Xasores-coliores

De Vicipedia
Jump to navigation Jump to search
Un familia de la san, un de la poplas ancora survivente de xasores-coliores

Xasores-coliores es umanas cual vive en un sosial en cual la plu de o tota comedas es otenida par foraje (colie de plantas savaje e xasante animales savaje), contrastante con sosias cultival, cual depende xef de spesies de plantas e animales domada.

Xasa e colie ia es la adapta prima e la plu susedosa, ocupante a min 90% de la istoria umana. Seguente la inventa de cultiva, xasores-coliores ci no ia cambia ia es deslocada o concistada par grupos cultivante o pastorial en la plu partes de la mundo. Sola poca sosias moderne es clasida como xasores-coliores, e multe aumenta sua foraje con orticultur o pastoria.

En la desenio de 1970. Lewis Binford ia sujeste ce umanas temprana ia oteni comeda par foraje e no par xasa. Umanas en la paleolitia ia abita forestas, cual ia permete ce el colie comedas de mar, ovos, nozes, e frutas, en ajunta a foraje. En loca de mata animales grande per carne, seguente esta teoria, los ia usa la corpos de tal animales cual ia es matada par predores o cual ia mori de causas natural. Datos arceolojial e jenetica ia sujeste ce la xasores-coliores paleolitica ia survive en boscas abrida e ia sperde tra areas produosa en cuando los evita la foresta densa.

Seguente la ipotese de core durante, core per distantias longa como en xasa persistente, un metodo usada ancora par alga grupos de xasores-coliores en nosa eda, ia es probable un forsa evoluinte per alga cualias umana. Esta ipotese no contradise nesesada la ipotese de foraje: ambos stratejias pote es usada, seguente, alterante, e an simultan.

Xasa e colie ia es suposada la stratejia de susiste usada par sosias umana comensante sirca 1.8 milion anios a ante, par homo erecto, e de la apare sirca 0.2 milion anios a ante par homo sapiens. Xasores-coliores preistorial ia vive en grupos cual ia es composada par alga familias resultante en un grandia de alga deses persones. Lo ia resta la sola modo de susiste asta la fini de la mesolitica sirca 10,000 anios a ante, e pos esta ia es recambiada sola gradal con la sperde de la revolui neolitica.

Comensante a la cambia entre la paleolitica media e tarde, alga 80,000 a 70,000 anios a ante, alga xasores-coliores ia comensa spesialida, consentrante sur xasa un eleje plu peti de animales, comun plu grande, e colie un eleje plu peti de otra comedas. Esta spesiali de labora ia envolve ance la crea de utiles spesialida como redes per pexa, oncas, e arpones de oso. La cambia a la periodo neolitica seguente es definada xef par la developa nonpresedente de cultiva nasente. Cultiva ia orijina e sperde en alga areas en Asia e America tan temprana como 12,000 anios a ante.

Orticultur en forestas ia es ance usada como un sistem de produi comedas en partes de la mundo en esta periodo. Jardines en foresta ia orijina en edas preistorial longo rivas covreda par jungla e en la pedes de montes de rejiones monsones. En la prosede gradal de familias boninte sua ambiente prosima, arbores usosa e spesies de vites ia es identifiada, protejeda, e bonida, en cuando spesies nondesirable ia es eliminada. Ultima, spesies superior introduida ia es elejeda e incluida en la jardines.

Multe grupos ia continua sua vives xasor-colior, an si sua cuantias ia diminui continual, partal como un resulta de presa de comunias cresente de cultivores e pastores. Multe abita en la mundo developante, o en rejiones seca o forestas tropical. Areas cual ia es disponable orijinal a xasores-coliores continua es intruida par cultivores. La compete resultante per usa de tera causa ce sosias de xasores-coliores adota esta modo de vive o move a otra areas. Jared Diamond ia culpa un diminui de otenablia de comedas savaje, spesial la recursos de animales. En America Norde e Sude, per esemplo, la plu de spesies de mamales grande ia es estinguida par la fini de la plestosene como la resulta de supraesplota par umanas, un de alga esplicas ofreda per la aveni de estingui de la cuartronaria.

En cuando la cuantia e grandia de sosias de cultivores ia crese, los ia estende a areas usada tradisional par xasores-coliores. Lo ia resulta en la depende cuasi universal de cultiva, e en la abita en areas nonconveninte per cultiva par la poca cultures de xasores-coliores moderne.

La plu de xasores-coliores es nomada o seminomada e vive en abitas tempora. Comunias movable construi tipal refujes con materias nonpermanente, o los pote usa refujes natural de roca como cavas, cuando disponable. Alga cultures de xasores-coliores, como la poplas nativa en la costa nord-ueste de America Norde a la Pasifica, ia abita en ambientes rica cual ia permete ce los es sedente o semisedente.

