Preistoria de la popla uralica
.png)
La preistoria de la popla uralica es min studiada en la pasada ca la preistoria de la popla indoeuropean, an si la du poplas es forte interliada. La linguas uralica es tradisional divideda entre ramos variosa. La lista a su es de un studia par Honkola e otras (2013). Datos estimada (sujestada par la autores) de la separa de un ramo de sua asendentes uralica es ance incluida. Nota ce, jeneral, otras no acorda con sua estimadas, cual pare tro resente:
- Uralica (3300 aec)
- linguas samodeica
- linguas fino-ugrica (1900 aec)
La orijinas[edita | edita la fonte]
La orijina de la popla ci parla oji la linguas uralica ia es sujestada como locada prosima a la Montes Ural, a la lado european o la lado sibir. La razona xef per la ipotese sibir ia es la model tasonomial tradisional cual vide la ramo samodeica como prima separante de la otra ramos. Car la borda presente entre la samodeica e la ramo ugrica es en Sibir ueste, la fende orijinal ia es videda como ia aveni ala ance.
Ma, car la linguas ugrica es conoseda como parlada plu temprana a la lado european de la Urales, un orijina european es egal posible. En anios resente, lo ia es ance sujestada ce, seguente la fonolojia, la fende la plu temprana no ia es entre la samodeica e la fino-ugrica, ma entre fino-permica e ugro-samodeica.
Ambos la proposas ia es suportada par la evidentes paleolinguistica, ma sola tal casos en cual la reconstruis semantica es serta es valida. Un orijina en sibir ia es suportada par la funda de du nomes de coniferes en proto-uralica, ma la arbores (Abies sibirica e Pinus cembra) ia es presente ance per un tempo longa en la esta distante de Europa. Un orijina european es suportada par parolas per "abea", "miel", "olmo", etc, pote es reconstruida como ja en proto-uralica, cuando samodeica es no plu ca la dialeto cual ia departe prima.
Plu resente la evidentes de parolas emprestada ia es usada per suporta un orijina european. Proto-uralica ia es notada como empresta parolas de proto-indo-european e la loca orijinal proto-indo-european es locada rara a este de la Urales. Lo pare ce proto-uralica ia developa en contata prosima con proto-indoiranian, cual es suposada como comensante en la cultur Poltavka de la stepes norde de la Mar Caspian ante sua sperde a Asia.
Pre-proto-uralica pare como es parlada en Asia sur la funda de contatas temprana con la linguas iucagir e similias tipolojial con la linguas altaica.
Teorias de continua[edita | edita la fonte]
Teorias de continua arceolojial ia es longa aplicada como un razona per continua linguistica en studias de uralica de la academistes esti Paul Ariste e Harri Moora en 1956. Esta idea ia es disputada ance tan longa. La varia la plu vea de teorias de continua pote es nomida la teoria de continua moderada o basa. Lo declara ce continua en Esti e Suomi pote es trasada a ante a la comensa de la cultur de vasos petenida, sirca 6000 anios ante aora. Esta idea ia deveni un corente xef en la confere multicampal de Tvarminne en 1980, cuando no contradises pare esiste.
La idea de continua ia deveni plu vidable en la desenio de 1990, cuando un varia plu radical o profonda de continua ia es introduida. Esta teoria sujesta ce la continua en Suomi pote estende a ante a la coloni inisial en la mesolitica, an 10 mil anios pasada.
Ma, en studias indo-european, J. P. Mallory ia esamina completa la debilia metodal de la idea de continua en 1989. En studias uralica, lo ia es notada ance ce la mesma razona (continua arceolojial) ia es usada per suporta teorias contradisente.
A la mesma tempo, resultas nova linguistica ia pare como contradisente la teorias de continua: la datos de proto-sami e proto-finica, e proto-uralica mesma ia es clar plu joven ca ia es crededa en la strutur de continua.
Teorias de migra[edita | edita la fonte]
Pos la rejeta de la teorias de continua, razonas linguistica ia pone la loca orijinal de proto-uralica posible sirca la Rio Cama o, plu jeneral, prosima a la curva grande de la Rio Volga e la Montes Ural. La estende de proto-uralica ia es datida a sirca 2000 aec, e sua pasos plu temprana estende a ante a min un o du milenios a ante. Esta es multe plu tarda ca la ideas plu temprana de la teorias de continua, cual ia loca proto-uralica a la lado european de la Urales.
