Cultur de vasos petenida

De Vicipedia
Jump to navigation Jump to search
Un mapa de Europa en la periodo neolitica media; la cultur de vasos petenida es a la destra alta, en purpur
Un "eglesa de jigantas" a Rajakangas, Oulu, Suomi

La cultur de vasos petenida ia es un cultur de Europa norde-este cual ia esiste de sirca 4200 a 2000 aec. La popla ia segue ancora la stilo de vive de la xasor-colior de la periodo mesolitica, con sinias de alga cultiva temprana.

La restas de la cultur es distribuida en la area de Noria norde, la Rio Kalix en Sveria, la Golfo Botnia de Suomi, e la Rio Vistula en Polsca, e lo estende a la este asta la Montes Ural e ultra a la stepe prosima a la cadena de Montes Altai, do lo ia conflue con un continua de cultures con stilos de seramica simil. Partes de la rejion ia es asorbada par la cultur de vasos cordida plu tarde.

La cultur de vasos petenida es un de la poca esetas a la regula ce seramica e cultiva coesiste en Europa. En Asia sude-ueste, cultiva ia apare ante seramica, e cuando cultiva ia sperde a Europa, la fabrica de vasos ia veni ance. Ma, en Asia, do la seramica la plu vea ia es trovada, seramica ia es fabricada un tempo grande ante cultiva. Lo pare ce la cultur de vasos petenida mostra influes de Sibir e an Xina. Seramica con desinias simil es trovada tra Eurasia norde, incluinte Corea e Xina norde-este.

La seramicas de esta cultur es composada de vasos grande cual es rondida o puntida a su, con un capasia de 40 a 60 litres. La formas ia resta noncambiada, ma la decoras ia varia.

La vilas ia es locada a costas de mar o a lado de lagos, e la economia ia es fundida sur xasa, pexa, e la colie de plantas. En Suomi, lo ia es un cultur de mar cual ia deveni plu e plu spesialida en la xasa de focas. La abita tipal ia es probable un tipi de sirca 30 m2 en cual sirca 15 persones pote vive. Casas retangulo fabricada de lenio ia deveni popular en Suomi de sirca 4000 aec. Enteras ia es escavada a la vilas e la mor ia es covreda con ocer roja. La eda de esta cultur mostra un usa estendeda de ojetos fabricada de petra de foco e ambar como ofres a la mor.

Utils de petra cambia poca tra tempo. Los ia es fabricada de materiales local como ardosia e cuarzo. Trovadas sujeste ce los ia ave un rede de intercambia estendosa: la ardosia roja ia orijina en Scandinavia norde, asbesto de Lago Saimaa, ardosia verde de Lago Onega, ambar de la costas sude de la Mar Baltica, e petra focosa de la area de Valdai en Rusia norde-ueste.

La cultur inclui arte en la forma de figuras peti de arjila ardeda e testas de animales fabricada de petra. La testas ia es de alces e ursos e ia es derivada de la arte de la mesolitica. Lo ia ave ance multe depintas sur roca.

Jeneral, eruditas sujeste ce la sperde de la popla de la cultur de vasos petenida ia es corelatada a la sperde de la linguas uralica. Plu resente, algas sujeste ce esta popla ia pote ance parla linguas nonconoseda, car alga toponimes e idronimes indica linguas nonuralica e nonindoeuropean. Lo es posible ce la cultur ia es composada de parlores de multe linguas con sola un de los protouralica.