Rinosero lanosa

De Vicipedia

La rinosero lanosa (Coelodonta antiquitatis) es un spesie estinguida de rinosero cual ia es comun tra Europa e Asia norde en la plestosene, e ia survive asta la fini de la periodo glasial final.

La rinosero lanosa ia es covreda con capeles longa e densa, cual ia permete ce lo survive en la fria estrema sur la stepe mamute sever. Lo ia ave ance un jiba masosa supra sua spala. lo ia come xef la plantas erbin cual crese sur la stepe. Par la fini de la glasi Riss sirca 130 anios ante aora, la rinoseros ia estende de la plu parte de Europa, la planos de Rusia e Sibir, e la plano alta de Mongol.

Corpos momida conservada en la permajelada e multe restas de oso de la rinosero lanosa ia es trovada. Imajes de los ia es trovada entre la depintas en cavas en Eurasia.

Un studia de ADN de 40,000 a 70,000 ante aora ia mostra ce la relata la plu prosima de la rinosero lanosa es la rinosero sumatran.

Un adulte ia mesura tipal 3 a 3.8 metres de testa a coda, con un pesa estimada de sirca 1,800 e 2,700 kg. Lo pote crese ta alta como 2 metres, sirca la grandia de la rinosero blanca. Un rinosereta de un mense ia es sirca 120 cm de longia e 72 cm de altia a la spala.

La du cornos ia es de [ceratin]], con un corno longa estendente a fronte e un corno plu peti entre la oios. Ambos sesos ia ave du cornos. La corno fronte ia ateni a min un metre, a veses 1.4 m, e la pesa ia ateni 15 kg. Lo estende a fronte distante, plu ca los de rinoseros moderna. La corno a pos tende es plu corta, no plu ca .5 m.

Compara lo a otra rinoseros, la rinosero lanosa ia ave un testa e corpo plu longa, e gamas min longa. Sua spala ia es levada con un jiba potiosa, usada per suporta la corno fronte masosa. La jiba ia conteni ance un reserva de gras per aida survive tra la invernos fria de la stepe.

Esemplos jelada indica ce la pelo de capeles longa ia es brun rojin, con un supelo densa. Capeles corta ia covre sua gamas, cual preveni la adere de neva sur los. La longia de la corpo culmina en un coda de 45 a 50 cm, con un brosa de capeles ru. Femas ia ave du tetas sur la mamelas.

La rinosero lanosa ia abita xef en tereno basa, planos alta, e vales de rios, en climas seca a desertin, e ia migra a areas plu alta en climas plu beneficante. La abita xef ia es la stepe de la mamute, un area grande e abrida, covreda con estendes vasta de erba e arboretas. Los ia come xef erbas e siperos.

Multe depintas en cavas de la paleolitica tarda mostra rinoseros. La cualias defininte de la animal ia es depintada forte, con la dorso e jiba levada, contrastante con sua testa basa. Du linias curvida representa la oreas. La cornos ia es desiniada con sua curvas longa, e en alga casos, la pelo es ance indicada.