Linguas iucagir
La linguas iucagir es un familia peti de du linguas relatada - wadul (o iucagir de la tundra) e odul (o iucagir de la foresta) - parlada en la este distante en la basin de la rio Colima. La familia es regardada como morinte. Wadul ia ave 30 a 150 parlores en 1989. Odul ia ave sinco a des parlores en 2009.
La du linguas es la sola restas de cual ia es un de la familias dominante de Sibir norde-esta, estendente de la rio Anadir en la este a la rio Lena en la ueste. Lo es sujesteda ce un continua de dialetas ia esiste alora, con wadul e odul a la estremas. La relata de la linguas iucagir con otra familias de linguas no es clar, ma alga linguistes ia sujeste ce los es distante relatada a la linguas uralica.
La du linguas comparti sola un parte peti de la vocabula e no es intercomprendable. Ma la strutures gramatical es multe simil. Ambos ave un resta de armonia de vocales e un fonotatica complicada de consonantes. Ambos ave un morfolojia rica aglutinante e pone la parolas xef a la fini de un formula. Lo es cuasi no suordina finita e poca strutures coordinante. La cualia la plu noncomun de la du linguas es sua sistem de alinia nontransitiva fendeda, fundida sur elementos de parla pratical. Sin un foca streta, la sistem es organizada sur la formas nominativa-acusativa; cuando la foca es streta, la ojetos direta e la sujetos de verbos nontransitiva es coaliniada (pd usa un caso spesial e acorda de foca).