Xasores-coliores tende ave sosias egaliste, an si los cual es sedente es esentes. Cuasi tota xasores-coliores en Africa es egaliste, con femes sirca tan influente e potiosa como la omes. Karl Marx ia nomi esta sistem sosioeconomial "comunisme primitiva".

La egalisme tipal de xasores-coliores ia es nunca total, ma lo es clar cuando videda en un contesto de evolui. Un de la relatas plu prosima de umanas es la ximpanzes, ci es en no caso egaliste e formi se en ierarcias dominada par un mas "alfa". Tan grande es la contrasta entre ximpanzes e xasores-coliores ce paleoantropolojistes ia sujeste ce resista a domina ia es un fator xef per la evolui de consensa, lingua, relata familial, e organiza sosial umana.

Antropolojiste sujeste ce xasores-coliores no ave xefes permanente; en loca, la person ci inisia en un projeta depende de la taxe. En ajunta a la egalia sosial e economial en sosias de xasores-coliores, on ave comun, an si no sempre, egalia de la sesos. Los ordina se comun en grupos fundida sur relata o membria en un clan o tribu. Abita pos sposi es tipal matrilocal, a min a la comensa. Madres joven pote joia suporta en atende enfantes de sua propre madres, ci continua abita prosima en la mesma campa. La sistemes de familia e desende entre xasores-coliores ia es flexable relativa, an si on ave evidentes ce familia relatas temprana tende jeneral es matrilinial.

Un ordina comun es la divide de labora entre la sesos, con femes xef coliente e omes xef xasante. En un poca de casos, femes xasa la mesma animales ca la omes, a veses con la omes. En otra sosias, la femes xasa animales peti como lezardos per nuri sua enfantes e manteni relatas con otra femes. Car sosias de xasores-coliores es plu comun nomada, cual nesesa la minimi de poseses, no suprapasa de recursos debe es acumulada par un membro, e egalisme es un modo de garantia distribui. Comparti de recursos e intercambia mutual (pe de carne ganiada en xasa) es importante en la sistemes economial en sosias de xasores-coliores. Esta sosias es descriveda a veses "economias de donadas".

Marshall Sahlins (1968) ia sujeste ce la imaje de xasores-coliores como vivente "solitar, povre, desplasente, bruta, e corta", la descrive par Thomas Hobbes en 1651. Sahlins ia mostra ce la datos etnografa ia indica ce xasores-coliores labora per multe min oras e joia plu osio ca membros tipal de sosia industrial, e los come ancora bon. Ross Sackett (1996) ia analise 102 studias de usa de tempo e 207 studias de spende de enerjia en 1996. El descovre ce adultes en sosias forajente e orticultural labora, a la promedia, sirca 6.5 oras per dia, en cuando persones en sosias cultivante e industrial labora, a la promedia, sirca 8.8 oras per dia.

Michael Gurven e Hillard Kaplan (2007) ia estima ce sirca 57% de xasores-coliores ateni 15 anios. De los ci ateni 15 anios, 64% continua vive a o pos 45 anios. Esta sujeste un espeta de vive entre 21 e 37. Los estima plu ca 70% de moris es la resulta de maladias, 20% de moris es de asidentes o violes, e 10% es de maladias dejenerante.

Sosias de xasores-coliores mostra un varia sinifiante, dependente sur clima e biozona, tecnolojia disponable, e strutur sosial. Arceolojistes esamina la utiles de xasores-coliores per mesura la grado de varia de grupos diferente. Collard e colaborores (2005) ia descovre ce temperatur es la sola fator sinifiante cual afeta la varia de utiles. Esta resultas no contradise vera la teoria de Torrence (1989) ce la risca de fali es la fator la plu importante.

Un modo per divide grupos es par sua sistem de redona. James Woodburn usa la categorias "redona direta" per xasores-coliores egaliste, e "redona retardada" per la nonegalistes. La tipo direta consuma sua comeda en un o du dias pos cuando los oteni lo. La tipo retardada conserva la esedente per consuma plu tarda.

An si xasa-colie ia es la modo normal tra la paleolitica, oserva de la xasores-coliores moderne no refleta nesesada la sosias paleolitica. La sosias de nosa eda ia ave multe contata con sivilia moderne e represente la situa "nonmanxada" de poplas noncontatada.

La cambia de xasa-colie a cultiveria no es nesesada un prosede de un dirije. Xasa e colie represente un stratejia adatante e pote es esplotada cuando nesesada, cuando cambia ambiente causa stresa estrema de comedas. Vera, lo es a veses difisil per vide un linia clar entre la sosias de xasores-coliores e cultivores, spesial pos la adota vasta de cultiva e la estende resultante de la cultur cual ia aveni en la 10,000 anios a pos. En esta eda, on pote vide la esiste en evolui de cultur de economias miscada, con un combina de foraje e produi, o cuando forajores ave relatas de intercambia con cultivores.