Liberia

De Vicipedia
Republica de Liberia
Republic of Liberia
Informa jeneral
Capital:
Lingua ofisial:
Dirije
Governa:
- Xef de stato:
- Xef de governa:
Otras
Area: km²
Popla:
Densia:
PIB:
Mone:
Zona de ora:
Numero de telefon:
Interede:

Liberia (ofisial la Republica de Liberia) es un pais a la costa de Africa ueste. Lo es bordada par Siera Leon a sua ueste, Gine a sua norde e Costa de Ivor a sua este. Lo covre un area de 111 369 cilometres cuadrida, e ave un popla de 4 503 000 persones. Engles es la lingua ofisial e on parla plu ca 20 linguas nativa, representante la multe tribus ci composa plu ca 95% de la popla. La capital e site la plu grande de la pais es Monrovia.

Forestas a la linia de costa es xef composada de rizoforas cual tolera sal, e la interna min densa poplada ave forestas cual deveni un plano de savanas plu seca. La clima es ecuatoral, con pluves notable en la saison pluvosa de maio a otobre, e con ventas sever de harmatan en la resta de la anio. Liberia poseses sirca 40% de la foresta pluvosa ginean cual resta. Lo ia es un produor major de cauxo en la temprana de la sentenio 20.

La Republica de Liberia ia comensa como un colonia de la Sosia de Coloni American, ci ia crede ce persones negra va ave un probable plu grande de libria en Africa ca en la Statos Unida. La pais ia declara sua autonomia e 26 julio 1847. La Rena Unida ia es la pais prima cual ia reconose la autonomia de Liberia. La SUA no ia reconose lo asta 5 febrero 1862, en la Gera Interna American.

Entre 7 janero 1822 e la Gera Interna American, plu ca 15 000 persones negra librida e libre naseda ci ia fronti limitas legida en la SUA, con ance 3198 afrocaribes, ia reloca se a la colonia. La colonistes negra ia porta sua cultur con se a Liberia. La constitui e bandera liberian ia segue la model de los de la SUA. A 3 janero 1848, Joseph Jenkins Roberts, un afroamerican rica e libre naseda de ci ia abita en Liberia, ia elejeda como la presidente prima de Liberia pos cuando la popla ia proclama autonomia.

Liberia es la sola republica african cual ave un autonomia autoproclamada sin gania lo par revolta de un otra potiosa, e es la republica moderna prima e la plu vea. Lo ia reteni sua autonomi en la Scaramuxa per Africa. En la Gera Mundal 2, Liberia ia suporta la labora de la Statos Unida contra Deutxland, e la SUA ia respnde con infrastrutur notable en Liberia per aida la labora de gera, cual ia aida ance la pais a moderni e boni sua recursos major de transporta airal. En ajunta, presidente William Tubman ia coraji cambias economial. Internasional, Liberia ia es un membro fondinte de la Alias de Nasiones, la Nasiones Unida e la Organiza de Unia African.

Tensas political en la rena de William R. Tolbert ia provoca un colpa milita en 1980 cual ia suverti sua governa pronto pos sua mori, marcante la comensa de un nonstablia political cual ia dura tra anios. Sinco anios de rena militar par la Consilio de Remete de Popla, e sinco anios de rena sivil par la Partito Democrata Nasional de Liberia ia es segueda par la Geras Interna Liberian Prima e Du. Estas ia causa la mori e desloca de plu ca un dui de milion persones, e ia ruina la economia de la pais.

Un acorda de pais en 2003 ia gida a elejes democrata en 2005, en cual on ia eleje Ellen Johnson Sirleaf como presidente. La recovre continua, ma sirca 85% de la popla vive su la linia internasional de povria. La stablia economial e political de Liberia ia es menasada en la desenio de 2010 par un epidemica de la virus Ebola; lo ia orijina en Ginea en desembre 2013, ia entra a Liberia en marto 2014, e ia ofisial declarada como finida a 8 maio 2015.