Juha Janhunen, e otras, sujesta un orijina en Sibir sude-sentral, prosima a Lago Baical e la Montes Saian en la rejion de la borda entre Rusia e Mongol.
Un plu teoria sujesta ce la popla uralica ia comensa sude de la Urales, entra la Rio Volga e la Rio Ural. Pos la fini de la eda glasial, la popla uralica sperde norde-este e norde-ueste. En la milenio 3 aec, la asendentes de la popla proto-samodeica comensa move plu norde-este, e la asendentes de la popla proto-ugrica segue los longo la Rio Ob, posible forsante la popla proto-samodeica plu norde. A la esta de la Urales, longo la rios Cama, Oca, e Volga, on trova un situa simil e en la mesma periodo de la milenios 3 aec: la popla proto-sami vade norde-este e coloni inisial la area sirca Suomi e , e la proto-finicas segue los, inisial coloninte la area sirca Esti, e probable forsa la sami plu norde. La popla proto-permica (pd la asendentes de la comi e udmurt) move norde e ueste, e la asendentes de la popla volgica (maris e mordvines) resta prosima a la loca orijinal.
En edas plu istorial, la magiar ia parti de otra tribus de ugricas sirca 800 aec, junta con la tribus variosa de la stepes, e invade ultima la area de Magiar moderna, sirca 895 ec.
Arceolojia[edita | edita la fonte]
Si on esamina la progresas arceolojial cual pote es liada a linguas e etnicos, lo par probable ce, par 5000 aec, la popla proto-indoeuropean (PIE) ia estende ja a la Rio Volga media e an a la Rio Ural. La cultures Samara e Hvalinsc, per esemplo, es suposada PIE. Simil, la popla uralica ia sperde ja tan distante como la area baltica e Scandinavia, en la forma de la cultur de vasos petenida.
Sirca 3700 aec, la cultures Botai e Tersec, posible la domantes prima de la cavalo, pote ia es uralica (o alga popla nonconoseda). Ma par 3600 aec, la proto-indoiranianes es probable developante la cultur Iamna, cual ta comensa puxa la popla uralica a la norde. E la proto-tocarianes de la cultur Afanasevo (sirca 3300 aec) ta pasa ultra la parte major de la stepe.
A la lado european, algas sujesta ce la cultur de vasos cordida (acc la "cultur de axas de batalia", sirca 3000 aec), de Europa norde e norde-esta, ia es orijinal un cultur uralica, adotada par la popla proto-germanica e proto-baltoslavica. Lo es an posible ce la natur alga strana de la linguas germanica (pe la cambias fonetical e la asentua inisial) ia deriva de un popla finica atentante parla un lingua indoeuropean.
En Ucraina e la vale de la Rio Volga basa, la indoiranianes ia developa la cultur de catacombas e la cultur Poltavca (sirca 2700 aec), en cuando a sua norde, la popla finica ia developa la cultur Abaxevo (sirca 2500 aec). Seguente, la indoiranianes ia comensa forsa an plu norde la uralicas de Sibir.
Jenetica[edita | edita la fonte]
La marca jenetical de la popla ci parla uralica es la aplogrupo N1c-TAT (yDNA), ance nomida N-M46. 63% de suomi, 47% de sami, e 41% de esti parteni a esta grupo. Popla samodeica tende ave plu N1b-P43 ca N1c. Aplogrupo N ia orijina en la parte norde de Xina sirca 18 mil a 23 mil aec e ia sperdeda a Eurasia norde tra Sibir a Europa norde. Sugrupo N1c1 es comun trovada en popla fino-ugrica e N1c2 en popla samodeica. Plu, aplogrupo Z (mtDNA), trovada en frecuentia basa en samis, suomis, e sibires, es relatada a la migra de popla uralica.
En analises jenetical resente de osos umana antica escavada de la restas de la sivilia Liao, aplogrupo N1 (yDNA) es trovada con un alga frecuentia, de 60 a 100%. Donce, un posible nova ia aveni ce la orijina de linguas uralica (e posible ance de la linguas iucagir) pote es la rejion de la Rio Liao. La evidente de vasos petenida, relatada a la popla fino-ugrica, es ance trovada en la sivilia Liao. Esta es ance suportada par la obras de Vladimir Napolscih, ci ia studia la orijina de la mitos de crea par la "tufatera", e ia conclui ce alga varias de esta mitos, cual es trovada en la folclor de popla uralica e otra poplas de N1 (yDNA), ia orijina en Asia norde, posible en la rejiones norde-este de Xina moderna.