Ruanda

De Vicipedia
Jump to navigation Jump to search
Ruanda
Repubulika y'u Rwanda
République du Rwanda
Republic of Rwanda
Jamhuri ya Rwanda
Flag of Rwanda.svg Coat of arms of Rwanda.svg
Rwanda in Africa (special marker).svg
Informa jeneral
Capital: Kigali
Lingua ofisial: Kinyarwanda, franses e engles
Dirije
Governa:
- Xef de stato:
- Xef de governa:
Otras
Area: km²
Popla:
Densia:
PIB:
Mone:
Zona de ora:
Numero de telefon:
Interede:
Carte Rwanda.png

Ruanda (ofisial la Republica de Ruanda) es un pais en Africa sentral e este, e un de la paises la plu peti en la continente african. Locada prosima a sude de la Ecuator, Ruanda es bordada par Uganda, Tanzania, Burundi e la Republica Democrata de Congo. Ruanda es en la rejion de la Lagos Grande de Africa e es alta levada; sua jeografia es dominada par montes en la ueste e savana a la este, con multe lagos tra la pais. La clima es temperada a sutropical, con du saisones pluvosa e du saisones seca en cada anio.

La popla es joven e xef campanial, con densia entre la plu altas en Africa. Ruandas veni de sola un grupo cultural e lingual, la baniaruandas, esta grupo conteni tre sugrupos: la hutus, la tutsis e la tuas. La tuas es un popla de pigmeos ci abita en forestas, desendente de la abitores la plu temprana de Ruanda. Eruditas desacorda sur la orijinas de e diferes entre la hutus e tutsis: algas crede ce diferes deriva de castas sosial pasada en sola un popla, ma otras crede ce la hutus e tutsis ia ariva separada en la pais, de locas diferente. Cristianisme es la relijio la plu grande en la pais; la lingua xef es cinyaruanda, parlada par la plu de ruandas, e engles e franses servi como linguas ofisial.

Ruanda ave un sistem presidental de governa. La presidente es Paul Kagame de la Fronte Patriota Ruanda, ci ia emprende la posto en 2000. Ruanda ave oji poca froda en compara con paises visina, an si organizas de diretos umana reporta supresas de grupos oposante, menasas, e restrinjes de libria de parla. La pais es governada par un ierarcia dirijal ordinada ja de la eda precolonial; on ave sinco provinses con fronteras definida en 2006. Ruanda es un de sola du paises con majoria fema en la parlamento nasional.

Xasores-coliores ia coloni la teritorio en la edas de petra e fero, segueda plu tarda par poplas bantu. La popla ia fusa prima en clanes e a pos en renas. La Rena de Ruanda ia domina de la media de la sentenio 18, cuando la res tutsi ia concista militar otras, ia sentri potia e ia reali final politicas antihutu. Deutxland ia coloni Ruanda en 1884 como un parte de Africa Este Deutx, segueda par Beljia, cual ia invade en 1916 en la Gera Mundal Prima. Ambos nasiones european ia rena tra la res e ia continua un politica protutsi. La popla hutu ia revolta en 1959. Los ia masacra multe tutsis e ia fundi ultima un stato nondependente e xef hutu en 1962. La Fronte Patriota Ruanda (FPR), gidada par tutsis, ia inisia un gera interna en 1990. Tensas sosial ia eruta en la jenoside de 1994, en cual estremistes hutu ia mata un cuantia estimada de entre 500 000 e 1,3 milion tutsis e hutus nonestrema. La FPR ia fini la jenoside con un vinse militar.

La economia de Ruanda ia sufri multe en la jenoside de 1994, ma ia forti a pos. La economia es xef fundida sur cultiva susistal. Cafe e te es la recolies xef esportada. Turisme es un setor rapida cresente e es aora la modo xef par cual mone stranjer entra a la pais. Ruanda es un de sola du paises en cual on pote visita secur gorilas montanial, e visitores paia per lisensas de trasa gorilas. Musica e dansa es partes integral de la cultur ruanda, spesial tambures e la dansa intore, multe coreografida. Ojetos tradisional de arte e artisania es produida tra la pais.

Ruanda ave un area de sirca 26 338 cilometres cuadrida, e sirca 11 262 564 abitores (2015). Sua site capital es Kigali.