo ia es ance un loca major do mercatores somali ia sclavi la popla local, comensante lo cual on nomi aora la comersia de sclavos somali.

Pos plu ca cuatro sentenios de rena portuges, Mosambic ia gania autonomia en 1975, deveninte la Republica Poplal de Mosambic pos tempo corta. Pos sola du anios de autonomia, la pais ia desende a un gera interna longa e intensa de 1977 a 1992. En 1994, Mosambic ia fa sua elejes multipartital prima; a pos, lo ia resta un republica presidental relativa stable. An tal, de 2013, pos plu ca 20 anios de pas, un rebela renovida par la Resiste Nasional Mosambican (RENAMO) ia aveni.

Mosambic es un de la paises la plu povre e min developada de mundo. Lo ave recursos natural rica e estendosa. La economia de la pais es xef fundida sur cultiva, ma industria crese, xef comedas e bevidas, fabrica cimical, e produi de aluminio e petrolio. La campo de turisme crese ance.

Un dawa tradisional de Mosambic

Sudafrica es la asosior comersial xef de Mosambic e sua fonte xef de investi esterna direta. Beljia, Brasil, Portugal e Espania es ance entre la asosiores economial la plu imporante de la pais. De 2001, la crese promedia anial de produi interna bruta de Mosambic ia es entre la plu altas de mundo. An tal, la pais es entre la plu basas par produi interna bruta per person, par developa umana, par mesuras de nonegalia, e par espeta de vive promedia.

La sola lingua ofisial de Mosambic es portuges, cual es xef parlada como un lingua du par sirca un dui de la popla. Linguas nativa comun inclui emacua, sena e suahili. La popla de sirca 24 milion persones ave un majoria vasta de persones bantu. La relijio la plu grande en Mosambic es cristianisme, ma minorias notable segue islam e relijios tradisional african.

Mosambic es un membro de la Uni African, la Comunia de Nasiones, la Comunia de Paises de Lingua Portuges, la Uni Latina, la Promove Nonaliniada, e la Comunia de Developa de Africa Sude, e es un oservor a la Organiza Internasional de Francofonia.

La area de Mosambic es sirca 801 590 cilometres cuadrida.