Plestosene

De Vicipedia
temperatures en la eda posglasial (seguente cores de jela de Gronland
La estende de la glasia polal en la plestosene
Animales de Espania norde en la eda de glasias
Animales de America Sude en la plestosene

La epoca plestosene, comun nomida la eda de glasias, es la epoca jeolojial cual dura de sirca 2,580,000 a 11,700 anios ante aora (aa), en la periodo de glasias repeteda la plu resente. La fini de la plestosene es marcada par la fini de la periodo glasial final e con la fini de la eda paleolitica en arceolojia.

(Vide la scala de edas jeolojial per plu.)

La plestosene es la prima epoca de la periodo cuatronaria o la epoca ses de la era senozoica. Ante un cambia final confirmada en 2009 par la Uni Internasional de Siensas Jeolojial, la borda entre la plestosene e la pliosene presedente ia es acordada como comensante a 1.806 milion anios aa, e no como la data corente asetada a 2.58 milion anios.

La continentes moderna ia es esensal a sua locas presente en la plestosene, e la platas sur cual los senta ia move probable no plu ca 100 km relativa a lunlotra de la comensa de la periodo. Plu ca 11 avenis glasial major ia es identifiada, e multe avenis minor. En un periodo glasial, un glasia ave avansas e retiras minor. Un cambia minor es nomida un stadial, e la periodos entre stadiales es nomida interstadiales.

Animales continental e maral ia es esensal moderna, ma con multe plu mamales grande como mamutes, mastodones, diprotodones, smilodones, uros, ursos de fases corte, bradipos teran, jigantopiteco, e otras. Loca isolida, como Australia, Madagasicara, Zeland Nova e isolas en la Pasifica ia vide la evolui de avias e retiles grande, como la avia elefantin, la moa, la agila de Haast, cuincana, megalania, e meiolania.

La cambias sever de clima en la eda glasial ia ave efetos major sur animales e plantas. Con cada avansa de la jela, areas grande de la continentes ia deveni total despoplida, e plantas e animales ia retira a sude ante la glasias avansada, fasante stresa enorme. La stresa la plu sever ia resulta de la cambias la plu grande, cual redui spasio per abita e la recursos de comedas.

Un aveni major de estingui de animales grande, cual ia inclui mamutes, mastodones, smilodones, gliptodones, rinoseros lanosa, jirafidos variosa, bradipos teran, alces jigante]], ursos de cavas, [[gomfoterio[[s, lupos grande, e ursos de fases corta, ia comensa tarda en la plestosene e ia continua en la olosene. Neandertales ia deveni ance estinguida en esta periodo. A la fini de la eda glasial final, animales de sangue fria, mamales peti como muses de bosce, avias migrante, e animales rapida como servos con codas blanca, ia recambia la animales jigante e ia migra a norde. La estinguis afeta apena Africa, ma ia es multe sever en America Norde, do la cavalos nativa e cameles ia desapare.

La evolui de umanas moderna ia aveni en la plestosene. En la comensa de la plestosene, spesies de parantropos ia es ancora presente, con otra asendentes temprana de umanas. Ma en la paleolitica basa, los desapare, e la sola spesies de homonin ia trova par arceolojistes ia es homo erecto per la plu parte de la plesosene. Axes de mano oval e perin, asosiada con homo erecto e spesies derivada como homo heidelbergensis, apare alga 1.8 milion anios aa, sustituinte per la plu utiles plu simple de Oldowan usada par australopitheco garhi e la spesies la plu temprana de homo. La paleolitica ia ave plu varias de spesies en la jenero homo, incluinte la apare de homo sapiente sirca 200,000 aa.

Seguente la tecnicas de dati mitocondrial, umanas moderna ia migra de Africa pos la periodo glasial de la paleolitica media (300,000 a 130,000 aa) en la periodo interglasial (130,000 a 115,000 aa). Los ia sperde tra la mundo estra la glasias en la plestosene tarda. Un studia de 2005 ia sujesta ce umanas en esta migras ia reprodui con formas umana plu primitiva ja estra Africa a la plestosene tarda, cual resulta en la asorbe de materia jenetica de esta umanas primitiva en la materia de umanas moderna.