America Norde

300px

America Norde es un continente entre la Mar Atlantica a la este e la Mar Pasifica a la ueste. Tota de lo es situada a norde de la ecuator, en la emisfera norde, e la plu de lo es situada en la emisfera ueste. Lo pote ance es considerada un sucontinente de America.

America norde covre un area de sirca 24 709 000 km², cual es sirca 16.5% de la tera de la Tera e sirca 4.8% de la surfas total de la Tera. America norde es la continente la tre de la plu grande en area, pos Asia e Africa, e la cuatro de la plu grande en cuantia de abitores, pos Asia, Africa e Europa. En 2013, on ia estima ce la cuantia de abitores ia es cuasi 565 milion persones en 23 statos autonom, cual ia es aprosima 7.5% de la cuantia de abitores de la mundo, si on inclui isolas prosima (la plu notable de cual es en la Mar Caribe).

America norde ia es abita par umanas prima en la periodo glasial la plu resente, tra la ponte de tera de Bering sirca 40 000 a 17 000 anios a ante. On suposa ce la periodo paleoamerican orijinal ia dura asta sirca 10 000 anios a ante (la comensa de la periodo anticin). La paso clasica ia estende entre la sentenios 6 e 13. La eda precolombian ia fini par la migras transatlantica e la ariva de colonistes european en la eda de descovre e la periodo temprana moderna.

Alga de sua nasiones es multe rica, como la SUA, ma otras, como Aiti, es multe povre. La linguas la plu comun es engles, espaniol e franses. En Canada e la SUA, la cultur es xef european, ma en Mexico, la isolas de la Mar de Caribe e la nasiones de America Sentral, la cultures de Europa es en junta con la cultures de la americanes orijinal. Ance, la cultures de Africa ia influe tota la Americas.

• Gronland
• Canada
• Statos Unida de America
• Mexico
• Bermuda
• America Sentral
• Paises de la Mar de Caribe

Multe persones usa la parolas "America Norde" sola per la SUA e Canada. Mexico, America Sentral, e la paises de la Mar de Caribe, en esta caso, es partes de "America Latina".